【愛情】關於我一覺瞓醒發現喺初戀屋企⋯！: 114. 凋零
我將知珩買嘅嗰一束粉色系嘅花遞比浩宜：「呢束係知珩買比你。」
「好，我轉頭多謝佢啦～」浩宜雙手接過束花，目光隨即落喺我手上嘅另一束花上
「呢個⋯我唔知你中意啲咩，但知珩話你中意花，所以⋯我唔知你中唔中意呢束⋯但生日快樂⋯」我緊緊咁捉住我手中嘅淺藍淺紫色嘅花束，遲疑咁將花束遞比佢
「都中意呀～」浩宜帶住我好耐冇見過嘅笑容伸手接過花束，「多謝。」
「你仲約咗同事係唔係？咁我走先啦⋯」我微微點一點頭，喺我地之間嘅空氣都係尷尬嘅空氣，「生日快樂，拜拜⋯」
我呀⋯係一個冇用嘅人，知珩比咗一個藉口我去搵浩宜，但我最後揀咗落荒而逃⋯面子有咁重要咩？其實冇⋯我只係怕⋯
「思齊！」浩宜突然叫住我，令我有啲驚訝，我訝異咁回頭望佢，「多謝你特登過嚟送禮物。」
「唔洗，係因為知珩唔得閒所以先⋯過嚟一轉⋯」我嘅解釋聽起嚟就好似撇清緊關係一樣，將我嚟呢度嘅原因推到知珩身上
浩宜望我嘅眼神即刻變得有啲複雜，唔再係啱啱一樣嘅純粹，佢似係思考緊，亦似係不滿我呢一個回答；我唔自在咁伸手摸一摸髮尾嘅位置
我唔係想就咁結束，但係浩宜企喺我面前嘅時候，我唔知道我要講啲咩，佢嘅態度亦好明顯⋯
「點解你要避我？」浩宜攬住兩束花行到我面前，問咗一個我意料之外嘅問題，「因為，我上次講嘅嘢？」
「嗯，係。」我冇否認，冇欲拒還迎，好坦白直接咁承認咗
「我地，可以繼續係朋友。」浩宜認真咁望住我，佢係唔係都唔想呢段關係結束⋯？
「做唔到。」我快速咁深呼吸一口，然後肯定咁講道，「你應該一早就知，我唔係淨係想同你做朋友，所以我亦冇辦法只係當你朋友；你上次講嘅嘢，已經表明咗你對我嘅態度⋯」
空氣好似凝固咗一樣，我同佢都冇出聲，浩宜冇講啲咩，大概係冇得反駁⋯
「希望你今日過生日過得開心啲。」我微笑道，微微點一下頭就轉身道
要咁樣結束，我的確會唔捨得，但係一切唔係都係無可奈何咩⋯？
「佢過得開心就足夠啦⋯」我喺心入面默默咁安慰自己
⋯
⋯
⋯
「花我收到啦，琴晚飲咗酒太攰啦，未嚟得切搵你」我send咗個message比知珩
行出廁所嘅我行到廳就見到嗰兩束花，忽然感覺有啲⋯唔識形容嘅感覺，好似本來嘅明亮突然黯淡咗落嚟
我行到去餐枱前，兩束花都冇解開過，知珩送嘅嗰一束係有3年保鮮期嘅永生花，但思齊送嘅，係會凋零嘅真花⋯
「會凋零⋯」我嘅指尖喺掂到花瓣嘅時候，手機震咗一下
「我琴晚唔得閒嚟sorry，不過我搵咗人代我嚟，佢有冇5星好評呀？」知珩嘅回覆一睇字都知咩語氣
「琴晚嘅最後，似不歡而散多啲，點比5星⋯？」我今次揀咗直接錄音send過去比佢
明明今日係星期六，外面天氣都好好，但係心情完全唔似天氣咁好，反而有啲鬱悶，就好似準備落雨之前嘅天氣⋯
「做咩又不歡而散？」知珩回覆
我行到梳化坐低，望住手機想同知珩講，但唔知由邊一個位邊一句開始講先好
「應該真係冇得做朋友⋯」我整合咗一陣之後，都只係可以咁樣去總結
「咁咪算囉，朋友可以再搵啫，思齊應該真係諗過先講」知珩嘅回答係我冇諗過嘅答案，雖然以前有人表白嘅時候，知珩都係咁講，但今次我冇諗過佢會用同一句嚟答我，「你都拒絕咗佢啦」
「係啫，但係⋯」我望住對話框喃喃自語
「你驚冇咗個擋戰牌？」知珩又send咗個message過嚟
「唔係」我喺睇清楚嘅瞬間就打字send番過去，個腦都未諗得切，「擋戰牌有冇都一樣，可要可唔要」
「咁咪係，思齊唔追你，總有其他人會追你」知珩嘅回答令我都可以感覺到佢喺打字嘅時候係幾理直氣壯
「佢今日有冇番工」我唔知自己抱住咩心情打出呢句再send出去
「有呀，啱啱就喺我眼前行過」我望住知珩嘅回覆，大腦卻係一片空白，「你要嚟搵佢？」
我要去搵佢⋯？搵卓思齊⋯？大概唔係⋯我都唔知我問嚟做咩
「佢有冇同你講啲咩？」我出於好奇問道
「冇，不過最近睇起嚟都唔太開心」知珩嘅回覆令我嘅心跳都窒咗一下，雖然唔可以話係一定同我有關，「最近佢都好少笑」
「哦」我喺鍵盤打咗一個單字，想send出去嘅時候又搖搖頭刪番，但係又唔知道要答啲咩
「你係關心佢嘅咪親自去問下佢」知珩回覆
「唔啦，太僵啦宜家⋯」我自己都忍唔住嘆一口氣，「關係太僵」
「不過都好嘅，你對人地冇意思嘅話，唔好吊住佢嘛」知珩嘅回覆又一次令我大腦一片空白
我行到露台前面，將趟門打開，行出去感受一下今日嘅風，今日嘅思緒好混亂，一啲都唔似平時嘅我⋯
唔知點解，心頭嘅鬱悶一直散唔去，我冇覺得我對卓思齊係到中意嘅地步，但亦唔係完全冇感覺，我對佢係會在意但又未在意到中意嘅地步
「有冇意思都一樣啦已經」我覆咗知珩一句，send咗出去之後再睇都覺得自己莫名其妙
「你覺得佢點？」「幾好囉，各方面都幾好」
「咁你有冇意？坦白講嘅話」「唔抗拒」
「佢好明顯係中意你」「但我大過佢」
「冇咩衝突，你接唔接受到嘅問題啫」知珩講出咗重點：接唔接受到
我覺得大部分女仔，包括我，對於姊弟戀都會有少少抵觸，女仔大過男仔，好似有更多嘢要考慮
IG Link: https://www.instagram.com/nd_cotttoncandy/?hl=zh-tw