男男路: 可知心裡正準備無緣合照亦抱緊你
可知心裡正準備無緣合照亦抱緊你
自從上次進行前世催眠之後，阿瞳第一次連續一星期沒有夢到那些夢，這令他有點意外，不知是因為催眠幫助他解決了問題，還是因為阿超真的是「那人」，今世已經相遇不用再在夢中提醒自己。
「不過呢啲都無從稽考，隨緣。」阿瞳以一句總結，同時亦為自己開脫。
「BB，今日人哋想去迪迪尼玩。」阿瞳女朋友阿盈一早便傳來訊息，而阿瞳對這些即興的邀約很多時都會欣然接受，這次亦不例外。
「OK，幾點邊度等？」阿瞳回覆。
「十點BB樓下等，我哋一齊去。」阿盈回覆完便滿心歡喜的梳洗去了，而阿瞳繼續躺在床上，但只要一放空，腦內浮現的便會是阿超。
另一邊廂，阿超今日也有委託，是女大學生介紹的生意。
「Hi，係我啊，我無呃你哋，真係有幫你哋做宣傳，我有個friend想揾你哋幫手，佢想去迪士尼，但佢唔方便出門，想你哋代佢去，開住live咁畀佢睇，代佢玩，你哋接唔接？佢有錢女嚟，會畀錢。」女大學生在訊息中說。
「無問題，我哋乜都得萬事屋專為大眾解決問題，乜都得，乜都接得，乜都做得，呢單我哋接，但想問定係幾錢先？同埋幾時幾耐？」阿超回覆。
「訂金兩萬，所有使費佢包，事成之後即時畀埋尾數三萬，而家，立即。」女大學生答道。
「兩萬？三萬？加埋五萬？」阿超嚇呆了。
「係咪唔夠？我叫佢再畀多啲。」女大學秒回道。
「啊……唔係，不過我都唔介意收多啲。」阿超佻皮回答，然後又正經的問︰「咁佢想點睇到live？用電話定Go Pro？」
「無所謂，只要佢睇到就得，到時佢會再同你講想玩咩睇咩，我而家叫佢過數畀你哋，FPS定Payme？」女大學生問。
「都得，我畀個number你，而家出發，合約一陣我叫同事send畀你，你畀佢簽完send返嚟就得。」阿超說完便吩咐Michelle準備合約。
「佢想要情侶feel，要女朋友視覺。」女大學生補充。
「但得我一個人……」阿超面有難色的輸入。
「你啱啱唔係話有同事咩？」女大學生秒回。
「係就係嘅，但佢唔出job，只負責admin。」阿超回答。
「無問題，邊個話我唔出得？女朋友視覺可以，但酬勞要double！」Michelle亂入在訊息中回答。
「無問題，一於咁話，而家叫佢落訂。」女大學生爽快答應了。
「你出咗去邊個睇場？」阿超問Michelle。
「怕咩喎，咁來以嚟，walk in嘅客寥寥可數，通常都係網上，貼張『東主有喜』再留個電話就得喇。」Michelle說完，隨即拿出一張印有「東主有喜」及電話的紙，原來她早已準備好。
「況且，」Michelle打蛇隨棍上︰「你唔係成日話我哋乜都得萬事屋專為大眾解決問題，乜都得，乜都接得，乜都做得咩？咁小嘅事點會唔得先？」
面對這句服務宗旨，阿超當堂語窒，不能反駁，被打敗了，只能乖乖帶她去。
經過一番奔波勞碌、長途跋涉，他們終於抵達迪士尼樂園。縱然樂園開業多年，經常被調侃是最集中和最顧客友善、一日便能遊玩完，不必第二天又再入場的一個迪士尼樂園，但人流依然不減，由購票到入場已經花了半小時。
「要女友視覺，個重任就交畀你喇。」阿超對Michelle說。
「係係，無問題，好彩之前買咗呢個偷拍襟章，今次都用得着。」說完Michelle便挽着阿超的手，此舉嚇得阿超連忙退避三舍。
「男女授受不親，你做咩？」阿超帶點責問的語氣問。
