男男路: 不可改變你那壞習慣
不可改變你那壞習慣
又是一個上班日，阿瞳又再次壓哨打卡回到公司，這是他每日的習慣，始終其他人不了解他的事，與其要花時間解釋最後無結果，倒不如直接減少相處時間，降低被問被認識的風險，同事只談工事好了。
「阿瞳，今日有個新同事，你幫我帶住佢。」老闆Frank少說。
「吓？揾我？好似Gordon好啲，佢資深啲，又同其他同事熟啲。」阿瞳指着坐在後面正在吃早餐的男同事，亦即是上次邀請他一起午餐的那位。
「你知我決定咗就唔會變㗎可？」Frank少轉身返回老闆室時說，然後在門前轉身對着阿瞳說︰「我叫得你做，你就一定會做得好！」語畢便返回房內。
「唉，麻鬼煩，又要同人打交道。」阿瞳心裡想，但他亦深知Frank少決定好的事便不會改，而且每次都是最好的決定。
「老闆將個新仔交畀52Hz鯨魚，個新仔應該會好快quit。」遠處傳來一位男同事說。
「可能會train到同佢一樣咁自閉。」另一男同事亦補充。
「喂，你哋唔好咁口賤啦。」一位剛好路過的女同事加入對話︰「個新仔自然識埋堆㗎啦。」
「唔好講咁多八卦，開工做嘢啦。」剛好吃完早餐的Gordon訓斥他們，然後行身走向阿瞳方向，搭着他的膊頭友善的說︰「第一次帶新人唔駛緊張，有咩唔明問我就得，嗰時我都係咁帶你，你係我第一個帶嘅新人。」
阿瞳看着Gordon，並沒有說話，只是點了點頭便繼續工作，直到新人到達。
「大家好，我係今日第一日返工嘅阿滔，多多指教。」一把響亮的聲音打破了公司的沉寂，吸引了眾人的目光，除了阿瞳，他只覺得是大難臨頭，因為此人跟他的性格南轅北轍。
正宗九十度鞠躬後，阿滔問︰「老闆叫我返到嚟就揾阿瞳，請問邊位係阿瞳？」大家立即伸手指向已經想鑽進洞的阿瞳。
阿滔循着大家指的方向看過去，卻看不到人，於是問︰「佢行開咗？」
「哈哈哈哈……」一輪嘲笑聲後，其中一位男同事說︰「唔係啦，佢驚到趴咗喺度喳，你行過去就見到佢。」
阿滔沿着大伙指的方向行去，果然看到伏在桌上的阿瞳。認真看，阿瞳其實不是伏在桌上，而是正在找筆記。
「嗨，你好，我叫阿滔，以後要麻煩你教我喇。」阿滔很有禮貌的介紹自己，有禮貌的程度令人覺得他是假裝出來的。
阿瞳「嗯」了一聲作回應，便把一疊筆記交到阿滔手上，並且說︰「公司基本運作，各樣規矩，唔同嘅注意事項都喺哂度，你睇熟佢基本就可以喺度生存。」
阿滔接過筆記後，便回他的座位坐下，仔細閱讀。而那些好事之徒亦時刻留意着他倆的動態，隨時準備嘲諷阿瞳。
終於好不容易熬到午飯時間，Gordon再次邀請阿瞳一起吃午飯，但不出所料被拒絕。
「算罷啦，隻52Hz鯨魚唔會出㗎啦，我哋自己去食啦。喂，新仔，一齊食飯，等我哋教你多啲嘢。」某男同事說。
「係囉，一齊啦新仔，一齊食飯快啲融入到我哋個大家庭。」另一位男同事說。
如是者，阿滔半推半就的跟他們去了吃午飯，公司只餘下阿瞳和Frank少。
平時Frank少在早上十一時前便會離開公司，但今天卻例外，可能是因為有新同事的緣故，所以當他離開房間打算去吃午飯時，便與阿瞳在公司撞個正着。
