命中注定我與妳?: 27. 乜咁啱嘅?

「hi…又係你地呀?」
 
佢率先開口講野
 
「妳冇事嘛?」
 
「冇…冇….唔該哂你」
 
係佢面紅紅果時，有佢d同學出黎
 




「喂!你地班queen屎仔撞到人唔識道歉架?」
 
「妳喂…佢冇心架…唔好咁啦….對唔住呀…我d同學係咁粗魯」
 
「唔緊要呀，係佢地唔啱先」我指住後邊班畜牲
 
「妹妹，麻煩妳10蚊丫」
 
係佢俾錢時，我搶先一步幫佢俾埋
 




「咦?」
 
「就當係我道歉啦，一陣俾我個妹知道我蝦佢d同學，我死都似」
 
「妹妹?同我地同校?」
 
「係呀，我契妹」
 
「佢叫咩名?」
 




「唔好提佢啦，佢唔係太想咁多人知道」
 
「冇所謂啦，不過唔該哂你先」
 
「走先啦，拜~」
 
我地成班一齊行返皇仁
 
「D你班陳庭佳!搞到我咁瘀，俾班女鬧」
 
「鬼叫你唔分D女出黎呀」
 
「喂快D返去啦!!!就上堂啦」
 
飯後係連續兩堂通識堂，絕對係補眠最好嘅時間




 
係通識堂瞓覺，絕對係我地三姊弟嘅傳統
 
D老師又吹我地唔漲
 
終於到放學時間
 
我拎住D notes搭車去英華女校，因為尋晚我問過媽咪，今日佢果班要補課
 
我自己已經好多次一個人坐巴士去英華，落車後，我直接行入去
 
有好多學生望住我，佢地可能好奇點解有男仔夠膽走入結界
 
果然不出所料，我我行入去唔夠10步，已經有海洋生物游過黎
 




「喂!做咩放學唔立即返屋企呀!」
 
「姑姐?我拎野俾媽咪d學生喎」
 
「你唔識叫媽咪幫你拎俾人咩?」姑姐望我嘅眼神好奸
 
然後我就開始心虛，冇錯，我的確可以叫媽咪幫我拎notes俾嘉怡
 
不過我又想望下女仔，所以….
 
「你呀!浩翹呀!學埋你阿哥d野呀，果陣佢又係咁入黎搵家琪」
 
「咁…姑姐我入得去未?」
 
「過幾日開放日你黎唔黎呀?」




 
「唔知呀，慧思呢?」
 
「佢唔黎啦，家琪畢左業後佢都冇咩點黎。你去媽咪到好啦，唔好周圍走呀」
 
「知啦」
 
我一個男仔係英華到行，受到好多奇異目光
 
行到去4D班，媽咪佢幫自己班補緊課
 
係窗口中，嘉怡發現左我，佢不停偷望我
 
終於係佢偷望我果時，俾媽咪發現左，佢亦都開門捉我入黎
 




「浩翹，你上黎做咩呀?」
 
係果時，好多同學伸高個頭出黎望
 
「哦…我拎野俾Winnie架」
 
我交左份notes俾媽咪，佢睇一睇「係你地皇仁d notes喎，但係點解得一份?我果班40人喎」
 
「咁…係Winnie自己想要」
 
媽咪望一望我，再用notes拍落我個頭到
 
「俾慧思知道實殺左你，有冇見到姑姐呀?」
 
「有呀，佢放我入黎架」
 
「咁既然你都黎到….」
 
「啊!我去食薯片得啦」果下我已經心知不妙
 
「你入埋黎啦」
 
「入埋黎?我返屋企算啦」
 
「入黎上堂啦，唔上就扣零用錢」
 
就係咁，我入左去4D班補課
 
我坐係最尾嘅位到，第一次入女校上堂
 
不過媽咪講解D野又真係好易明白嘅，好快到左落堂
 
我坐到腰都痛，係女校上堂，唔可以好似我係皇仁咁款，我要斯文同靜D
 
真係好辛苦架