男男路: 是緣是情是童真還是意外
是緣是情是童真還是意外
終於到了星期六，阿瞳準時來到萬事屋。
「呢啲就係我咁多年成日發嘅夢，連細節我都寫低埋。」阿瞳遞上一本寫得滿滿的筆記。
阿超接過筆記，但並未查看，而是直接問︰「揾到個人之後你會點？」
阿瞳頓了一頓，然後才回答︰「我想知究竟呢個人同我咩關係？點解我會一直夢到佢？係咪有咩啟示？」說完眼神變得凌厲，對着阿超壓低聲線續說︰「同埋，我唔想佢再煩住我！」
「好，我幫你做一次前世回溯，睇吓回咗去邊一世，嗰一世就係你靈魂入面最深刻嘅一世。」阿超說完，便着Michelle拉上窗簾、調暗燈光，營造一個舒適的環境，好讓回溯能成功。
「你而家用個自己覺得最舒服嘅姿勢坐好，或者鍾意瞓低都得，張櫈可以調較。」阿超說完，阿瞳便調整坐姿。
「跟住深呼吸三吓，令自己放鬆。」阿超再說，阿瞳照着做。
「而家望住我枝筆頭，我會數三聲，跟隨住我嘅指示就得。」阿超引導說，阿瞳聽從指示，全神貫注望着。
「一，你眼入面只有筆頭，其他嘢開始糢糊，眼皮亦都開始沉重。」阿超輕聲說。
「二，四圍可能會有好多唔同嘅雜聲，但只需要專注喺我把聲度就得。」阿超故意再小聲點，好讓阿瞳要更專注聆聽。
「三，眼皮越嚟越重，開始睜唔開。」阿超說完，把筆往下一甩，阿瞳雙眼便合上，進入了催眠狀態。
「而家想像你頭頂有一團光，呢團光可以係唔同顏色，但無論佢係咩色，佢都係好温暖，好柔和，令你覺得好舒服，你見唔見到呢團光？」聽到阿超的提問，阿瞳點點頭。
「而家團白光慢慢擴大，開始籠罩住你，你會感覺到一陣暖意慢慢擴散到全身，由頭，到頸，到膊頭，到身體，到雙臂，到雙腳，最後到腳板，而呢股暖意會一路保護你。」阿超說完停一停，好讓阿瞳能好好感受。
「而家你眼前有一條樓梯，你會逐級逐級落，隨住每落一級，你嘅催眠狀態會進入到更深層。」阿超又停了停，之後續說︰「一級，條樓梯係點嘅呢？係旋轉樓梯？定係郊外石梯？」
「再一級，呢條樓梯有無扶手？有無欄杆？係用咩材質做？鐵？木？定係石？」阿超一邊引導一邊提問。
「又一級，樓梯附近有無啲嘢喺度？會唔會有好多植物？定係咩都無得兩面牆？」阿超每個問題都令阿瞳的想像越發真實。
「再落多一級，你對呢條樓梯有無印象？係咪你之前有見過嘅？」阿超問完，阿瞳點頭。
「最後一級，你已經進入到最深嘅狀態，而家你眼前有一條隧道，你行入去，牆身會有好多唔同嘅片段，你可以邊行邊望，呢啲都係你嘅記憶，盡量留意片段嘅細節，慢慢行到隧道嘅盡頭，你會見到有道門，可能係木門，亦都可能係鐵門，但無論係咩門都好，你都行過去感受吓佢嘅材質、帶畀你嘅觸感、仲有門嘅重量，準備好之後就打開佢。」阿超用聲音導航，阿瞳在催眠狀態下依着阿超指示打開那扇厚重木門。
「打開門之後，你第一眼見到啲咩、聽到啲咩、聞到啲咩？」阿超問
「我見到一大片草地，有好多花，聽到雀仔叫，聽到笑聲，聞到啲花香。」阿瞳形容。
「咁循住啲笑聲望過去，你見到啲咩？」阿超根據他的答案而追問。
「我見到有一班人，有男有女，喺度野餐。」阿瞳說。
「有幾男幾女？」阿超問。
「四男三女，其中有一個男仔同我一齊坐遠咗望住佢哋。」阿瞳答。
「咁你望吓自己，你嘅衣着會係點？其他人嘅衣着又係點？」阿超繼續問。
「我着住嘅係……係一條長裙，好樸素普通，我……我係女仔！而其他人，男嘅就短褲短袖衫，女嘅都係長裙，感覺似古代嘅中國。」阿瞳回答。
阿超聽到後，有種似曾相識的感覺，但他很快便將它拋諸腦後，繼續問道︰「咁而家留意吓你哋嘅對話，會唔會知係咩朝代？」
「佢哋講緊打仗，講緊天下大亂……同我一齊嘅嗰個男仔同我講話嚟緊會去參軍，建功立業，再返嚟娶我……而我勸佢唔好，擔心佢戰死沙場。」阿瞳斷斷續續道︰「原來我哋唔同國家，喺邊境相遇，之後相愛，私定終生。」
