【愛情】【靈異】我啊媽係遊魂野鬼: 第三回 今夜不回家 （下）

多數人會講：「我愛你一生一世。」以表達自己對愛情嘅忠貞。

而鬼係可以超越一生一世，鬼嘅愛係超越時間限制，猶其係殉情嘅鬼。

殉情嘅鬼心中有執念，放唔低愛人，選擇唔飲孟婆湯，要保留對愛人嘅記憶。

但代價係不能投胎，至少要係陽間做三世遊魂野鬼先有一次投胎嘅機會。

我：「咁如果都係唔選擇投胎呢？」





湯婆婆：「咁就要永遠做遊魂野鬼。」

湯婆婆：「佳懿啊，你突然對呢啲話題咁感興趣嘅？今日仲特登嚟搵我喎。」

我：「湯婆婆，人地掛住你嘛。。。。。。」

湯婆婆：「成日賣口乖，好啦，今日啲蕃茄好新鮮啊，拎啲番屋企丫～」

我：「唔洗啦，我下次再嚟探你丫～」





湯婆婆係我屋企樓下菜檔嘅事頭婆，由細睇到我大，廿幾年街坊，長期幫襯所以大家都好熟絡。

湯婆婆以前係一個神婆，對命理，玄學方面都精通，偶爾都有熟人介紹嚟搵湯婆婆算命或睇風水等。

關於我知道啊媽絕對唔係一個普通正常人嘅事，我唔敢同人講住，因為我實在無法證明呢種無科學根據嘅靈異事件，而且我仲未搞清楚一切，如果我講出嚟實比人當有精神病。

所以我去左問湯婆婆，我想了解鬼到底係點。


據湯婆婆岩岩咁講，即是話。。。。。。





啊媽係陽間咁耐，一直冇投胎，咁咪姐係遊魂野鬼？？

湯婆婆提到成為遊魂野鬼其中一個可能性係對愛人念念不忘，唔肯飲下孟婆湯。

不過，呢個只係其中一個原因啫，啊媽都唔一定係因為咁而成為遊魂野鬼，不過都唔係冇可能，啊媽咁愛啊爸。


手機震左一下，係啊爸send嚟嘅訊息，內容係啊爸今晚唔番屋企，麻煩轉告肥師奶。

弊！雖然我仲未搞清楚成件事係，但我知道酒店自殺事件同啊媽一定有關，並非巧合咁簡單。

以防萬一，啊爸今晚一定唔可以見其他女人，而且一定要番屋企！

所以我作左個理由，希望啊爸今晚留係屋企。





「啊爸，我突然好肚痛啊，你可唔可陪我去醫院啊。。。。。」


今夜不能不回家。