【已完結】【廣東話】《魔都姬神:退魔巫女千夜》(走甜健全作死日更小說企劃): 其之十三
其之十三
![](https://i.imgur.com/q5ugyx1.png)
神樂千夜身為退魔巫女,除咗「退魔」,
「巫女」本職的問卦祈福,
消災解難,淨化除靈,奉神祭祀之外,
同先人逝者溝通作為現世與常世的橋樑都係佢工作。
(呢邊呀…巫女小姐…)
「?!」
(呢邊呀…)
「…做咩事呀巫女小姐?」
(…係呀…係呢度喇…)
「…係咪有咩發現呀?」
(…唔好意思呀,麻煩到妳…)
「唔好咁講啦…係我嚟遲咗就真…」
(…請代我同班兄弟講聲,對唔住呀,我要行先一步退伍喇…)
「…等陣呀…請直接同佢哋講…」
只見千夜取出紙符…口中念念有詞,
「其魂未歸於天,此魄猶存於地,身存以靈,心繫於世,求此顯現,急急如律令!」
然後各人見到本來空無一物嘅地方,忽然閃現出Echo9淡淡身影,只見佢揮揮手之後立正再擺咗個敬禮。
(別了,兄弟們,他朝響英靈殿上再聚…)
…然後慢慢消失。
「…你…聽唔聽到呀…」
「…唔止聽到,仲睇到…」
「…我估你哋都一樣下可?」
「Echo9確認KIA(KILL IN ACTION 行動中殉職)」
響Echo9身影出現嘅地方,除咗一灘熔化金屬混和響完全玻璃化嘅瓦礫碎片之中,
就只有一片俗稱狗牌嘅軍藉牌奇跡地完好無缺。
雖然只有短短一瞬間,但特製遲延性超高溫廣域燃燒彈中心點——大約一到兩公尺——
相當於太陽表面溫度,就算係月神二號工場無重力加工精製嘅單晶陶鋼耐彈板,
都會好似糖咁熔化成液體,而任何生物有機體,幾乎係完全氣化連渣都唔會有剩。
唯獨是不存在於地表上嘅永恆金屬,一塊唔夠一毫米厚得半張卡片面積。
比同重量白金貴一萬倍嘅超物質奧理哈康,能夠保存。
由於除咗特殊加工能令佢改變外形之外,任何物理,化學,溫度,都唔會令佢產生變化,
所以傳說響地底世界係製成頸鏈吊墜作為情侶訂情信物,因為即使地球毀滅,
人類文明消失,佢都仍然存在。
千夜拎起佢交俾Echo1。
作為職業而且專業軍事紀律部隊,仍然響行動中所以無時間亦唔可能再做多餘嘅事,
一行人就繼續保持警戒,以地面為目標向下層推進。
誠既勇兮又以武,終剛強兮不可凌。
身既死兮神以靈,魂魄毅兮爲鬼雄。(——《楚辭》九歌:國殤)
注:現代軍藉牌分為一式兩片同一片但有易拆構造可輕易折成兩片呢兩種主流設計,而響呢度出現嘅係後者。
正常係用繩或者金屬鏈扣響身,而響故事裡面呢個情況,無論邊種都係一樣無可能保留到。
[次回待續]