「我起身行咗去條河度，河對面係戰場，我見唔到但feel到個男仔係其中一個士兵，啲旗，啲旗上面有字，係『魏』同『秦』，係戰國時代！」阿瞳繼續描述。
突然阿瞳開始流淚，情緒開始崩潰，漸漸有點不跟隨阿超的引導，情況有點失控，阿超見勢色不對，在徹底失控前決定把阿瞳帶回現實。
「阿瞳，你見唔見到一開始嗰道光？一直照住你、保護你、帶畀你温暖嗰道光，你而家依然受緊佢保護，我哋慢慢褪後行返入道門度，與此同時，你眼前嘅事物都會開始變得模糊，你而家入返門度，由隧道走返出嚟，啱啱所見嘅嘢離你越嚟越遠，你得到道光嘅保護，而家已經安全，入返隧道閂返道門。」阿超邊說邊留意着阿瞳的變化，幸好總算平靜下來。
「而家我哋行返出條隧道，見返條樓梯，嗰條你熟悉嘅樓梯。我哋逐級逐級咁行返上嚟。第一級，慢慢行，唔駛急。」阿超開始引導阿瞳返回現實，離開催眠狀態。
「第二級，你開始感覺得到身邊四圍嘅事物，感覺得到房間嘅温度。」阿超說，而阿瞳身體也有少許動作。
「第三級，除咗我把聲之外，你開始聽到房嘅其他聲音。」阿超緊接着說︰「第四級，你眼皮變返輕，可以感覺到光線。」
「第五級，你已經越嚟越清醒，聽住我數一二三，之後就可以打返開眼，離開催眠狀態。」阿超慢慢說︰「一、二、三，打開眼。」
阿瞳慢慢張開眼，花了十數秒回神，然後緊張的問︰「啱啱我係催眠狀態入面見到嘅嘢係咪真？我真係返咗前世？咁嗰個究竟係咩人？」
「冷靜啲，如果你信，啱啱嗰個就係你其中一世，你之前嘅夢有無夢到過？」阿超問。
阿瞳想了想，然後答︰「有類似，但無咁清晰，啲人物同畫面都比較模糊，只係我感覺到都係同一人。」
「你覺得嘅同一人，根據你啲夢，」此時阿超正拿着阿瞳的發夢筆記速讀，然後總結︰「唔知你信唔信，但我知係邊個！」
聽到這，阿瞳大喜，但同時又很懷疑。大喜是因為終於能夠真相大白，弄清一直纏擾着他的這個人是誰；而懷疑是因為眼前這人只是進行了一次催眠並看完他的筆記後便說知道是誰，實在太可疑，很有騙子的感覺。不過在好奇心的驅使下，阿瞳最終都是選擇相信，問道︰「係邊個？」
此時，阿超俯身向前，與阿瞳臉與臉之間只隔着三厘米，再一臉正經的說︰「係我！小公主，我終於喺今世揾返你喇！」
「吓？黐線㗎你？我都懷疑㗎啦，估唔到你亂嚟，你唔想接單job都唔駛咁玩我呀？亂噏我係唔會收貨，都唔駛旨意我會畀酬勞你！江湖騙子！」阿瞳對阿超的答案很是火大，認為自己被愚弄了，怒火中燒，雖然阿超竭力解釋，但他甚麼也聽不進去，最後暴怒之下奪門而去。
「老闆，你又係嘅，尋人又係你話想做，但點解要玩人呢？好喇，而家嘢就做咗，但客又無咗，點收科？」Michelle沒有好氣的問，她都認為阿超是在愚弄阿瞳。
「我唔係玩佢，我係講真，我都知成件事好難解釋，但係……」阿超欲言又止，最後還是選擇把說話吞下肚︰「都係無嘢，佢會返嚟嘅，雖然我到而家都仲係未接受到，但既然係佢，個天會將佢帶返嚟我嘅身邊。」
「無你咁好氣，又白造，睇嚟今個月都係無糧出。」Michelle埋怨道。
「Hey，come on，don't be like that，個女學生會介紹生意畀我哋㗎嘛，笑返先啦。」阿超滿不在意的說，並嘗試哄Michelle，但她沒有理會。
另一方面，奪門而去的阿瞳正獨自坐在公園沉思。他已經冷靜下來，想着從跟阿超相遇到剛剛催眠的細節。縱使心內抱有懷疑，但由跟他相遇開始，那些夢變得越來越頻繁，而且細節越來越多，甚至有一些全新的夢出現，而這一切，就好像冥冥中自有主宰。
相遇的那條路，是他回家從不會行的路，但當天不知為何就是想走那條路；路見不平，通常都是做旁觀者看着事態發展，但當天不知為何會拔刀相助；那些夢，是他只對極親密和信任的人才會說，但當天不知為何會主動上網尋找阿超並向他求助。
這些反常行為絕不是意外，或許是緣份，或許是天意，這令阿瞳自己也質疑自己剛剛的魯莽︰「或者個阿超真係『佢』？如果真係佢，個天會將佢帶返嚟我嘅身邊。」