補習社的女同事: 咖哩飯

「我隻手，點樣呀？」我估唔到Regina會主動問我呢樣。
 
「摸落，都幾舒服，手形唔錯。」

「Umm……緊張嗎？」我feel到佢果種有d賣萌嘅嬌滴語氣似乎係想引我心跳加速。
 
「我緊咩張？話左我會對你好d，咪拖住你行囉。」
 
「仲諗住話你」然後佢稍為踮高腳尖，係我耳邊講︰「你都插過我兩次啦，唔係連手仔都唔敢拖下嘛？」
 


呢個時候，我絕對相信佢學左我果d挑逗佢嘅邪惡講法！
 
「你……你講d野咁大膽，真係唔似以前嘅你。」
 
佢一改面容，然後又調皮咁講︰「你咁易就比我撩到架，果然你聽到呢種說話都係容易受唔住……好啦唔玩啦，快d行啦，我肚餓啦。」頭先仲話腳痛，而家開玩笑之後仲興奮得行係我前面，真係服左佢。
 
佢係我前面同時拖住我隻左手，呢個視角就係好多男仔都享受嘅「男友視角」。
 
入到餐廳，我先幫佢搵位坐低，然後主動幫佢排隊買野食，盡顯紳士風度。
 


「你頭先話鍾意食嘅煲仔飯到啦——」一路由櫃檯攞過嚟嘅時候都聞到陣陣飯香味。
 
「嘩！好正呀……」望到佢可以食到心愛晚餐嘅眼神，我都覺得心滿意足。
 
冇幾耐之後，我果份晚餐都準備好啦。
 
「噢，你果碟咖哩牛腩飯都幾香幾吸引，你好鍾意食呢度d咖哩？」
 
「係呀，辣度夠過癮又多份量，好食呀。」
 


「係咁……我想試下你個咖哩，可以嗎？」我當初一定估唔到，曾經同我冷戰嘅女同事而家就係我面前想同我交換晚餐！
 
「好呀，無所謂……咁……咁我都想試下你個煲仔飯。」
 
「好，咁你攞多兩個碗嚟。」
 
「係啦，之前都想知但係唔肯定，Regina你係住將軍澳嗎？」
 
「係呀，你點知架？你跟蹤我？」
 
「我之前咁啱係將軍澳線見到你，咁咪覺得係囉。」
 
「咁你呢？冇記錯你好似又係住將軍澳。」
 
「係呀，所以，星期六日我地都可以約出嚟見面啦。」


 
「有咩做先？」
 
「例如約出嚟，一齊做運動。」
 
「做咩運動？」我知佢今次係認真問我，但我又唔小心諗左d衰嘢。
 
「Er……可以……我地可以一齊踩單車！」
 
「好……好呀。」佢邊笑邊講，唔知係咪笑緊我對於「運動」呢兩隻字有咩反應。
 
發現有共同興趣︰做運動，係增加見面機會同培養感情嘅其中一步。
 
見到Regina攞手機出嚟睇通知，我靈機一觸，主動問佢︰「係喎，Regina，不如我地交換IG啦？」根據經驗，通常同女仔交換IG可以更快比大家互相了解。
 


「好，你個IG名係咩？」
 
「cyrus0711，頭像就係我個樣，好易認。」
 
唔駛十秒，佢就搵到啦。「撳左follow，你睇通知accept啦。」
 
我睇緊通知嘅時候，佢繼續講︰「你做咩會set左你個account係private嘅？」
 
「唔可以咩？做咩咁問？」
 
「Just好奇，你唔想講就唔問你啦。」
 
「呀唔係……我只係……有d相唔想比人public睇到。」我害羞得低頭。
 
「Cyrus你到底有咩事唔想公開比人知呀？快d accept我啦。」


 
Regina話「accept我啦」嘅時候，我又諗左第二d意思。
 
「Ok啦。」
 
「By the way你個Ig名嘅0711，係指你嘅生日？」
 
「係呀，無計啦，我試左唔同組合都比人用左，唯有加我生日日期落個名度。」
 
