【愛情】關於我一覺瞓醒發現喺初戀屋企⋯！: 95. 「拜拜，今晚見」
「我唔好意思要你成日請我食嘢。」浩宜抬頭望一眼喺車門上面牌，「但你地cafe啲推介甜品幾好食係真嘅。」
「阿逸親手整㗎，成日都好快賣晒。」我諗起成日都好快清晒嘅推介甜品
「之前有聽知珩講過，識整甜品嘅男仔都幾加分。」佢講到後半句嘅時候笑咗一笑，我有豎起耳仔聽清楚㗎
「都幾⋯？不過阿逸好似都冇拖拍⋯」我一講完就覺得自己講錯嘢，即刻轉話題：「你咩站落車？」
「我呀？中環囉。」浩宜回答，「你應該差唔多要落車啦？」
「嗯，今日要番學，唔番cafe。」我望一眼站牌，好可惜唔係同一個站落車，「下次見。」
「乖乖地番學上堂啦～」佢點一點頭，「拜拜～」
今次一別，又唔知要幾時先可以再見一面⋯一個上班族同一個大學生，可以差幾遠⋯？
⋯
⋯
⋯
最近，我同阿立嘅生活都係依舊，只係講清楚一切之後，又親密咗好多⋯
「如果當初我同其他人住會點⋯？」我都有諗過呢個問題
「嘟嘟嘟嘟！嘟嘟嘟嘟！」阿立嘅鬧鐘又響啦，佢又唔起身啦
我地宜家都係分開瞓，唯獨真係上一次一齊瞓，宜家都係番自己房瞓；雖然我宜家咁講冇咩說服力，但未一齊就過晒界都唔太好嘅～
我喺廁所化妝化到一半，就行去直接推開阿立嘅房門，佢嘅房門長期都係虛掩，主要怕我怕黑
「嘟嘟嘟嘟！嘟嘟—」我將阿立嘅鬧鐘拍熄，然後就捉住阿立嘅膊頭，「起身啦許翊瑜！」
「嗯⋯！」阿立似醒非醒咁點頭，我以為佢要再瞓，但佢下一秒係乖乖地坐起身，先清醒一下大腦
「起身啦！番工要遲到啦！」我拉一拉佢嘅手，感覺阿立仲未醒晒
果然呀～對中意瞓覺嘅人嚟講，起身真係好痛苦嘅事
我同阿立今日一齊出門口，我閂上屋企嘅大門，佢拎鎖匙鎖門
我地一齊搭車番工，好彩我地喺同一個站落車，見面嘅時間又多咗唔少，一日入面真係除咗番工嗰8、9個鐘，我地真係全日都見住
「哎⋯」阿立喺列車停落嚟嘅時候企唔穩，佢靠近過嚟嘅時候，我都冇縮開，伸手輕輕扶一扶佢
「你噴咗香水？」我抬頭望佢，因為一陣好淡嘅香味喺佢身上傳嚟，我都幾肯定係喺佢身上嚟
「嗯，不過就嚟用晒。」阿立嘅視線向下，喺車再開嘅時候，阿立提手捉住三角形嘅扶手，「扶住。」
阿立叫我捉扶手，我乖巧咁提手，不過唔係直接捉扶手，而係捉住佢捉住扶手嘅手，都叫捉咗扶手啫
阿立挑起眉望住我，嘴角微微上揚，我只係側一側頭望佢
「洗唔洗再買？香水。」我問道
「要啦，要買定，番工冇嘢噴。」阿立點點頭
「你幾時開始噴香水？」我有啲疑惑，以前好似都冇見過佢噴香水
「一直都有，係你冇留意。」阿立望我嘅眼神都表達緊佢嘅無奈
「隻香味好啱你。」我將鼻尖再湊近佢少少，再聞一次佢身上嘅香味，「嗯，好啱你。」
「係？」佢好似問緊我嘅意見一樣微微側頭
「係呀。」我肯定咁點頭，然後無奈咁低頭笑一笑，「好啱你呀。」
「你嚟緊星期幾放假？」阿立忽然間問起我嘅day off，我估係想約我一齊出去買佢要嘅香水
「星期⋯四，星期四day off。」我拎住手機打開更表睇一次確定，「你想去買香水？」
「嗯，去唔去？」阿立問我，我覺得有啲明知故問嘅意味
「去呀～陪你去囉～」我笑道，佢望我嘅眼神又好似當初一樣溫柔
落車之後，我地又到咗要分別嘅十字路口，不過夜晚又會番去同一個地方
「我番工啦，今晚見。」阿立對我講道
「嗯，今晚見～」我對佢揮揮手，感覺好似又番咗去以前中學放學嘅時候
佢企喺佢住嘅嗰一座嘅大堂外，同我相距二十步嘅距離，然後同我揮手講「拜拜，聽日見」，宜家變成咗「拜拜，今晚見」
嗰種感覺真係會令人嘅心變得好溫暖，有種想攬住佢嘅感覺喺心底湧出嚟，但我將佢地壓番落去
每日都喺呢個狀態同心情下開始新一日嘅工作，遇番佢真係我諗都唔敢諗但係又真係發生咗嘅事
⋯
收咗工、喺屋企同阿立一齊食完飯之後，我地坐喺梳化一齊睇電視，冰釋前嫌之後都係呢個狀態，每日都會咁樣睇一陣電視
今晚電視喺呢個時間播緊電影，廳都閂晒燈，只有電視係發緊光
「食蘋果。」阿立喺廚房行出嚟，手上拎住個碗，碗入面嘅蘋果都係切咗件去咗核
「嗯！」我拎起鐵叉拮一件，分兩啖放入口
我盤腿坐喺梳化上面，右邊嘅膝頭貼住阿立嘅左腳，自然咁靠住佢嘅腳
電影播到男女主要分開，明明大家依依不捨，但係因為大家都唔願意解釋清楚彼此嘅誤會而分開⋯
「明明可以解釋，然後就冇事啦⋯」我望住佢地嘅分開，三步一回頭，睇到我都有啲心痛
呢套電影嘅最後，依我嘅記憶係男女主都係冇再一次走埋一齊，結局係女主望向對面嘅行人路，見到男主已經結婚有一個新家庭⋯
我假裝自然咁稍微擰轉頭，偷望阿立一眼，阿立專心咁望住電視，正當我要收回視線嘅時候，阿立忽然開口，細聲咁講咗一句：「我地解釋咗啦⋯」
原來佢同我一樣，諗緊同一件事⋯佢伸手拉起我隻手，將我嘅手包喺佢雙手中放喺佢大髀上
「冇嬲啦，和好啦⋯」阿立又講咗一句
「嗯⋯有機會解釋真係好⋯」我雙眼望住電視嘅畫面，但腦入面諗緊嘅都係同阿立有關嘅事，想知道佢呢一刻會係咩表情，「冇機會解釋清楚嘅話，會變成心入面嘅遺憾⋯」
「冇遺憾啦宜家，我地解釋清楚啦⋯」阿立講道
IG Link: https://www.instagram.com/nd_cotttoncandy/?hl=zh-tw