【愛情】關於我一覺瞓醒發現喺初戀屋企⋯！: 113. 代送者

我同卓卓都識咗一般時間，佢都多番工，而且我同佢、樂恩同阿逸都成日一齊食飯，都大概知佢咩人，好少見佢會喺呢種明顯嘅失落狀態

「咁浩宜又未真係開到口拒絕你，會唔會係你諗多咗呀？」我試圖安慰下佢

「我寧願諗多，都唔想諗少⋯佢嘅意思我係明⋯」卓卓搖搖頭，望住碟飯都忍唔住嘆氣，「唔知⋯我覺得要追嘅話我係要主動啲，但係佢講到明佢唔想拍拖，而且叫我唔好等佢⋯」

卓卓抬頭望一望我，對我苦笑一下，試圖掩飾佢心入面嘅真實感受，不過平日開朗慣嘅佢忽然間收起笑容，佢嘅唔開心就好明顯，佢嘅心情太顯而易見⋯

「不過，我同佢應該都真係冇機會⋯」卓卓苦笑搖頭





「你唔再爭取下？就咁樣就放棄啦？」我問道，「既然係咁中意，咁輕易就真係放棄啦？」

「你唔洗怕我唔開心，我都只係未調整好心情⋯」卓卓道，「你唔洗安慰我⋯」

「我唔係要安慰你，只係問下，見你中意得咁明顯。」我拎起手機望咗一眼，「浩宜有冇咩反應？除咗叫你唔好等佢。」

卓卓沉默不語，默默咁望住剩一半嘅飯，將時間推前到同浩宜見面嘅一日，回想緊當日嘅事與情

「只係⋯皺咗一下眉，睇起嚟有啲，愕然⋯」卓卓嘅雙瞳中唔似平時一樣明亮，睇起嚟特別黯淡無光，好似一個寧靜嘅海面，冇任何嘅漣漪泛起，「我唔敢去諗、去判斷佢嘅眼神同表情，我怕我自作多情諗得太多⋯知珩，我好似不戰而敗，我唔知要點樣先好⋯」





以我所知關於浩宜嘅近況，就係佢又回復番以前嘅生活，放工就同同事同朋友一齊去酒吧，夜一夜先番屋企

前一排我都有偷偷地估過，浩宜忽然間少咗去酒吧係唔係同卓卓有關，但浩宜講過唔想拍拖，佢中意新鮮感

我有擔心過佢會唔會為咗自己嘅新鮮感同卓卓行近啲親近啲，令卓卓先陷入去出唔番嚟，睇嚟宜家真係玩出禍啦

由卓卓望浩宜嘅眼神就可以估到，佢比浩宜迷住，完全咁⋯

「佢會愕然，可能都冇諗到你會揀同佢斷，我諗唔係完全冇機會。」我認真咁憑我對浩宜嘅了解分析比卓卓知，「浩宜的確係幾容易feel到人地對佢嘅感情去到邊嘅～呢個冇得否認。」





「但係佢已經表明咗佢嘅態度⋯」卓卓仍然唔敢諗太多

「女仔有時都幾矛盾，想你發現同時又唔想你發現；如果你話佢好堅定、冇猶疑咁答你「好」之類嘅同意答案，我諗你就真係冇機會。」我托住下巴道，「有時浩宜都幾被動，可能慣咗人地追佢啦。」