「哈哈，雖然諗緊你用得生日係你Ig名會唔會都係用生日日期做password，不過都幾得意嘅。」
 
佢果然會發現我用生日日期當做用戶名，不過估唔到佢唔係取笑而係話得意。
 
我唯有笑幾下當回應佢。「你個IG名，Reginacheung_rainy，都幾特別吖。」
 


「多謝你欣賞rainy呢個名。」
 
「唔通Regina你仲有個名叫做Rainy？」
 
「唔係呀，叫rainy係我鍾意雨天，好多人覺得落雨心情唔好，但我鍾意落雨可以洗滌心靈﹑沖走煩惱嘅感覺，同埋我係果種人地覺得灰心，但我依然希望能夠搵到曙光嘅人……我係咪講嘅道理好似太odd呀？」
 
「唔會呀，幾好聽呀，同埋個名有意思，我鍾意。」
 
「咁不如」佢靠前繼續講︰「你都可以叫我做Rainy架。」
 
「唔駛啦，叫Regina咪幾好囉。」
 
「你同我close左之後，鍾意點叫我都得。」佢眨一眨眼，同我打個眼色。
 
總係感覺，佢開始對我更加隨和同開朗，有時又會講下笑或者引我情緒高漲。就算我地目前只係由同事升為朋友嘅關係，但進展都比我預期良好。
 
「Cyrus你有d相都影得幾靚呀，同埋你都幾鍾意去旅行喎。」
 
「我由中學開始keep住每年都去一次旅行架，係疫情打亂左原本嘅計劃。」
 
「我都係呀，原本想去韓國但就係因為covid搞到去唔到，plan左去首爾睇演唱會。」
 
「Blackpink？」
 
「Yes！你都係Blink嗎？」佢雙眼好似發光咁，真係比之前bling大左。普遍女仔一講到自己鍾意嘅偶像團體都會特別興奮。
 
順帶一提，in case睇緊篇文嘅你唔知道，Blink係Blackpink嘅官方粉絲名。
 
「我鍾意聽佢地比較出名嘅派台歌，但冇話好去到好迷佢地嘅程度，四個入面鍾意Lisa多d。」
 
「我都係呀！我好鍾意佢化嘅妝同埋唱功，跳舞都好犀利！你知唔知佢上個月出嘅MV最近突破3百萬views啦？佢果個造型真係好型呀，眼神又夠銳利，好正呀超好睇！」
 
「哦……佢嘅人氣的確好高呢。」
 
「Sorry呀我好容易掛住自己講興奮得濟，冷靜番先……係啦，我睇到有個女仔以前同你有唔少合照，佢……係你個ex？」
 
「嗯……佢係呀，係我第二任。」
 
「咁你第一任呢？」
 
「我……我冇同佢影過咩值得po嘅合照。」我嘅語調流露出對往事嘅無奈同歎息。
 
「噢……如果令你諗番以前d傷心事，sorry呀。」我冇睇錯，Regina係善解人意嘅人。
 
「唔緊要，以前都過左去啦。」
 
「咁你頭先話唔想public嘅秘密應該係同前度一齊嘅post啦……既然唔想專登望番d post，你唔delete或者hide左呢d post嘅？」
 
「我唔識呀，你可以教我嗎？」
 
其實，我梗係識點樣係IG hide post啦，不過根據經驗同未經科學證實嘅研究，有時男仔有野唔明主動請教女仔，係可以令女方覺得自己對於男方嚟講有重要性，適當問女方問題仲可以提升女方嘅自信心同埋拉近關係，因為可以製造更多話題。
 
所以話，同女仔行得埋嘅男仔，除左個樣夠型，識得搵時機請教女仔，唔會下下出風頭認叻，咁先有親和力。
 
「你睇下呢度有個設定掣，首先撳落去，跟住典藏……」如是者，佢教左我兩分鐘左右，講得清晰又詳細。
 
食咖哩飯，同我夢寐以求嘅女同事同檯食飯，呢刻嘅我感到幸福，我亦好希望Regina會同樣因為同我相處多左而感到幸福。