命中注定我與妳?: 44. 孭上身

自從bbq後，嘉怡同我好似冇變生過任何事咁
 
我地仍然會約出黎溫下書，夜晚係網上傾下計咁。當然!!我都有要求嘉怡幫我做少少野嘅
 
係自修室內，佢係到做緊我學校果d暑期功課
 
「做咩你份功課做完又做嘅?仲要我幫你做多次?」嘉怡有D唔明白我嘅用意
 
「其實咪當溫書囉，功課做多D又唔會死嘅」
 




「唔係喎，你真係做好多份喎，你唔會係果D要係考試測驗先搵到自己存在嘅人黎架?」
 
「即係咁…其實呢…我呢D係生意黎」
 
「生意?」
 
「係呀…妳地學校暑假補課，媽咪會檢查妳地有冇做功課丫嘛」
 
「你地學校唔會咩?」
 




「傻啦，邊有人得閒會理D老師。所以係暑假完結前，大家都會好努力咁分工合作」
 
「抄功課咋?」
 
「係呢個時候，拎一份做好哂嘅功課，賣到幾百蚊架」
 
嘉怡聽到我係搵佢幫手搵錢果時，佢要求分錢
 
「喂喂，我有幫你手做架喎」
 




「咁妳想點?分錢?」
 
「一係咁囉，你請我食飯當人工囉」
 
嘩，呢位小姐要我請佢食飯呀
 
「請食飯咋?」
 
「你想嘅可以送埋野俾我架」
 
今次，我應該遇上對手…
 
嘉怡不愧係媽咪手上得意學生，佢好快幫我手做好份功課
 
時間差唔多，我地離開自修室




 
基於風度，我每一次都會送嘉怡返屋企
 
正當我地出自修室果時…佢對涼難鞋爛左
 
「呀…對鞋爛左添…」嘉怡單腳企係到幾狼狽下，不過我就咁睇佢又幾得意
 
「咁呀…妳單腳跳返屋企囉」
 
「乜你咁架」嘉怡扁哂咀咁
 
「一係我孭妳返去啦」
 
「你孭我?你唔怕我重咩?」
 




我連家姐都孭得起，妳?
 
「上黎啦，我得架」
 
「哦…咁你…小心D」
 
嘉怡佢好怕羞咁上去我背後，我一雙手一掂先記得，佢今日係著短褲
 
「仲唔行?」嘉怡面紅紅咁催我行
 
我地兩個就咁係街到行，咁樣唔係辦法
 
所以我就孭住佢去商場，進行鞋舖同佢買對新鞋
 
嘉怡買野非常爽快，佢好快手買左對新涼鞋，立即著上腳




 
「好啦，唔洗俾你個色狼抽水啦」
 
其實嘉怡佢皮膚都真係幾滑嘅
 
「我邊有抽妳水呀」
 
「我唔理呀，摸過我，要請我食野架」
 
其實佢D屈功係唔係來自姑姐呢?
 
「好啦好啦，我約妳去街啦，滿意嘛?」
 
嘉怡真係冇諗過我會主動約佢去街，所以佢冇考慮就應承左我
 




不過去邊度呢?就由嘉怡佢話事
 
幾驚要我諗呀真係
 
「咁妳想幾時食飯?係邊度食?日本野定西餐?」
 
嘉怡兩隻眼碌一碌，諗一諗
 
「你平時…同佢去邊到食飯?」
 
「佢?」
 
「係呀，佢呀」
 
「邊個佢呀?」我果一刻仲未Load到嘉怡講咩
 
「你個女神囉」
 
女神?
 
「我女神係家琪姐喎，咁我同親佢食飯又有阿哥係到…」
 
「唔係呀，我係指你…心入邊…呀…你明啦」
 
原來嘉怡講嘅係慧思…
 
「哦…冇定架喎」因為我地兩個好少一齊去街食飯
 
「咁好啦，我話事啦」
 
係囉，妳地d女仔話事咪仲好
 
到左約定日子嘅前一晚，我先同媽咪講我約左嘉儀嘅事
 
「媽咪呀….我呢…」對住媽咪，我永遠逃唔出佢雙眼
 
此時此刻嘅佢，係到睇緊科學文章
 
雖然媽咪只係中學教師，但係佢係讀書上，真係好犀利。即係佢畢左業咁多年，佢都依然不停增加自己知識。每一期嘅科學期刊同埋TIME，佢都會拎黎睇
 
就係咁樣，佢慢慢感染我地三姐弟。我地三個自細就好鍾意睇書，呢個係媽咪教我地，而爸爸呢?就係負責教壞我地
 
「咩事呀浩翹?」
 
「媽咪…我聽晚約左朋友去街，所以…」
 
「所以你唔係屋企食飯，冇問題呀」
 
「係…」
 
正當我轉身返入房時，媽咪先黎個大踢爆
 
「咁你記得幫我送嘉儀返屋企喎」
 
聽到嘉儀個名果時，我個心都離一離、嚇一嚇
 
「下….」
 
媽咪用一下眼光望過黎「你聽日約左孫嘉儀去街係唔係?」
 
俾媽咪咁問一問，我都唔知點答佢好。不過唔洗呃佢，佢一早就知
 
「呀…係….我約左嘉儀…咁即係呢….」
 
媽咪聽到後繼續睇期刊「總之你地乖乖地，我就冇問題」
 
「係…」
 
媽咪嘅意思係唔係，我可以好似阿哥咁，同佢嘅學生拍拖?