【愛情】關於我一覺瞓醒發現喺初戀屋企⋯！: 115. 思緒混亂
「不過你都會在意呢啲嘢㗎咩？」知珩見我已讀但冇覆，又send咗個message比我
「我會囉，陣間比人笑點算」我比較要面子，都怕人地笑我，陣間話我老牛食嫩草點算
「4年啫」「4年差一個gap啦小姐」
4年一個gap，我就算唔諗自己會唔會比人笑姊弟戀，都要諗下佢身邊嘅人點諗；一個gap，可以差好遠：思想、價值觀、對未來嘅想法、人生嘅想法，全部都可以差好遠⋯
「咁你對人地有好感定冇好感？」知珩係唔係一定要我比個肯定嘅答案佢先開心
我冇咁蠢真係答佢，因為我都唔敢肯定嘅嘢點敢答佢，佢平時又會有機會同卓思齊一齊番工，我點同佢講？陣間佢同卓思齊講咁點算？
如果卓思齊唔係細過我，我真係會考慮同佢一齊，但宜家佢又細過我，我唔敢去諗太多
「周浩宜你幾時咁冇膽㗎⋯」我仰起頭，將頭髮都往後梳
我一直坐喺廳睇電視直到差唔多8點半嘅時候先記得要食飯，我換咗件衫就落樓去買飯，今日就唔煮啦，食外賣算
我拎住餐牌諗緊食咩嘅時候，餘光見到有個高大嘅男仔行緊過嚟，我呢種外貌協會嘅人下意識就望過去打算偷望一下
我望過去嘅時候佢咁啱都望到我望佢，我同佢一樣都係呆咗一下，佢先一步微微點一點頭，然後直接行去落單叫外賣
其實我都諗好食咩，所以佢落完單我就行去落單，呢間鋪頭嘅嘢食都係即叫即做，所以睇嚟都要等一陣
我同卓思齊之間嘅距離闊到大概企一家四口都夠，佢係有意要避開我⋯
「又會咁啱嘅⋯今日先同知珩講起佢，宜家就見到佢⋯」我喺心入面道，有種想去打招呼，但係又覺得好尷尬嘅感覺
我偷偷地望佢一眼，佢若無其事咁企喺度睇手機，無可否認嘅係佢側面同正面都幾好睇⋯不過宜家唔係講呢啲嘢嘅時候
電話忽然間響嚇咗我一跳，不過既然唔係set咗number嘅人，咁大概唔聽都唔緊要，係識嘅人嘅話佢應該會打第二次嚟
我呢頭cut咗佢線，佢又真係打第二次番嚟⋯我聽⋯
「喂？」我先喂咗一聲，對面嘅人開口講嘢嘅瞬間，我都可以感覺到自己直接黑面，「你煩唔煩？」
我聽住對面嘅人講嘅嘢，我真係無名火起，點解佢仲可以打到電話比我？我唔係已經block咗佢咩？
「你好煩，我講咗好多次你唔好再纏住我，唔會同番你一齊。」我認真嘅語氣聽起嚟就係下一秒要鬧人
我忽然靈機一動，拎住電話大步咁走向卓思齊，佢一臉困惑咁望住我，又望一望我遞比佢嘅電話
「Ex打嚟⋯」我低聲咁講
卓思齊接過我手中嘅手機，皺住眉頭：「喂？講完廢話未？你再糾纏嘅話，下次就唔係一個過肩摔咁簡單，再見。」
卓思齊面無表情咁講完之後直接收咗線，將電話遞番比我，我禮貌咁講咗一句：「唔該⋯」
我地之間嘅關係好似完全冇辦法番轉頭一樣，嗰日佢嚟送花比我嘅時候講嗰番說話，當時嘅我係咩心情⋯？
我同佢係因為一面之緣所以認識，所有嘅對話都係由佢主動開始先；我地忽然間好熟，成日都見，又會一齊食飯；忽然間又變到好似宜家一樣，有隔閡，冷淡⋯
我識佢嘅呢兩個月，從來冇見過佢係宜家呢個表情，散發出冷淡嘅感覺⋯可能我都冇估到，最後會係咁樣⋯
「你今晚番屋企？」我今次做先開口嘅一個
「嗯，最近都慣咗番屋企。」佢望一望我，微微點頭，語氣都唔似平時一樣雀躍
「諗好之後番咩工未呀⋯？」我問
「應該都係喺cafe番住先。」佢嘅語氣好淡然，我一時之間唔太習慣
「哦⋯都好呀⋯」我微微點頭，尷尬，真係尷尬嗰一種
我拎住外賣番屋企食完之後，坐喺梳化上面呆坐，唉⋯頭痛呀真係⋯不過我大可以同以前一樣，忘記咗之後又繼續我嘅人生，我拎得起放得低！
⋯
「叮鈴鈴鈴～」
喺我推門啲瞬間，cafe嘅門鈴發出清脆嘅響聲，冰涼嘅感覺迎面吹嚟，難怪知珩成日話凍
「你今日又會過嚟嘅？」知珩嘅目光瞬間落喺我身上
「哦，係呀⋯見完客，過嚟飲杯嘢再番去。」我行到去吧枱前面坐低，佢啲同事好似都認得我，都會微微點一點頭，「照舊。」
「Okay。」知珩比咗個Okay手勢我就直接幫我落單
今日呢個時間唔太多人，可能因為已經過咗lunch time，所以人流都少咗好多，cafe入面嘅背景音樂都顯得幾大聲
「唔洗周圍望啦，卓卓今日冇番工。」知珩忽然間道，我收回目光望向佢
「哦，所以呢⋯？」我幽幽道，托住下巴垂眸，「我又唔係為咗佢所以過嚟。」
「好，信你信你。」企喺咖啡機前嘅知珩抬眼望一望我，然後輕輕一笑，「點呀？和好未呀？」
「未呀⋯邊有和好唔和好⋯」我無奈咁輕嘆一口氣，「應該冇得救啦⋯」
「我以為佢會打動到你添⋯」聽知珩嘅語氣，佢應該係覺得有啲可惜
「感情事又唔係好似電腦編碼咁只有0同1咁簡單，中間可以存在好多變數⋯」我望住知珩親自放到我面前嘅咖啡，「冇得勉強，我又冇咩所謂⋯」
「但你睇起嚟完全唔似冇咩所謂。」知珩彎腰細聲咁同我講，「你就真係咁介意咩？佢細過你。」
「叮鈴鈴鈴～」cafe嘅門鈴又響起，知珩嘅職業病令佢即刻就將注意力望向門口，我趁呢個時候飲一啖咖啡
「卓卓？你今日唔係day off咩？」知珩訝異咁望住門口
我聽到佢對嗰個人嘅稱呼嘅時候，準備飲一啖咖啡嘅我，傾斜咖啡杯嘅動作都稍微一頓
IG Link: https://www.instagram.com/nd_cotttoncandy/?hl=zh-tw