「你唔記得個client嘅要求？女友視覺嘛，我都唔想㗎，但個client要求，點都要做啦。」Michelle故作委屈的說。
「我記得，女友視覺嘛，但唔係要你扮我條女喎，兩回事嚟。」阿超連忙說。
「哎呀，唔扮情侶點會有女友視覺先？」Michelle沒好氣的說。
「你又好似講得幾啱咁，OK，咁就唯有扮一日啦……」阿超無法反駁，只好勉為其難應承。
他倆入園去，拿了一張地圖，並查看了各表演、巡遊的時間，很快便規劃好路線，向第一站極速穿梭進發。
穿過商店，看了一會精品和服飾，他們終於抵達排隊處，幸好人龍未算很長，只需排約半小時。
「BB，個頭箍箍好得意，之前嚟見人戴我都想買，但最後都無買到。」阿盈說。
「係咩？一陣買畀你。」阿瞳答。
而這一句正好被阿超聽到，於是他四處尋找聲音來源，但奈何人太多，這有如大海撈針，始終找不到，然而皇天不負有心人。
「唔要，好貴㗎，而且好幼稚咁。」阿盈拒絕。
「好啦，咁唔買。」阿瞳口裡說不，但心裡已經預計買來送給她。
而憑這一句，阿超鎖定了方向，一眼便認出阿瞳。
「原來咁啱排緊同一條隊，咁睇有機會同車。」阿超小聲嘀咕，但剛好被Michelle看到。
「你嘀嘀咕咕講咩啊？」她問。
「你睇下十點鐘方向，係阿瞳，我都話同佢有緣。」阿超盡力壓抑着興奮的心情，並說︰「今次呢個job果然無接錯，我而家超有動力！」
「唓……」Michelle極小聲的發了一個音，然後又說︰「老闆，我當你無呃佢，你真係佢要揾嘅人，但今世你哋大家都係男人，你接受到咩？佢又接受到咩？」
「我唔理咁多，總之我會逼自己接受。」阿超固執的個性表露無遺。
「唔到你唔理㗎老闆，你咁樣盞嚇驚人，有無諗過可能係佢驚咗你，特登投胎做男人呢？」Michelle繼續勸諫他，然而他已經封閉雙耳，隔絕外界的所有聲音。
之後整個排隊時間，阿超都注視着阿瞳，完全無視了Michelle的存在。三十分鐘後，終於輪到他們了，這跟阿超預料一樣，他們兩組人同車，奈何位置分隔比較遠，阿瞳和阿盈坐車頭，而阿超和Michelle則坐中間。
「開始喇開始喇！」Michelle暫時忘記剛才的事，興奮的對阿超說。
「嗯。」然而阿超只是冷淡的回答，繼續把精神放在阿瞳身上。
這個室內過山車不消兩分鐘便完結了，說刺激也算不上，但對阿盈和Michelle來說已經吃不消。
「我要去一去洗手間。」Michelle說。
與此同時，阿盈對阿瞳說︰「BB，我要去一去廁所所先。」
說完她倆便衝去洗手間，留下兩個男伴──阿超和阿瞳，他們倆目送女伴跑走後，正好面對面碰個正着。
「嗨。」大家同時打招呼，然後空氣像凝結了般。
「乜咁啱呀？」良久才開口，想不到大家又異口同聲，之後他們便相視而笑，尷尬的笑。
「我要同你道歉先，對唔住。」這次阿瞳率先發言，阿超意想不到他這一着，一時間反應不來，只能傻傻的說︰「吓？」
阿瞳意會到阿超未能反應，於是補充︰「上次我自己跑走，我要同你講返聲sorry。」
「哦……」阿超這才如夢初醒，連忙說︰「唔緊要，我無嘢，一時之間係會難接受啲，明嘅，我都唔應該咁直接同你講。」
「換作係我，我都好難掩蓋呢個興奮嘅心情，我都明嘅。」阿瞳說︰「只不過，點解你咁肯定你就係『佢』？」
「因為我一直保留住由同你相遇開始咁多世嘅記憶。」阿超定睛看着阿瞳，眼神堅定，不像說謊。