卓卓望住我，我唔知佢係唔係考慮緊自己要點做，但我諗佢唔係啲太蠢嘅人，該明嘅佢會明

「機會嘅嘢，要自己爭取，既然係咁想要。」我飲埋最後一啖嘅凍檸茶

「但係，我冇藉口再搵佢⋯」卓卓苦惱咁抓幾下頭髮

佢係等緊一個機會去搵浩宜？唔⋯藉口呀⋯

⋯

我行到屋企門口，拎出鎖匙開門，我已經好習慣住喺呢度嘅日子





打開門嘅一刻，香味瞬間撲鼻而嚟，廚房傳嚟炒餸嘅沙沙聲，唔知道今日阿立煮咗啲咩

每一日見到阿立，我都會覺得有人寵愛嘅感覺真係好，有人縱容包容自己，我係比佢肆無忌憚咁愛住、保護住

「我番嚟啦～」我將呢句充滿家嘅溫馨句子留比佢，行到佢嘅身後，雙手攬住佢嘅腰

「去換衫沖個涼啦，有得食㗎啦。」阿立擰轉頭望我嘅時候溫柔咁微微一笑

我沖完涼出嚟嘅時候，阿立已經擺咗一大碗炒飯喺枱上面，佢都已經坐好等緊我出嚟

「Okay～食得啦～」我小跑到阿立嘅身後錫佢一啖，然後拉開佢對面嘅櫈坐低，「好香呀！」

「快啲食！餓咗好耐啦？」阿立先裝滿一碗炒飯擺到我面前





「你今日忙唔忙呀？多唔多嘢做？」我問道

「Okay啦，不過聽日又有單新嘅project接咗手要做，上一單細嘅比咗Ella試，今次呢單大嘅我要做番。」阿立講道，「不過對我嚟講應該冇咩難道，做好我嘅份內事就可以啦～拎住可觀嘅人工做嘢，自然咩都要做得好啲完美啲。」

「嚟緊會好忙？我可以番嚟煮飯㗎！」我舉手自薦

「你煮飯呀？」阿立忽然冷笑一下，然後搖搖頭，「咁都係唔好啦，都係我番嚟煮啦～」

平日嘅生活都係咁平凡，問下對方嘅事，講下自己嘅事，笑下打鬧下

如果一直要求一段關係中要轟轟烈烈，係冇咩可能嘅事，轟轟烈烈只係一段短時間，但平穩落嚟之後先係最突顯出愛與唔愛嘅分別

係唔係所有愛情都要轟轟烈烈先好？要驚天地 泣鬼神嘅愛情先叫完美？

我覺得唔係，因為愛情有好多種呈現嘅方式，平淡唔代表淡而無味，轟烈亦唔代表刺激味蕾，只係睇你點樣去看待一段關係⋯





「你夾菜呀，做咩唔食菜？」阿立邊抱怨我邊將菜心夾入我嘅碗中

我同阿立之間嘅平淡唔會令我覺得沉悶，因為細水長流嘅日子本來就係咁樣，安靜但了解，愛而溫馨

「食～我食我食～」我笑道

⋯

⋯

⋯

抱住一大一細兩束花嘅我淨係企喺呢度已經好唔自在，周圍嘅人經過嘅時候，視線都會喺我身上停留兩秒





我企喺度緊張咁等嘅時候，諗起知珩上星期同我講嘅嘢：

「浩宜下星期生日啦，你唔知咩？」

「唔⋯我都諗緊買咩比佢，佢都幾中意花，我都仲睇緊～」

今日最主要係知珩叫我代佢嚟送禮物，佢話佢唔得閒⋯我知道，知珩想比個機會我去見浩宜

我將我心諗緊嘅嘢同知珩講唔係因為我想佢偷偷地話比浩宜知，只係單純咁因為我信得過知珩，覺得佢係一個可靠嘅人⋯

我一直緊盯住大樓嘅玻璃門，唔知係唔係因為已經好一段時間冇見過浩宜所以宜家特別緊張，抱住花嘅手嘅手心都出晒汗

我望到浩宜嘅身影，視線一下子就集中到佢身上，望住佢踏住輕快嘅腳步行出嚟，我第一時間就行過去，佢似乎都見到我，一臉錯愕咁望住我

「浩宜⋯！」我怕佢一推門就會當睇唔到我轉身走，所以即刻叫住佢

「你、你喺度嘅？」浩宜仍然滿臉愕然咁望住我，下一秒回神之後擰轉頭望一望，「你地行先啦～我轉頭嚟！」

原來佢啱啱同佢啲同事一齊，我都冇留意到；喺我望過去嘅時候，佢嗰幾個成日一齊嘅女同事已經望住我，對我笑，我微微點一點頭打個招呼

浩宜撥一撥手示意佢地行先，佢地幾個就轉身行，只有我同浩宜留喺原地

「我以為我地已經絕咗交添⋯」浩宜明亮嘅雙眸凝視住我，笑容一如既往咁從容而燦爛

「我今日係代知珩過嚟送禮物，佢話佢仲有嘢做趕時間，所以叫我過嚟代佢送⋯」我下意識解釋起嚟，「生日快樂。」




IG Link: https://www.instagram.com/nd_cotttoncandy/?hl=zh-tw