【已完結】【廣東話】《魔都姬神:退魔巫女千夜》(走甜健全作死日更小說企劃): 其之十八
其之十八
![](https://i.imgur.com/13gkQEb.png)
「魔狼芬尼爾…但係三個頭唔係地獄看門狗咩?」
「…係地獄守護犬…而且老子是狼唔係狗…」
「真正嘅魔狼芬尼爾…只有一個頭喔…神之黃昏嘅時候小妹就響現場親眼睇過……」
「?!」
「好喇…都係快啲郁手早啲解決呢件事罷啦…」
「…哼…想挑釁我?老子係唔會咁易…」狼王講講下發現千夜突然不知所蹤…
「…上當……」正當佢四處找尋千夜行蹤果陣,靈敏嘅嗅覺同聽覺話俾佢知…
…只見千夜繞到佢背後連環踢擊,所幸佢早一步發現有所防備,得以用雙手一一招架。
千夜身形嬌小,踢擊卻又快又狠,狼王大大隻滿身肌肉,一條手臂就粗過佢條腰,
但竟然只能僅僅擋下,甚至腳下一沉下盤得發力扎穩馬步免得裁個倒地冬瓜。
(…呢條嚫妹唔講得笑…)
一擊未能得手下千夜並無就此放棄,反而接二連三變招,特別活用身形靈巧又矮細,
專攻狼王身形高大難以防禦下路側擊嘅弱點。
但狼王都唔係等閒之輩,佢見招拆招之餘,速度上亦與千夜形成互角之勢,
甚至因為力量同體形具壓倒性,多番嘗試反守為攻,一時間拳來腳往,短兵交接,
鬥得難分難解。
「…睇唔出妳人仔細細咁有料到呀下!」
「…過獎!閣下牛高馬大但身手矯捷反應靈敏,完全不落下風!」
明明係誇獎但狼王聽落卻滿不是味兒,畢竟彈指之間過招逾百,
雙方體形差距之大有如大人打細路女,但苦無突破相反仲顯得處處受制,
咁字裡行間究竟仲係咪讚佢呢?
正所謂言者無心聽者有意,諗下想下就諗多咗。
一氣之下猛然發勁隔空震開對手,再稍稍拉開距離,兩手交疊伸出長長利爪,配合狼頭外形,
雙臂就好似惡狼忽然生出暴長利齒一樣,只聽得拳未到破風聲已尖嘯如狼嚎…
「看招!狼牙嵐風拳!」
一時間拳爪交織攻勢密不透風,爪如電至拳如雨下,千夜竟被逼退,
閃身後躍至十幾尺外。
「…退得快,退得好,竟然避過老子嘅初見殺…」
千夜摸摸衫袖裙擺,竟是不知不覺間已被劃破數道裂口,方才那怕是慢個半步遅疑一秒,
就難保非得血濺當場非死即傷。
「…不過想拉開距離都係無用嘅!」狼王一喝一震,全身鋼鎖鐵鏈應聲彈開,
只見隨雙臂揮動就似三道軟鞭,又如靈蛇一樣舞得虎虎生風,原來並非無用裝飾之物,
竟係獨門武器!
「一旦被老子嘅詛咒之鏈綁住,任妳插翼都難飛!接招啦!」
狼王見千夜無意接近,就將手中鋼鎖鐵鏈當成鞭一樣揮舞,不但奇快無比而且角度刁鑽,
叫人難以一一回避,其勢更似係銳不可當,千夜一避一閃再一退,卻仍難脫困,
更被迫得舉臂撥開,豈料鏈條就似有生命一樣,竟盤旋而上將伊人玉臂捲實。
「妳中計喇!」
狼王馬上揮動另外兩條鋼鏈,千夜一手被纏上無論速度身法都大受限制,險象環生,陷於劣勢。
「三重六道縛狼鎖!」
…狼王身上嘅鏈條裝飾其實係三條法寶,分別名為雷錠(Laeding),德洛米(Dromi)同格萊普尼爾(Gleipnir),
其意為「糾纏者」或「欺詐者」,乃係北歐神話中用於綁縛魔狼芬里爾的神器。
前兩者雖由鋼鐵打造,但最後都被芬里爾掙脫,
故諸神只好請弗雷的信使史基尼爾(Skirnir)去搵侏儒幫忙製造出最堅固嘅嘢去綁住佢,
於是就製作出由貓的腳步聲 (The sound of a cat's footfall),女人的鬍子 (The beard of a woman),
山的根 (The roots of a mountain),熊的肌腱 (The sinews of a bear),
魚的呼吸 (The breath of a fish)以及鳥的唾液 (The spittle of a bird)…
…等等六種不存在於世界上嘅原料而成,外觀比繩索還要細,比絲還要滑,但具有極其強大魔力,
即使是吞世魔狼芬里爾亦掙脫不開嘅最強套索。
…既然講到咁巴閉,咁千夜今次點收科呢?
[次回待續]