【已完結】【廣東話】《魔都姬神：退魔巫女千夜》（走甜健全作死日更小說企劃）: 其之二十四

其之二十四



凌晨四時三十分，港灣再發展區，距廢棄大樓約數公里外，
對人外/妖魔特別任務連，通稱AD(Anti Demon)警察，
前線臨時指揮中心，裝甲指揮車裡面。

「黑服…你一早估到會有咁樣嘅結果？」





指揮官睇住一班死過返生嘅手足，好似被鬼迷咁爭住衝返入去。

「點會呢？」黑服一貫毫無表情，毫無感情起伏咁話。

「無論果條大波妹變成點都係咁講？」

「一切偶然盡皆必然，蓋因此世萬物俱為萬機神所造，俱為０與１之構成，其為虛幻，亦為真實——科技聖典三章十一節」

「…你…係火星科技教信徒？！」





「…點會呢…不過聖典上面記載呢一切都係事實無誤。」黑服罕有地除低黑眼鏡，露出一隻完全機械化，發出紅光嘅義眼。

響補給同整修裝備之後，
由大隊長Alfa1帶頭，
…Delta隊２人，以及Echo隊除咗已陣亡嘅一位以外四人，
早前被千夜救出，一同返到地面嘅AD特警們…
為追上先行嘅千夜提供支援，進入地下樓層。

由於先前同狼王激戰，地下一樓整個天花都被炸開，變成露天狀況，
而且為對付千夜刻意破壞氣體燃料管道同地下自來水管，




令到現場既充滿可燃氣體，積水亦已達膝蓋高度。
AD特警身上嘅第四世代型強化裝甲具抗ABC全天候作戰機能，
甚至能夠響有限時間之內撐過無重力宇宙真空或者海底超高壓等極端環境，
為穿著者提供現代科技最高水準嘅保護，當然能輕鬆自在咁響呢種情況下行動。

「全層掃描結束，無動態反應。無熱能反應，重力波探信儀無回波，CLEAR！」

「準備好就進入坑道！保持隊形，注意各項讀數，感應器設定為戰鬥模式！」

Alfa1雖然並唔主張再度深入險地，因為佢相信退魔巫女…
…唔係相信佢絕對唔會遇到危險，而係相信，當連佢都會陷入危險，
咁絕對超出佢哋可以應該或者處理嘅水平……

…問題係，下面仲有一班待救兄弟，既然手足決定不放棄，
作為總隊目，現場最高指揮——將在外軍令有所不受，安坐後方裝甲指揮車內的大官，




指令只當為參考意見，完全係能指揮我的只有我——決定救人就做到底。

「既盡人事，只待天意！兄弟們，上呀！」

與此同時，另一方面，由地下深處一直衝返出去，
正沒命狂奔嘅六人，得千夜最後相助，
經過被佢先前一道爆炎符炸開燒成玻璃化表面嘅區域，
非常接近連接地下一階嘅走廊。

呢處本來佈滿肉質異物同觸手，但因為以手中斬魔刀開路，數量已大為減少。

不過，並唔代表通行無阻。

特別係佢哋全部人都帶傷在身，而且被生擒吊起其間解除武裝，
完全無武器可用，即使係一隻小怪都足以滅團。





「…走快啲呀！就到喇！」
「出口就響前面！」

如果一開始就無退路，咁反而會激發起人內心求生嘅慾望，產生盡地一搏嘅心態。
相反一次又一次給予希望但又帶來絕望，更能磨滅心智，令意志薄弱者早早放棄。

「嗚嘩～！」

只來得及慘叫，因腳傷走最慢嘅Alfa5就被好幾條觸手纏住，倒吊起嚟。

同行各人無力又無助，因為完全無武器響手，更因為觸手們改變策略（？）

只見觸手快速收緊，將Alfa5勒至無法呼吸，身上破碎不全嘅裝甲既發揮唔到丁點保護作用，
甚至因為響巨壓下扭曲變形，斷裂造成額外傷害。




「咕嚕…㗅啊哦啊啊…咕……哦啊~！」
血液湧入胸腔倒灌入食道加上肺臟受壓破裂，令到聲帶發出非人嘅聲響。
不過隨住骨骼折斷四肢被強行拉扯到不正常方向與角度，聲音悄然而止。
最後只見如同被屁孩玩厭的玩具人偶一樣，不但肢體以至頭部被觸手用力扯斷，
就連軀幹都被撕開至難以分辨出原型的程度。

「走呀！」

剩下五人不約而同地聯想到，之前留下活口並非仁慈，而係因為可以利用…
…作為捕捉救援者，即係退魔巫女．神樂千夜嘅誘餌！
而家既然目的已達，美少女退魔師身處陷阱中被搾取靈力，
咁好似佢哋呢啲毫無異能嘅弱者，
就變得毫無價值，死不足惜！

呢次真係末路狂奔，逃命要緊。





［次回待續］