【已完結】【廣東話】《魔都姬神：退魔巫女千夜》（走甜健全作死日更小說企劃）: 其之二十五

其之二十五





即使親眼目睹同袍慘死，
仲要響手無寸鐵欲救無從嘅狀況下，
剩低五個人亦只能拋下一切走為上著，
顧全自己命仔要緊。





不過即使係咁，妖魔完全無放過佢哋一馬嘅意思。

響後面，係一大堆觸手。
響前面，都係一大堆觸手。
左左右右，觸手，全部都係觸手。

「慘喇…被包圍住呀！」
「呢次走唔甩喇！」
「點算呀…實死無生啦！」





（唔好放棄呀！）

「伏低！」

幾乎係同一時間，各人聽到由相反方向傳來男聲同女聲，
要佢哋掙扎求存嘅聲音

只見眼前觸手群逐一被火線掃斷。





Maschinengewehr42——
——MG42每分鐘高達1500發嘅7.92×57mm毛瑟子彈彈幕，不同於其他機槍，
射擊時類似「撕裂布匹」嘅槍聲，響前大戰被稱為某獨裁元首的的電鋸，將一切撕開。

由大隊長Alfa1帶頭，Delta隊及Echo隊一行七人，
有如黑甲紅眼嘅地獄使者，一邊掃射一邊沿住連接地下一階嘅走廊行過嚟。

本來只由小隊長，同隊副作為支援火力配備，但顯然早前陷入險境呢個教訓，
令佢哋明白到無嘢係火力壓制唔到，如果有，就用更多更大嘅火力。

「一個帶佢哋出去，一個壓尾睇住，其它人跟住我推過去！」Alfa1一邊講，
一邊斷續扣下扳機，以點放方式好似除草咁樣，配合其它隊員將眼前觸手群一一掃低。

「收到！」
「roger！」





「等陣！」Alfa2代理隊長，即係原本Alfa小隊副隊長，
Alfa1嘅副手，決定反建議「俾sidearm同備彈我哋，一齊反攻！」

明明無幾耐之前先屁滾尿流咁要逃命…

「…Alfa2，你確定？」Alfa1望一望佢哋「…有無人有異議？」

…難得馬上有機會復仇，各人義憤填膺。

「檢查各人裝備，將備用電池同彈藥share用，快手爭取時間！」

「ok!」「roger！」

好彩佢哋每個人都盡可能多帶電池彈藥入嚟，甚至除咗本來標準長火短火各一，




全部換成一把MG42配FG42，左手護盾內側華瑟P38或毛瑟C96之外再多帶一兩把響腰同腿側袋，
再加上彈鏈供彈背包同身上面盡量帶到幾多就幾多嘅彈匣，
手榴彈以至Panzerfaust鐵拳單發反戰車榴彈，幾乎係平時兩到三倍火力，所以要分發都毫無困難，
甚至客觀嚟講係大大有利，整體戰力提升遠大於人數增加。

雖然五位早前被困嘅倖存者身上裝甲都殘破不堪，但只要活用隊形陣式互相掩護，
應該唔會有太大問題。

於是又一次，準備走出去嘅人又走返入嚟，仲要走得更入更深。

「知唔知巫女小姐響邊？」
「唔知呀…我哋淨係聽到佢把聲！」
「頭先都仲聽到，而家靜晒……」
「…唔…咁樣樣…」





「I Have a Bad Feeling About This...」

（……）

（…唔好理我…快啲走…）

（…快啲…出返去…如果唔係…）

（…就嚟唔切喇……）

（…）

…好可惜，千夜想對佢哋講嘅說話，並無順利咁傳達出去。

「…無辦法，一切準備妥當就衝落去！」





「roger！」

…另一方面，數公里外嘅裝甲指揮車裡面。

由於訊號干擾，進入地下坑道之後就再無任何手段連絡，
所以一切都係未可知，一旁嘅指揮官一籌莫展但又無可奈何。

「…呵…究竟趕唔趕得切呢？無論結果係點，都咁令人期待。」

就只有黑服一郎好似知道啲咩咁語焉不詳。

而副官冷眼望住呢一切，內心又盤算緊另一樣嘢。

［次回待續］