「咁點解你唔一開始就相認？」阿瞳不解。
「因為我唔確定，咁多世都無試過同性，所以我有啲懷疑同猶疑。」阿超說︰「但其實，我一眼就認出你，無論你投胎成為咩，我都一眼就認出你。咁多世入面，我試過係狗你係人、試過我係平民你係公主、試過我係狗你係貓、試過我係人你係蝴蝶、試過我係西人你係黑人，仲有好多好多，但我都可以一眼就認到你。」
「但今世，可能我哋要停一停。」阿瞳說，這有如一句道別，而阿超也沉默了，恍惚他一早已預料到這結果，只是等待奇蹟，但這麼多世，奇蹟從未降臨過他身上。
「BB，係咪等咗好耐呢？對唔住啊，我哋跟住去玩咩好？」此時阿盈由洗手間走出來，連奔帶跳的走向阿瞳，而他也立即步前迎接，開心的跟阿盈走遠了，留下失落的阿超呆坐在長椅上。
「老闆，你無事呀嘛？」Michelle輕聲步近，温柔的問。
阿超聽到是Michelle，立即擦乾眼淚鼻涕，強顏歡笑的對着她說︰「無事，眼瞓得滯啫。」
「唔駛同我嚟呢套，係咪阿瞳同你講咗啲咩？」機靈的Michelle已猜到了。
「嗯……不過無事，我預咗，而且經歷咗咁多世都知，世事從來都唔會咁順利，慢慢嚟。」跟阿瞳聊完後，阿超變得豁然開朗，已經想到後着了。
「咁個job繼續啦！」語畢，Michelle抓着阿超的手臂，拖着他到第二個園區，遊玩飛行之旅和擊戰特攻，還有看各種表演，沿路再也沒有遇到阿瞳他們，彷彿他們在同一空間的平行時空般，永遠不會相遇。
「叮」，女大學生傳來訊息︰「我friend話想玩海盜船。」看到這，阿超臉有難色，因為他一生人中最害怕便是海盜船的離心力，而且海盜船的安全措施極簡單，就像隨時會被拋出去一樣，阿超堅決拒絕。
「老闆，個服務宗旨呢？」Michelle趁機取笑他。
「個cam喺你度，你玩就得喇，我喺下面睇就OK。」阿超推搪道。
他們在沖天遙控車入口擾攘，剛好碰到正要遊玩的阿瞳和阿盈，阿超立即變臉，推Michelle進內排隊並說︰「唔駛驚㗎，有我喺度，一啲都唔可怕嘅，好好玩好刺激，玩完包你話正。」
Michelle本身不明就裡，直到看到前面排隊的阿瞳才大惑得解，但她看穿不說穿，只是對着阿超奸笑，這奸笑令阿超異常尷尬。
至於阿瞳，他一直知道阿超排在他身後，只是剛才的一番話令他不懂得如果再打開話匣子，所以一直背着他們，裝作不知道他們在身後，但其實在阿瞳心裡也是很混亂，不知應該怎樣面對。他口裡說這世要停，但內心卻想繼續了解阿超，想知道以前的事，想跟他做朋友，但又很怕會動了感情產生愛意，畢竟有宿世姻緣加持，因此選擇逃避。
冰雪聰明的Michelle又怎會猜不到他倆的難處和真實想法，於是當起了橋樑的角色。
「喂，阿瞳，乜咁啱呀？」她拍了拍阿瞳然後說。
「咦？係喎，咁啱嘅，你哋都排隊玩呢個呀。」阿瞳故作自然的回答。
就這樣簡單的寒喧數句，他們便有了理由一起遊玩，尷尬也漸漸消失，而阿超和阿瞳兩人也變得像朋友一般，少了愛意在中間，變得熟絡起來。
「或者你都講得啱，今世停一停，換一個相處方式，下世再繼續，歡迎你隨時揾我傾偈解夢。」阿超對阿瞳說，阿瞳聽到後也放心了。一來並沒有失去一個知心人，二來大家見面也不會再尷尷尬尬，只是心內又有點失落。
至於阿超，他這樣做其實是想令阿瞳放下戒心，但同時也是放過自己，畢竟一個人背負這麼多世也挺累。
這一次迪士尼之旅，正式令他倆的命運再度交織在一起，但也造成了角色的互換。