命中注定我與妳?: 43. 表白

我地燒完野食，我同嘉怡兩個人返屋企，因為我係一早應承左佢
 
不過女仔又點會咁容易話飽丫
 
真係冇俾我估錯，嘉怡佢話想去食糖水
 
其實女仔係咪真係有兩個胃嘅呢?點解教科書冇教?
 
係行去糖水舖嘅路上，我地兩個都行得比較近，感覺上就好似慧思同我平日行街一樣
 




係店內，嘉怡叫左個香蕉船(佢又敢食先好野，香蕉船真係幾肥下)
 
我呢?我就叫左鮮什果涼粉，清一清D熱氣
 
我地食完糖水後，慢慢行返去嘉怡屋企
 
「係喎Clodulf…其實你…」
 
「咩?」
 




「其實你有冇心上人架?」嘉怡佢面紅紅咁問我，既然佢咁樣豁出去問，就只會有一個情況
 
佢對我有意思
 
話我對佢冇好感就係呃人嘅，佢係家琪姐姐後，英華最受矚目嘅學生
 
而且又靚女，又好人
 
「呀…有」
 




「咁……佢有咩特徵?係唔係我地學校嘅?」
 
「我同阿哥一樣….都鍾意女仔著長衫校服…」我咁樣講，嘉怡佢好似更加面紅咁樣
 
「不過佢唔係英華嘅學生」然後佢就跌落深淵，不過佢仍然保持冷靜
 
「咁…你同佢點識?」
 
「佢嘛….係我有記憶..係我BB果時，我已經記得佢」
 
「咁會唔會係你…」
 
「我唔會記錯，因為…佢係我就過身果時，係我身邊出現」
 
「你點會就過身?」嘉怡唔明白我講咩




 
「當日我係英華出世後非常虛弱…..我出世頭幾個月都係醫院…有一日，有個BB女入左去我個氧氣箱捉實我隻手…之後就…」
 
「就係咁?」
 
我點一點頭
 
「仲有呢?」嘉怡繼續追問
 
「佢會扎一對孖辮…呀…即係媽咪佢地年代果款..妳明啦」
 
「我知道」
 
「咁…所以…」
 




「你一定要揀佢?可能有其他女仔更加啱你呢」
 
「唔…我明白….但係暫時都係….」
 
我咁講後，嘉怡快一步講野
 
「得…我明」
 
佢背住我，好似喊緊咁樣
 
死啦，慧思都冇係我面前試過咁樣正當我諗緊點收科果時，嘉怡再轉過身對住我
 
佢走到我面前
 
快步錫左我一下，我係糊里糊塗之下，接受左佢呢一吻




 
我地兩個分開後，嘉怡望住我
 
「唔洗我講啦….你都已經知道…」
 
「我知…但係….」
 
「我唔會放棄架，我要同佢爭一次」
 
「不過嘉怡….」
 
「幸福要靠自己爭取」佢笑住同我講後，再一次錫過黎
 
今次，我好似成個人飄起左咁樣。我感覺到….嘉怡佢用雙手攬實我
 




唔知經過幾耐時間之後，我地兩個咀慢慢分開
 
「拜拜」嘉怡佢怕怕羞羞咁返左佢住果座大廈
 
而我就傻傻下咁企左係到
 
突然嘉怡再伸個頭出黎
 
「我唔會咁易放棄架」然後再展露佢嘅笑容
 
而我，就呆呆咁企係原地，唔知過左幾耐，我先識得開始返屋企
 
咩話?我剛先同嘉怡kiss左?死啦…媽咪叫我照顧嘉怡…但係而家搞d咁嘅野出黎…
 
糊里糊塗下，我返左屋企坐係到
 
果時發覺，阿哥同家琪姐返左黎
 
我心諗，究竟我會唔會好似阿哥同爸爸咁樣，係同一間女校入邊，找尋自己嘅幸福?
 
嘉怡同慧思相比，真係贏九條街….樣同身材、才華都係…
 
我同慧思近年由親密，到疏遠，再到今日咁，我地兩個真係似兄妹多過似朋友
 
最重要係…佢仍然叫我做哥哥
 
我要開始轉變目標丫……定係繼續同慧思保持關係呢….