【愛情】【靈異】我啊媽係遊魂野鬼: 第四回 朋友

原來啊爸本來約左熊叔叔飲酒，因為要陪我去醫院而推咗熊叔叔。


熊叔叔係啊爸中學到依加嘅老友，係我印象中熊叔叔為人幽默，思想開放，即使熊叔叔已經四十二歲，但同我完全冇代溝，我當熊叔叔係朋友咁相處。

上次見熊叔叔係我失戀嘅時候，熊叔叔同我出嚟飲夜啡傾計，熊叔叔把口好密，所以我咩都夠膽同佢講。

仲記得上次我同熊叔叔講我一拖二，俾女朋友發現左，所以要同我分手。

熊叔叔一副食花生樣，一邊笑我，話我好學唔學，同我老豆一尻樣。





「咦，乜啊爸以前都係咁架？講嚟聽下？」

「你老豆仲玩得癲過你啊，你呢啲碎料啦！」

「姐係點啫，講多少少啦～」

「想知你自己問佢囉，哈哈，我就好口密嘅，我都唔會講你啲野比你老豆知啦。」

「唓，唔講就算。」





「不過玩還玩啊，小心啲啊，真係傷到人，出事架。」

「超，會點啫，好平常姐，依加呢個年代個個都係速食文化嘅產物，唔岩咪下一個囉，真係咁多一生一世託付終生咩。」

「唉，總之小心啲啦。」

「得啦，知啦，係喎熊叔叔你IG係咩，我po story想tag你。」

「好彩我平時活躍於社交平台啫，未同啲後生仔脫節，我id係jason_7979。」





「嘩，熊叔叔，你仲活躍過我喎，你story係一點點架喎，笑死。」

「梗係啦，你估你地啲後生先玩IG啊。」


諗起，我同熊叔叔都有一段時間冇見，啊爸搵熊叔叔飲酒，實係最近好煩。

「啊爸，不如下次約熊叔叔上嚟屋企打邊爐丫，我都好耐冇見熊叔叔啦。」

為免啊爸夜晚唔番屋企，又唔知會出咩事，我索性提議不如約熊叔叔上嚟屋企。

「好啊，你幫手買啤酒喎。」啊爸少有地露出笑容咁講。

「冇問題啦，飲到熊叔叔不醉無歸啊，哈哈。」