命中注定我與妳?: 28. 送她返屋企

媽咪宣佈落堂果時，順便行過黎
 
「點呀?你跟我同姑姐返屋企定係自己返去呀?」
 
「我自己返去得啦」
 
「早D返屋企呀」
 
「知道」
 




媽咪離開左課室之後，我遞D notes俾嘉怡
 
「拿，我應承俾妳嘅野」
 
嘉怡接過Notes，微笑咁對住我
 
「你send俾我咪得囉，唔洗專登拎黎俾我呀」
 
「係囉，唔知點解我會咁蠢呢?」
 




嘉怡望住我笑得好開心，之後我送佢返屋企
 
「妳住邊呀?」
 
「我住堅尼地城」
 
「咁行啦」
 
「你又係咩?」
 




「係呀，我住新海皮果邊，妳呢?」
 
「山邊囉」
 
「咁一齊行啦」
 
我地兩個一齊搭巴士，果個場面就應該係似幾年前阿哥同家琪姐姐咁樣
 
「喂喂，你黎搵我，唔洗陪女朋友咩?」
 
「我都冇拍拖」
 
「真係?」
 
「呃妳做咩?」




 
「係唔係Miss Lam唔俾?」
 
「咁又唔會喎，家姐F.5拍拖，阿哥F.4拍拖，佢都冇意見」
 
「咁開明嘅?」
 
「因為佢都係F.6果時同爸爸拍拖囉。咁妳呢?」
 
「我?我未拍過拖呀….屋企都唔俾…」
 
「妳屋企好嚴?」
 
「係架，一陣俾屋企人見到你送我嘅話都唔知點啦」
 




「妳係獨生女咩?佢地咁緊張妳」
 
「係呀，不過你唔好以為獨生女就好似公主咁呀」
 
「妳都唔似獨生女，一D公主病都冇」
 
「你咁叫讚我呀?」佢笑住咁講
 
「暫時，暫時呀，未見到妳有脾氣嘛」
 
「嘩，聽你咁講，獨生女就一定會發脾氣咁喎」
 
咁當然啦，慧思脾氣都唔細架
 
「我問妳丫，大白鯊脾氣大唔大丫」




 
「佢一定大啦，仲要係校長個獨生女」
 
「係囉，佢個女脾氣都唔細架」
 
「係喎，講起大白鯊個女，有傳聞佢係我地學校學生，其實係唔係呀?」
 
技術上，都可以算係嘅
 
「呢個問題呢，我就唔可以答啦」
 
「點解呀?」
 
「因為姑姐想低調D，想好好保護個女」
 




「大白鯊只係得一個女?」
 
「係呀」
 
「佢點嘅樣架」
 
「點呀?咪好似姑姐囉，特別係著起校服扎埋孖辮個樣，真係一模一樣」
 
「呀…估唔到你都唔肯幫我地解開大白鯊最大謎團」
 
「咁都要留返少少野俾姑姐嘅」
 
不知不覺，我同嘉怡去到佢屋企樓下
 
「我到啦….呀…」
 
「咩事?」
 
「開放日果日…你會唔會黎呀?」
 
「冇問題呀」
 
「咁我果日等你架啦」
 
「一言為定」
 
送左嘉怡返屋企，我慢慢行返去海皮，突然背後俾人一拍
 
「喂!阿哥」
 
「點呀慧思，而家先放學嘅?」
 
「要補課呀，你呢?」
 
「我剛剛去完英華，送左媽咪個學生返屋企囉」
 
「呵呵，學人識女仔啦」佢聲音好似有D潤我咁樣
 
「妳不滿呀?」我笑住同佢講
 
「係呀，我不滿呀!所以而家你最好同我去買糖水等我食完飯食」講完，佢捉實我去糖水舖