命中注定我與妳?: 29. 想我接她放學

「點呀?又食幻彩明珠?」我拖住慧思係糖水舖前問佢
 
「哈，你真係好瞭解我」
 
每一次我同慧思一齊返屋企，有一樣野我一定會做，就係幫佢拎書包
 
而佢就會捉實我隻手一齊行返去
 
「妳地咁快開始補課?」
 




「唉，history Miss話怕教唔哂，所以好快就訂下補課時間表」
 
佢個樣苦過苦瓜乾
 
「做咩呀?好唔願咁嘅?」
 
「有邊個想放左學仲要補課丫，我差唔多日日都要遲返屋企呀」
 
「妳日日都有野做?」
 




「星期一同三要補課，星期五集會，基本上隔日就要遲返，好攰架」
 
「可能妳遲d星期一至五都會遲返呢」
 
「嘩!我叉住你呀!!!點解你又好似唔洗補課咁架」
 
「我地都要嘅，不過間唔中囉，但係小測多」
 
「你呀你呀你呀!!!!」慧思不停用佢對孖辮揈我
 




「做咩事呀?」
 
「又唔陪我」佢撓埋雙手扁咀
 
「妳想我點陪妳?」
 
「至少都陪下我放學丫」
 
「真係咁想?」
 
佢鼓起泡腮低頭望住我「咁有d同學有男朋友接嘛……我又冇男朋友」
 
「妳冇男朋友有咩問題?」
 
「咁…我都想俾男仔接下放學…」




 
哦~呢個小妹妹都想係同學面前展示下自己少女嘅一面
 
「咁妳F2開始咁多活動，我而家點接妳呢?」
 
「黎啦…一齊返屋企啦，好啦」
 
「怕左妳啦，我係百佳等妳?定係starbucks?」
 
「starbucks囉」
 
返到屋企，我地拎住糖水入廚房就係等食完晚飯果時食
 
我地拎出糖水係大廳到食
 




「浩翹，星期六你有冇時間?」
 
「呀….約左人喎」
 
「咁算啦，我仲想叫你去幫我果班手添」
 
「媽咪呀…其實我就係約左妳果班D學生我聽日同妳一齊返工?」
 
慧思聽到我咁講，突然間我Feel到有陣煞氣
 
媽咪行開後，慧思就用腳踢我
 
「做咩呀」
 
然後再用腳趾夾我d肉




 
「喂喂喂…」
 
「你好呀!去英華識女仔」
 
「呵呵!妳呷醋呀?」
 
「呷你個死人頭呀!原來平時唔接我放學，係因為要識英華妹」
 
「嘩!妳講到我專登去瞭女仔咁嘅?」
 
「唔係咩!?又唔見你上黎識我d同學?」
 
「咁除左妳，我都識一個嘅」
 




「你幾時識到我d同學呀?」
 
「唔…我都唔算識嘅，有次幫佢係百佳拎野，又有次影印果時撞到佢囉，就係咁咋」
 
「佢Form幾先?」慧思開始對佢同學有興趣
 
「F.4，應該係理科班，我見佢影chem notes」
 
「唔…等我調查下先」
 
係慧思考慮調查果時，我拎左佢一粒士多啤梨走
 
「喂!!!!你想食就自己去廚房洗啦!!!白士多啤梨好少咋」
 
我將口中一半士多啤梨螺出黎
 
「食唔食?」
 
「怕你呀?!」慧思一啖食哂