【愛情】關於我一覺瞓醒發現喺初戀屋企⋯！: 97. 「秘密」曝光
阿立嘅動作一頓，同我對望嘅時候，眼入面有一絲嘅慌張閃過，好似我發現咗佢做咗咩對唔住我嘅事一樣
「一張咋，人地幫我地影㗎，冇啲咩好親密嘅動作，企喺度咋⋯」佢喺我都未問其他嘢之前已經一連三答
「你做咩咁心虛⋯？」我望住佢嘅慌張，嘴角就上揚
佢偷偷地觀察我嘅表情同反應，大概係怕我又要嬲，所以佢唔敢講啲咩，只係一直望住我，等我講啲咩
「我冇嬲，就係問下。」我將下巴靠喺佢嘅膊頭，解釋一下我嘅心情，「以後我地一齊咗，你會唔會po我喺private？」
「唔會，我會揀po喺public。」阿立冷靜咁講，但我第一個感覺係佢嘅求生慾好強，「但如果你中意我po埋private，咁我就po埋。」
「你點解唔po游巧盈喺public？」我抱住一半好奇一半爭勝嘅心問
「冇咩必要。」佢望我一眼，呢個淡然嘅笑容同眼神，完全係睇穿我嘅提問意圖一樣，「留番比你。」
「哦，好呀，我只係隨口問下。」我擺出唔在乎嘅樣聳肩
「嗯，好呀信你。」阿立配合我嘅面子點頭
「李知珩。」
忽然有人叫我嘅全名，我嚇咗一跳，我同阿立同時擰轉面，一擰過去就望一個超熟悉嘅人：「媽咪⋯！」
我震驚嘅表情睇起嚟應該好似做咗啲咩虧心事，震驚到我都唔記得我同阿立仲拖住手⋯
媽咪嘅目光向上移望向阿立，阿立比我高大半個頭，我同媽咪差唔多高
「阿姨你好。」阿立恭敬有禮咁點頭
媽咪望住阿立嘅時候，表情有啲細微嘅變化，似乎覺得眼前嘅人係佢識嘅人，但又諗唔起係邊個
「媽咪，佢係許翊瑜。」我幫媽咪喚醒一下記憶，「以前小學嗰個男仔。」
「嘩～好多年冇見你啦～」媽咪即刻有啲激動，本來皺起嘅眉頭都舒緩咗落嚟，「你媽咪點呀？一眨眼你都咁高大靚仔啦～」
「阿姨你都冇咩變過啦，我媽咪都好好。」阿立兜個圈讚我媽後生，我媽即刻笑到見牙唔見眼
「哎！你真係識講嘢～阿姨都一把年紀啦，真係睇住你同知珩一齊大⋯」媽咪有啲感慨咁將阿立由上而下打量，所以佢應該見到我同阿立拖住手
媽咪冇太大反應，只係望一望我，好似係佢意料之中嘅事一樣
「嗰陣你突然搬走，知珩都唔知喺屋企喊咗幾耐⋯！氹都氹唔到⋯」媽咪忽然提起，阿立望向我嘅視線有啲意味深長，我只係覺得尷尬，「宜家又見番啦。」
「媽⋯！」我即刻拉我媽咪嘅衫袖，難為情咁低聲叫佢一聲阻止佢再講
「好啦好啦，唔拆穿你啦⋯！」媽咪知我尷尬，無奈咁揮一下手
「你去邊呀呢個時間？」我忽然發現媽咪點解同我地喺同一個月台，我以前嘅屋企喺反方向呀
「拎啲嘢比個朋友，唔會阻住你地嘅。」媽咪笑一笑，示意我唔洗擔心佢
我冇擔心佢會喺度，我只係擔心佢喺阿立面前又唔小心講咗我嘅小秘密出嚟，而且都擔心佢發現我同阿立一齊住⋯
我同阿立番到屋企，阿立喺閂埋門嘅瞬間就即刻急不及待咁開口：「你真係因為我搬走而喊咗好耐？」
「唔係因為你搬走，係因為你搬走之餘仲係不辭而別，我覺得你掉低咗我⋯」我壓抑住自己緊張嘅心平靜咁講，「真係真係唔要我啦⋯」
阿立沉默不語，我抬頭望佢嘅時候，見到佢已經定睛望住我
我將頭靠喺佢嘅胸膛，聽到佢強而有力嘅心跳，心入面好踏實⋯
我抬頭望佢，提手輕捧住佢嘅臉龐，微微踮起腳尖，喺佢嘴角蜻蜓點水一樣輕吻一下：「有時都覺得做大人真係好⋯」
阿立冇講嘢，只係一個偏頭準確無誤咁錫喺我嘅唇上，我冇推開佢，默默咁接受，默默咁提起手拉住佢嘅衫袖
小朋友知道乖先可以有糖食，大人要承受得起食糖嘅後果⋯
「唔可以呀～」我豎起食指抵喺佢唇前制止佢
「唔可以？邊個錫邊個先？」阿立一副興師問罪嘅樣望住我，「你好意思話唔可以？」
阿立耷低頭，映入眼簾嘅係佢有啲失落嘅眼神：「如果可以唔等真係一秒都唔想等⋯」
「嗰句真係有咁重要咩？」我側住頭望佢柔聲問道，「你唔係一向同我心有靈犀㗎咩？」
「親口承認唔一樣⋯」阿立搖搖頭，「我地已經嘥咗好多時間⋯」
我定睛凝視阿立嘅雙眸，想靠我嘅雙眼睇穿佢心底嘅想法⋯
眼前嘅人，係我曾經幻想過無數次喺再見嘅時候要講咩嘅人⋯
我諗過再見佢嘅時候要用咩表情⋯會唔會已經冇咗嗰種心動嘅感覺⋯
我要用咩眼神同心情去面對佢？佢又會用咩表情同心情嚟面對我？
但喺拎住行李嚟到、佢打開門嘅一刻，我終於明白人地講嘅「認真心動嘅一次嘅人，再見都係會心動」嘅意思
「冇，我地冇嘥時間⋯」我踮起腳尖攬住佢，頭埋喺佢嘅頸窩中，「只係再花咗少少嘅時間去確定回頭係啱⋯我地冇嘥時間㗎⋯你都係我中意嗰個人。」
喺佢伸手回擁我嘅時候，我不禁將佢抱得更緊，我只係花時間去確定自己嘅心意，由一開始，天秤就傾向佢⋯
「嗯，我知道⋯」阿立點點頭，然後就鬆咗手
佢應該真係知道，但我都知道佢想我好明確咁答佢⋯
⋯
喺差唔多一個星期之後
「今晚收工去唔去食飯呀？」樂恩企喺我隔離，偷望咗廚房一眼之後細聲咁問我
「我就唔啦，番屋企食。」我笑一笑拒絕，然後細聲咁問樂恩：「你點解要咁細聲問我？」
「呃⋯我費事太大聲嘛⋯！」樂恩即刻講道，但好明顯係藉口嚟
IG Link: https://www.instagram.com/nd_cotttoncandy/?hl=zh-tw