【已完結】【廣東話】《魔都姬神：退魔巫女千夜》（走甜健全作死日更小說企劃）: 其之十四

其之十四

「Heartbeat Sensor…NO signal…」
「動態及熱能感知，無反應…」
「重力波探信儀，無回波…」

「目測，無發現…CLEAR！」
「…又係成層樓都無半隻…」
「…正所謂唔見嘢唔好搵，唔好炆…」
「…咪唱啦…」





到達地面前，妖魔們似乎感知到動靜，並未有分散襲擊。
而係集結響一樓到地面之間嘅樓層，因為果處構造上無法由二樓或以上進行射擊，
且地形上有各種樑柱同崩落瓦礫水泥塊之類嘅死角位置，
令人類方難以集中火力進行壓制，甚至可能因為人數被迫分散隊形而被逐一擊破。

只係現在同之前突入時最大分別，就係有退魔巫女神樂千夜響其中。
咁就足令結果完全唔一樣…

「好，點搞？彈藥唔夠，火力不足，雖然醫返傷好但裝備破損壞掉過半。」




「嗯…我建議將主要火力集中響側翼同後方，前面由兩三位先鋒作矛頭佯攻…」
「…我意見係…巫女小姐，妳點睇？」



「咦咦…」千夜諗咗陣，最後係話「等我打頭陣，你哋跟住趁機衝落地面。」
「……」
「…？」
「…嗯？」
「…然後呢？」




…嚟到呢一刻千夜先意會到大家等緊佢。
「…哎…小…小妹意見係…嗯…就係咁多……」
「……」
（…咁…會唔會好大問題…）
（…不如話…有無人會覺得無問題…）
（阿…即係咁…我覺得呢…）
（…阿頭你話事啦…）
（…就跟巫女小姐講咁做就得…）
（…哦……吓？！）
（你…認真…！？）

畢竟直到呢個時候，當中仍然只有三個人睇過千夜係點樣戰鬥。

「好喇，爭取時間，無謂多講！」





「巫女小姐，你準備好未？」

「我隨時都得，大家又準備好未？」

「OK，STAND BY READY!」

「ROGER!」

「3,2,1!」

「Go,GO,GO！ROCK & ROLL～」

各人行動迅速。

人快，子彈更快。





之但係，都不及巫女咁快。

「流星蹴～」

…人隨聲而至，瞬雷不及掩耳，其身影就一如流星劃過夜空。

驟眼看架式就好似只係好快好快好很快嘅「飛腳（跳び蹴り/とびげり）」，
但快狠準咁命中行最頭嘅妖魔，只見超過兩公尺高渾身肌肉嘅半獸半人，
一腳就踢爆…

…唔係誇張修辭，而係名符其實咁被一腳踢到腰以上爆開，
好似炮彈打中咁，最大塊嘅碎片都細過手掌，
而且千夜早利用反動成個人跳開咗，完全唔會沾到屍塊血水。
…就響任何人都無可能俾得切反應嘅時間裡面，千夜已經連環踢出好幾腳，




將目視範圍內見到嘅妖魔打爆晒。
再補充一次，真係物理上爆開。

…俾你知道，力量大到無譜，隨時可以飛到百丈咁高（遠）

注：識唱就唱出嚟

［次回待續］