【已完結】【廣東話】《魔都姬神：退魔巫女千夜》（走甜健全作死日更小說企劃）: 其之十九

其之十九



「三重六道縛狼鎖！」

眼見千夜左臂已被鎖鏈纏上，狼王未有掉以輕心，反而揮動剩下兩條鏈，針對行動已明顯受限嘅佢再下狠招，
要將佢五花大綁。

千夜並無往後退，反而借力打力，順應狼王拉動收緊之勢往衝前，以最小動作避過鏈條同時縮短距離，




甚至係直接拉近到面對面嘅程度。此一奇策正正出乎狼王意料之外，手中鏈條多番變陣但仍被千夜有可乖之機，
佢好似跳貼面舞咁以狼王為軸心邊繞圈邊自轉，同時翻滾甩開鎖鏈，使到狼王要不就放手，要不就被捲入，
反而成為被綁起的一邊。

（係真唔係，佢第一次見呢招就識穿咗知道點破法？！）

但狼王兩者都唔揀，而係選擇穩住下盤用蠻力拉扯抗衡迫千夜就範。

「嗯…原來如此，從死門入到生門出，一旦洞悉鎖鏈的運動慣性。先讀動作方向就能無效化。」





（…撞鬼咩！呢條𡃁妹仔點會咁快咁大力轉數仲快到兩三下手腳就解析出三道鎖鏈嘅軌跡…）

千夜開始用詭異的身法將狼王玩弄於股掌之中，只見佢以近乎肉眼看不清嘅速度，
巧妙咁一邊回避一邊解除枷鎖，如是者一來一往下，最後竟是狼王不敵其速度與技巧，
被千夜成功掙脫！

千夜手執已被甩開破解的一端，仲反過來要將狼王綁住，當然狼王既為王亦都唔係咩泛泛之輩，
馬上驚覺先手反制，如此一來一往互不退讓，二人各自拉緊鎖鏈僵持不下，就好似拔河咁樣。

「真不愧為狼王呢…」千夜笑笑口咁話。





「哼…妳都幾好嘢呀妹妹仔…」相反狼王係一臉認真，不敢大意，更一邊嘗試發力，但見千夜卻聞風不動。

「…之但係，小妹唔想花咁多時間……」

「…既然妳咁叻咁聰明，應該知道再打落去輸嘅係妳，不如咁啦，認輸投降老子答應會放妳一條生路…」

「蛤？」千夜側頭呆立。

「…認真唔係講笑，老子堂堂魔狼王講得出絕對做得到！妳咁後生身材又咁好，唔駛兩三年生返十隻八隻狼仔…」
…講到呢度佢對眼仲睥住千夜胸前突出之處咁話:「…分分鐘唔止英式足球隊，直頭成隊美式足球隊都得呀！」

（…如果我輸咗俾佢就大件事了……）

…千夜暗暗起誓定必全力以赴對佢絕不放水……





「…放心喎，咪睇老子外表咁狂野，內心對女仔好溫柔㗎！」狼王講到眉飛色舞咁，狼喎，王喎，
結果咪又係狗公一隻……

「…呃，我諗你真係諗多咗……」千夜都收起笑容咁話。

…而狼王見佢咁回應，其實都預咗。

「…老子貴為狼王，要嘅嘢會用力搶到手，無論妳想定唔想，肯定唔肯，最終結果係唔會有分別！」
…言畢，狼王運勁猛然一揮，兩道鎖鏈直指千夜，佢閃身避開兩道鎖鏈就好似有眼咁轉彎，當然，
呢樣其實係狼王使出用鞭技巧造成嘅效果啦。

「無論妳走去邊，走幾遠，響老子面前都係毫無意義！」狼王一再揮動就好似有生命一樣嘅縛狼鎖。

千夜心機一轉，反身衝向狼王。





「又係呢招！老子同妳講！係！無！用！嘅！」狼王面對千夜貼身，改用手上利爪迎戰，果不其然，
一時之間千夜似乎無晒辦法。

「拉遠就落入鎖鏈陣，貼身就被拳爪壓倒…」
「係呀！所以老子話妳輸梗喇！」
「小妹亦都話咗…」
「話咩？」
「…唔想再浪費時間……」

狼王正想理解千夜話中玄機果陣，忽然野獸嘅直覺，本能上感到極大危機。

…回個神來，卻發現手中鎖鏈竟然崩裂斷開。

但見千夜不知何時手中斬魔刀已然出鞘。





靈刃一閃聽不見
神鎖兩斷聞未言
彈指稲妻雲耀劍
無念無想無形戰

［次回待續］