「阿瞳，點解你仲唔去食lunch？」Frank少問。
「我自己帶咗飯，而家叮緊。」阿瞳指着茶水間的微波爐。
「做咩食隔夜飯？好多嘢做，無時間出去食咩？」Frank少繼續問。
「唔係，不過我慣咗自己食。」阿瞳回答道。
「好，咁今日跟我出去食。」Frank少命令道，之後徑自往門口走去。
「唔駛喇，我自己食就得。」阿瞳堅決拒絕。
「你知我決定咗嘅嘢係唔會改㗎可？唔好要我講第二次。」Frank少在門前對依然站在原地的阿瞳說，他強硬的態度和凌人的氣勢完完全全震懾着阿瞳，使他不能拒絕，最終還是就範。
鮮有出街吃午飯的阿瞳完全不知道附近有什麼餐廳，只好緊跟着Frank少在大街小巷中左穿右插，最終去到一間其貌不揚的小店前，這間小店裝修殘舊，看得出已經很有歷史，但店內卻人頭湧湧，座無虛席。
「Frank少，今日帶埋新朋友嚟？嚟嚟嚟，留咗個V.I.P.位畀你。」老闆娘看到Frank少便熱情的招待，看得出Frank少是常客。
「咁客氣呀老闆娘，照舊唔該。」Frank少未坐下便已經下單，然後再介紹︰「阿瞳，呢度最出名就係芝士撈丁，未喺度食過都唔好話自己食過芝士撈丁。」
「哦，咁芝士撈丁唔該。」對餐廳完全陌生的阿瞳聽從Frank少意見。
「你齋麵？揀埋食咩餸啦。」Frank少笑說。
「吓？哦……」阿瞳尷尬得滿臉通紅，連忙拿起餐牌遮着臉，看了一會然後說︰「墨丸唔該。」
「果然識貨，呢度啲墨丸最好食，我次次嚟都係食佢。」這是阿瞳第一次看到Frank少稱讚別人。想不到在公司嚴肅正經的Frank少，在公司外竟然如此可親無架子，這反差對阿瞳來說也實在太大。
「點解你成日都自己一個？知唔知啲同事私底下點叫你？」Frank少突然又嚴肅起來。
「佢哋私底下點叫我都無所謂，唔啱傾無謂要我夾硬迎合佢哋，大家都只係同事，公事做得到就得。」阿瞳不屑道。
「哈哈，好，我就係鍾意你呢種態度。」Frank少大喜，再說︰「我叫阿滔跟你學嘢，就係唔想佢群埋班老屎忽學埋哂啲衰嘢。」
阿瞳聽到後無回應，只是呷了一口茶。
最後Frank少温柔的對阿瞳說︰「我信你會做得好。」然後整餐飯大家便無再交談，安靜的吃完回辦公室。
當他們回到去後，其他人都已經在工作，看到阿瞳回來，幾位好事之徒本想挖苦一番，但看到Frank少與他在一起，並笑着跟他道別，便打消了此念頭。
「阿瞳，原來你同老闆咁friend㗎？啱啱班人仲講你壞話，睇嚟都係假。」阿滔小聲的跟阿瞳打報告，但阿瞳無回應，只是簡單交代接下來的工作，然後便自己埋頭苦幹。
鏡頭一轉，阿超正提着兩大袋的台式飲品趕往客戶指定的地點，雖然上次迪士尼任務為萬事屋帶來了五萬元的收入，但長期的入不敷支令他依然不能休息。
「唔好意思，仲有五分鐘到。」阿超對客戶說。
「得，距離收工仲有啲時，收工前到就得。」客戶回覆。
客戶要求的地址是工廠大廈區，要找到的確要花點時間，眾所周知，工廈分A棟B棟、左右東南西北翼，入口又不知如何左穿右插才能找到，所以絕對是一個不簡單的任務。
