【愛情】關於我一覺瞓醒發現喺初戀屋企⋯！: 96. 靜待這刻

我將手心打開，同佢嘅手緊扣住，成為遺憾嘅話，就會好似一幅拼圖上缺失嘅一塊一樣，點都補唔番

「知珩⋯」阿立轉過嚟面向我，我自然咁就望向佢嗰邊，佢嘅手輕撫過我嘅臉頰，手心貼喺我嘅臉頰上面，「以後會一直一齊。」

「嗯⋯好⋯」我微微點頭，左手輕搭到佢放喺我臉頰嘅手嘅手背上

佢落喺我唇上嘅吻，溫柔但有滿滿嘅佔有慾嘅意思， 溫熱嘅感覺由嘴唇傳嚟；中唔中意，真係冇得講大話，第一反應已經代表一切⋯

「過晒界啦⋯」我耷低頭輕抿一下唇，低聲咁講道





「我地之間係界線可以分清⋯？」阿立只係一笑問道

「由決定都係住喺度合租開始，我就知道最後會過界⋯」我嘅雙手攬住佢嘅腰，頭側住咁靠喺佢嘅膊頭上，佢身上都係沐浴露嘅香味

「算係引狼入室？」阿立笑意更深，「係你縱容我過界㗎～」

「結果都唔錯唔係咩？」我挺直腰坐好起嚟，將佢攬得更用力，將頭埋喺佢嘅頸窩位，一呼一吸間都傳嚟佢嘅氣息

「係真係唔錯，都算係一種意外收穫⋯」我感覺到佢微微點頭，「不過都未到結果，有人唔肯直接比答覆。」





「咁⋯你再等下⋯？」我忍唔住笑咗一下，然後就即刻將笑意壓番落去

「要等到幾時？」佢嘅指尖輕輕掃過我臉龐嘅髮絲，然後喺我額角上輕吻一下

「再曖昧多一陣先？」我有啲任性咁提出我嘅要求，「再一陣先。」

「已經過晒曖昧嘅界線啦⋯」阿立無奈咁搖搖頭，手捏住我嘅下巴，「不過隨你中意啦～」

阿立知道我嘅選擇一定係佢，即刻就從容不迫咁面對我嘅要求





我同佢只係悄悄靠近，然後輕輕咁喺對方嘅唇上輕碰一下，真係一早就過晒界⋯

⋯

星期四

我同阿立約好喺目的地等，不過我今日早咗啲出門口接佢，為嘅係比個驚喜佢

「收工啦」我收到阿立嘅message，心入面即刻有啲緊張

我下意識就望向大樓嘅門口，從落地玻璃可以望到入去，可以見到佢出嚟未

「好緊張呀⋯點解咁緊張嘅⋯！？」我不禁用力握住手機，每隔兩秒就要擰轉頭望一望

再等咗一分鐘，我就見到阿立落到嚟地面，朝住大樓嘅大門行，佢身邊有個男同事，好似⋯係之前嚟cafe搭訕嗰個人⋯？好似叫Mavis





我喺阿立差唔多行到大門嘅時候，快步行過去，喺佢拉門行出嚟嘅一刻，就見到我企喺外面

「Surprise～」我企喺門嘅旁邊，佢見到我嘅當下都愕一愕然

「你喺度嘅？」阿立滿臉訝異，語氣中夾雜住愕然同激動

「嚟接你嘛～」我笑道，好滿意佢呢個反應

不過睇起嚟除咗阿立本人愕然之外，佢隔離嘅同事都好愕然，佢瞪大眼望我又望一望阿立，震驚咁開口：「你地⋯識㗎？」

「識呀。」阿立滿臉自豪咁望佢嘅同事一眼，然後望向我介紹一下：「同事，Mavis。」

「衰仔，截我糊⋯！」佢嘅同事低聲講嘅同時用手肘撞咗阿立嘅手一下





「我截你？我地本來就一齊住。」阿立擺出滿不在乎嘅表情，但語氣卻帶住炫耀嘅意味

「一齊住⋯？」Mavis眼中嘅愕然都未散去，視線從阿立移向我

我一個簡單嘅禮貌笑容，都已經算係代替我答咗一切，呢個本來就唔係大話

「走先啦，聽日見。」阿立拍一拍Mavis嘅膊頭，然後望向我示意我行唔好企喺度

我同阿立一齊走，我嘅餘光見到阿立得意嘅表情，佢之前都冇問起過佢同事搭訕我嘅事，原來係打算送佢一份大禮

「你就係等呢刻開大技？」我望住佢滿意嘅表情

「冇呀，我就係陳述事實。」阿立雖然口喺度否認，但係佢嘅聲線瞞唔住，聽得出佢心情愉悅

「之前你明知佢搭訕我，你咩都冇提過，唔似你喎～」我挑起眉有啲懷疑佢嘅意思





「佢要試嘅咪試，我又唔係冇阻止佢。」阿立聳肩，「佢唔試一次唔死心。」

「親眼望到都唔嬲？我地阿立幾時咁大度？」我輕笑一聲探頭望佢

「一直都咁大度，冇嬲嘅必要。」阿立無奈咁講

以我對佢嘅了解程度，唔係阿立唔嬲，亦唔係佢真係大度到咁樣，只係佢知呢個人對佢完全冇威脅性，佢亦知道呢個人同佢比，佢一定係勝利嘅一方

我沉默不語，只係笑咗一笑，人嘅性格唔會輕易改變，所以佢嘅性格我都係可以觸摸得到

望住佢嘅側面，我忽然有啲感慨⋯喺同佢分開嘅時間入面，我到底係點過⋯？

我同阿立喺銅鑼灣落車，收工時間嘅人流同星期六日有得比





阿立怕我走散特登向後伸手拉住我隻手，我跟喺佢身後行，望住佢嘅背影嘅我，覺得成個心都暖洋洋

我陪阿立去買佢要買嘅香水，我覺得呢種清淡嘅香水味好啱佢，唔需要太濃烈，淡香都已經足夠

「我地食咩好呀今晚？」我問阿立，喺佢行到我身邊嘅時候，我自然咁提手挽住佢嘅手臂

「唔⋯你想呢？未諗到就番到去諗到再叫外賣？」阿立好似已經睇穿我嘅想法一樣，知道我未決定好

「都好～」我因為比佢睇穿咗而嘻嘻笑

過馬路嘅時候，阿立將比我挽住嘅手抽出嚟，佢擰轉頭望咗我嘅手一眼，喺抽出嚟嘅手嘅手心掂到我嘅指尖嘅時候，佢一下就將我拖住，淡然咁講咗兩個字：「多人。」

「哦。」我點一點頭，安靜咁跟喺佢身旁，手輕輕用力回握住佢嘅手

原來有啲嘢真係唔洗講出口，大家都係會感受到對方嘅想法，呢種算係我地嘅默契定我地嘅心有靈犀？

我地企喺月台等車到嘅時候，我定睛咁望住玻璃幕門上嘅倒影，已經到月台、人亦唔多，但手仍然互相握住⋯

「你睇緊咩呀？」我回過神，側身踞起腳尖望佢嘅手機螢幕一眼

「嗯？冇呀，睇緊你個IG。」阿立完全冇心虛亦冇隱瞞嘅打算

「我IG冇嘢好睇⋯」我有啲無奈咁睇住佢睇我嘅IG profile，「恩舒比我睇過你嘅private account，你之前係唔係po過游巧盈？」




IG Link: https://www.instagram.com/nd_cotttoncandy/?hl=zh-tw