【已完結】【廣東話】《魔都姬神：退魔巫女千夜》（走甜健全作死日更小說企劃）: 其之十七

其之十七



羽蟲牙獸起勢攻，
巫女輕躍柔似弓，
迅足連蹴腳踢中，
瞬殺無影滿地紅。

妖魔群先是步步進逼，慢慢形成全方位的包圍，等靠近到一定距離，




就一口氣同時突擊施襲，任千夜再快本領再高強，也難以應付從四方八面而來的攻勢…
…就正如先前所講，S級退魔巫女被睇得太小…
補充一點，S級並唔係佢嘅S形身材亦唔係指S罩杯上圍，而係千夜真材實料嘅對魔戰鬥力…

而家響眼前係好幾十隻甚至可能上百嘅妖魔群包圍網。

左右各有一隻獸型妖魔，正面係隻長牛角和利齒嘅半獸半人，上方有翼蟲型妖魔在空中，
仲有後排不定型妖魔伸出鞭狀觸手響上五吋下五吋高度掃過嚟想乘亂偷襲…
但千夜一啲都無亂分寸好冷靜咁應對，
首先係輕輕一躍避過掃向小腿嘅觸手，同時響半空中分別踢出左旋踢同後旋踢，




將左右兩獸型妖魔踢飛，然後乘勢以上飛膝踢擊落空中的有翼蟲型妖魔，
最後在空中轉了一圈以踵落將正前方長牛角和利齒嘅半獸半人爆頭。

「疾風三連腳～爆碎重落下！」

前後不過幾秒就四殺確定，但妖魔群至少尚有好幾十隻可以前仆後繼。
於是千夜提氣運勁蓄勢待發。

「紅蓮亂舞旋風蹴！」





不到一秒之內連續踢出過百踢擊，而且每一腳都帶有千度烈火，就好似一道火龍捲一樣。
第一排就唔駛講，連帶後面嘅妖魔都走避不及被捲入去，旋即化為燃盡的碎塊。

於是，幾隻有耐火屬性帶火抗的精英怪擋在面前，硬食呢一下。
當然，千夜唔會只得一招。
強弩之極矢不能穿魯縞；衝風之末力不能漂鴻毛，既然招式已老就變招。

「霹靂紫電蒼雷震！」

千夜將一腳高舉過頭，只見陣陣電光集中起嚟，然後擺成馬步重重踏下，類似八極拳中的「震腳」。
以其為中心，一道道電光從腳下一環一環朝外擴散開去，妖魔先是觸電全身抽搐痙攣，
繼而被半空落雷轟散爆發，如是者妖魔群數量減半。

係，殺極都仲有一大半，因為真係好多好多隻響處。





「既然唔怕熱又電唔死，咁就涼快一下冷靜少少先啦！」

一陣詭異又突兀的靜音，在場所有妖魔突然在同一時間被凍結，動彈不得。
然後再下一秒，每一隻都成了無頭鬼呆立當場。

「瞬殺無音修羅首狩蹴」

千夜使出揉合凍氣與及極限高速嘅連續踢擊。中招者響毫無預兆毫不驚覺就被瞬間冷凍，
然後頭部，或者相當於頭部嘅地方，再被超高速腳踢猛擊粉碎，只有落得身首異處嘅下場。

「好喇，剩返你咋。」千夜望向遠方的暗處，笑笑口咁話。

…換來一陣沉默之後，緊接而來係震耳欲聾嘅猛獸咆哮。

響幽暗處一步一步行出嚟嘅，係一隻外形比之前見過更大更強壯，至少高三公尺以上，




穿著朋克風皮褸皮褲長筒靴，各處纏上鋼鎖鐵鏈，上身露出滿身肌肉嘅狼頭人。
同一般狼人，獸化人或者半人半獸最唔同嘅地方，係佢兩手手背或者話手腕部份，
竟然係狼頭形狀，左右手再加埋本身個頭身上就有三個狼頭。

「吞世末日魔狼王芬尼爾，在此候教！」

來者自號暫且不說，其名曰芬尼爾，乃出自北歐神話末世傳說「神之黃昏」裡面，
邪神洛基與女巨人安爾伯達的長子，張口能吞噬天地，殺敗阿斯格特主神奧丁嘅魔狼。

千夜注意到地面開始出現深到腳眼高度嘅積水，而空氣中亦彌漫著陣陣異臭。

（佢為咗封鎖牽制我嘅招式，預先破壞咗地下水管同瓦斯管線…）

於是乎，之前戰鬥用過火焰，雷電，以至凍氣，都被佢一一限制住，實力雖未可知，
但顯然並唔係單純「臉多就了不起」，而係真係有用腦。





不過千夜毫不畏懼，反而面露笑容，手中斬魔刀已準備隨時出鞘。

正是…

狼王怒哮千夜笑，
刀劍掩映雲耀嘯，
爪鐵刃牙交擊處，
生死勝負難分曉。

［次回待續］