不過正所謂「路在口邊」，只要不恥下問，往往能夠很快便找到目的地。五分鐘剛到，阿超便按了門鈴，客戶也即時前來應門。
「啱啱好五分鐘，果然準時。」客戶讚賞道，同時接過飲品。
「當然，我哋乜都得萬事屋一向言出必行。」阿超自信的說。
「果然無揾錯人，下次有咩再揾你幫手，呢度係今次嘅酬勞，你數數。」阿超接過五百元後正打算離開，怎料眼前出現了一個人──阿瞳。
「咦，乜咁啱呀，原來你喺度返工㗎？」阿超跟阿瞳打招呼。
「係呀，啱啱聽到你把聲就過嚟望望，估唔到真係你，咁有緣嘅。」阿瞳努力壓抑着內心的興奮。
「嘩，乜咁啱，原來你哋係識㗎？早啲講嘛。」阿滔說，他就是客戶本人。
「係囉，世界真係細，不過我都唔阻住你哋做嘢，走先，再約，拜。」阿超雖然不捨，但理性主導的他很快便離開，阿瞳只好目送，而背後則傳來其他同事的冷嘲熱諷，「乜52Hz鯨魚都有friend？」、「原來佢識主動講嘢？」等等。
「各位師兄師姐，今日小弟初嚟報到，特登準備咗啲嘢飲孝敬大家，日後多多指教、多多包容，請笑納。」阿滔十分懂得做人處世之道，而公司內也傳出陣陣歡呼聲。
「師兄，呢杯畀你嘅。」阿滔遞給阿瞳一杯綠茶多多，阿瞳禮貌的道謝後便放在一面。其實阿超離開後，阿瞳一直耿耿於懷，最後還是忍不住發了訊息給他約見面，而他亦爽快答應。
下班後，他們相約在附近的地鐵站見面，之後再找一間餐廳詳談。
「我到咗，你喺邊？」阿超訊息問。
「我都就到，不如我哋玩個遊戲，玩捉伊因，睇吓你揾唔揾到我。」阿瞳俏皮的說。
「嘩，咁多人，有啲難。」阿超回答，但同時又感到有種親切感，因為這跟以前的她一樣貪玩。
「咁你揾唔揾？」阿瞳帶點威脅問。
「揾，但你仲有幾耐到？」阿超無奈回答。
「我到咗喇，你揾我啦。」阿瞳高興的說。
經過一輪大海撈針，阿超始終遍尋不獲，最後阿瞳還是現身了。
「乜你咁渣咁都揾唔到。」阿瞳一來便取笑阿超。
阿超沒好氣的說︰「條街咁多人點揾喎？不過話時話，乜原來你花名係52Hz鯨魚？」
「佢哋鍾意咁叫啫，我都唔知點解……」阿瞳無奈的說。
「52Hz鯨魚係世上最孤獨嘅鯨魚，因為佢嘅頻率同其他鯨魚唔同，所以一世都同其他鯨魚溝通唔到，一世都揾溝通到嘅鯨魚。」阿超解釋︰「睇嚟你同佢哋唔係咁溝通到。」
「都係，佢哋都唔了解我，所以我都懶得同佢哋傾。」阿瞳小聲說。
「好彩我一直都了解你，同你溝通到。」阿超沾沾自喜。
「其實我有好多嘢想問你。」阿瞳道明來意︰「不過我哋叫咗嘢食先。」不知不覺他們已經來到餐廳坐下，並點了餐。
「你想問啲咩？」阿超認真的問。
「想知我哋以前啲嘢，我想逐個夢你講返我知係點。」阿瞳眼神堅定的說。
「好，但一定有排講，一餐飯實講唔哂咁多世。」阿超說。
「無問題，我有時間，可以慢慢逐啲聽，今次聽唔哂就下次，下次聽唔哂就下下次，總會聽得哂。」阿瞳心意已決。
「咁你想聽邊世先？」阿超問。
「我哋嘅第一世。」阿瞳答。