命中注定我與妳?: 45. 約會

係約定時間前15分鐘，我企係嘉儀屋企對面嘅地鐵站出口到等佢
 
一向我都係早15分鐘到達，就係我等左10分鐘後，嘉儀係佢屋企嘅大廈出黎
 
「咁早呀你?」佢用一貫陽光笑臉同我講
 
「係呀，約左妳丫嘛」
 
「賣口乖」
 




我地兩個笑嘻嘻咁望住對方，果一刻我真係當嘉儀係我女朋友
 
當時我地兩個，並冇留意到，有條鯊魚正慢慢向我地游過黎
 
就係嘉儀想捉住我隻手臂之際，大白鯊向我地發動攻勢
 
「喂，你地兩個，去邊到呀?」
 
聽到呢把聲，我地都毛管戙，差在未流冷汗
 




「姑姐…」「Miss Cheung…」
 
姑姐望一望我地兩個，個瞄不停咁轉。我有d怕佢會同慧思講
 
我地就好似一對獵物咁，任大白鯊魚肉。我有d心虛咁望住姑姐
 
「放心喎，我唔會同其他人講喎」
 
「係…係…」
 




「總之浩翹你呢，要送嘉儀返屋企就得」
 
「知道」
 
「咁你地玩得開心d啦」姑姐講完呢句就游走左
 
嘉儀嘆左一大口氣，個人立即放鬆哂
 
「好緊張?」
 
「大白鯊喎點會唔緊張，差d出哂冷汗」
 
望一望返嘉儀佢今日著t shirt外仲有條短裙同波鞋，散發出青春氣息
 
我搣一搣佢塊面「妳呀，真係好怕姑姐」




 
「乜野喎!大白鯊嘛!當然驚啦!我同佢有少少牙齒印」
 
嘩!!咩事咁大膽呀?同姑姐有牙齒印?「妳搞咩槓上左姑姐呀?」
 
「哦…果時呀?係我升中果陣本來唔係派去英華架」
 
「咁妳派去邊間?」
 
「真光，大坑道真光」
 
大坑真光，咪即係慧思果間中學?
 
「果時我自行收生階段果時揀左真光，係我註冊後一日，校長打去我屋企」
 




「婆婆搵妳?」
 
嘉儀點一點頭「係呀，佢親自邀請我黎英華到讀仲保證我成績唔會差，所以媽咪考慮都冇考慮就接受左」
 
「咁點解當初妳自行收生唔揀英華?」
 
「唔….對自己冇信心掛」
 
「但果時英華仲有位咩?」
 
「果時….係家琪姐講我知…」嘉儀面上出現少少難色
 
「係咩呀?」
 
嘉儀望一望我講「家琪姐話…校長用佢自己唯一嘅孫女..同真光將我交換過黎…」




 
校長個孫女…即係…
 
「即係…」
 
「冇錯，用大白鯊個女交換我」
 
「果時…佢應該係自己收生已經俾英華收左」
 
「係呀，佢係我註冊果日早我一步，返英華拎左註冊證走」
 
「唔…通常註冊果日姑姐會企係學校入邊架喎」
 
「係呀就由果日開始，家琪姐叫我上堂就要乖乖地，唔好俾大白鯊咬中」
 




原來就係佢…嘉儀的確係有過人之處，所以婆婆先用慧思黎交換
 
「今日去邊到好呢…」我拎部電話出黎睇，然後嘉儀伸個頭過黎
 
原來佢一早諗好左想去邊