【愛情】關於我一覺瞓醒發現喺初戀屋企⋯！: 94. 怦然心動
「你以前有冇拍過拖？」我沿住啱啱嘅話題問落去，只係隨便搵個話題
不過我問完都覺得自己蠢，點可能冇拍過拖？
「有呀，不過都好幾年之前啦～」佢嘅語氣好輕鬆，睇嚟真係好一段日子之前嘅事先可以咁從容咁講出嚟，「然後都冇再拍拖。」
我直盯住佢望，雖然比我大少少，但我覺得係我可以接受嘅範圍；外表都幾好睇，淡妝濃妝都啱佢；身上散發住嘅氣質同我身邊嘅女仔都好唔一樣
「Sorry sorry！」「唔緊要。」
「思齊？我企穩㗎啦。」佢叫咗我一聲，我耷低頭望一眼，即刻鬆開手
大概係啱啱怕嗰個行過嘅人會撞到佢，所以下意識就伸手捉住佢嘅手腕
「Sorry⋯我啱啱怕你會跌⋯」我唔好意思咁講道
「唔洗sorry，啱啱唔該你啦～」佢若無其事咁對我微笑，但我嘅心臟喺呢一刻正瘋狂咁跳動緊
我默默咁行喺佢身旁，感覺佢同知珩差唔多高，都係矮我半個頭左右，呢個身高差唔錯
⋯
食完飯之後我送佢番屋企，我地住嘅地方唔係差好遠
「好啦，我到啦。」浩宜轉過嚟望向我，「送我番唔麻煩你啦。」
「唔麻煩，都係順路啫～」我連忙搖頭，心入面有少少嘅失落感，「我地下次再約⋯」
「下次？」佢嘅表情有啲驚訝，可能冇估到我會約佢再出嚟
「嗯，下次⋯唔可以？」我心入面有一絲擔心閃過，怕佢唔想，所以即使就追問佢一句
佢安靜咁望住我，好似思考緊要答應定拒絕先好，拜托你答應⋯
「唔⋯」佢有啲猶疑，然後露出爽朗嘅笑容，「好呀，下次見。」
喺佢答應嘅一刻，我感覺我嘅雙眼都即刻有亮光，唔通呢個係一見鍾情嘅美好？
「唔知佢係點樣諗我呢⋯」我望住玻璃倒影中嘅自己，「我今日咁著都冇好幼稚呀⋯都係裇衫長褲⋯」
本來今日番學都係諗住一個頹look，但諗起今日約咗佢，所以今朝早番學之前比平時早咗成個鐘起身，喺屋企襯咗勁耐衫
「佢會唔會介意我細過佢⋯？」我心入面有一絲憂慮飄過，「好似好少女仔可以接受姊弟戀⋯」
明明先識咗一個月，但已經忍唔住去諗呢個問題⋯會唔會太衝動⋯？會唔會諗太多⋯？
「算啦算啦⋯番屋企啦⋯」我低聲自言自語道，然後搖搖頭
聽日好似係早堂⋯所以我都係唔好諗咁多，乖乖地過埋個final year，畢業出嚟搵嘢做，做一個社畜好啦⋯
⋯
我今日戴咗cap帽，只係單純咁襯衫用，企喺月台嘅時候，望住月台幕門嘅玻璃倒影，我都唔係幾睇到自己個樣
「唉⋯好眼瞓⋯」我合埋眼閉目養神，琴晚唔知點解一直瞓唔著
我望住玻璃嘅倒影，偶然望到企喺同一個車門嘅另一邊排緊隊嘅人，我同佢兩條隊就隔咗個綠色嘅箭嘴喺中間
我向中間邁出右腳踏一步，伸手輕拍一下佢嘅膊頭；專心睇手機嘅佢猛然抬頭，向我呢一邊望
「嗨～早晨。」我將帽推起少少，等佢望到我係邊個
「早晨，咁早喺度見到你？」佢望到我個樣之後笑一笑
列車駛到之後，上車嘅時候我自然咁行到佢隔離，佢望一望我，然後向車廂嘅中間行入去，我跟喺佢身後，後面仍然有人上緊車
我抬手捉住掛喺上面嘅扶手，車門啱啱好擦過門前嘅人嘅衫同背閂埋門，列車開出嘅一刻，浩宜向後踏咗一步，背撞上我
「Sorry⋯」浩宜擰轉頭抱歉咁同我講咗一聲，「我係唔係踩到你？」
「冇⋯」我搖搖頭，啱啱佢一擰轉頭嘅時候，一陣清新嘅香味即時飄過
「今日又會咁啱撞到你嘅？以前好似都冇見過你。」佢成個人轉身面向我，散落嚟嘅長髮微微左右擺動，又一次散發住一種成熟嘅氣息
「可能見過呢～只係嗰陣未識。」我唔敢一直定睛望佢，視線稍微移開少少
「都有可能，今日咁早就要上堂啦？」佢對我微微一笑，我本來平靜嘅內心隨即有陣陣波瀾
「今日早堂，好眼瞓⋯」我無奈一笑，「所以戴定帽方便我上lecture嗰陣瞓覺。」
「好好珍惜有得上堂嘅時候啦，上咗嚟做嘢就冇得咁chill。」浩宜不禁感慨
列車駛入下一站嘅月台嘅時候忽然一個剎車，車上面嘅人都即刻失咗重心要搵扶手捉住
我都一時失咗重心向前跌咗兩步，今次我正面就撞落浩宜度
佢今日著住高踭鞋，同我嘅身高差即刻拉近咗唔少，佢抬起頭望我嘅時候，我同佢離得好近，大概係我只要微微彎腰就可以錫到⋯嘅距離⋯
「噗噗！噗噗！噗噗！」
心臟用力收縮又放鬆嘅聲音喺我體內回盪，喺耳中迴響；佢下意識伸喺輕輕推住我防止我跌落去同時，我嘅手喺跌向前嘅一刻，反應已經迅速咁提起捉住離我最近嘅三角扶手
「有、有冇撞到你⋯？」我因為緊張都有啲口窒
「冇事冇事。」佢只係搖搖頭，臉上仍然掛住微笑
佢同知珩比我嘅感覺真係完全唔一樣，知珩係嗰種好有「仙氣」嘅溫柔姐姐，浩宜係好從容、有啲豪氣嘅爽朗姐姐，特別係有種情場高手嘅feel⋯
「噗⋯！你戴住帽我都可以睇到你面紅啦～」佢望我一眼就笑咗出聲，但因為喺車入面，佢有意咁壓抑住笑聲同笑意，「你唔洗唔好意思～架車突然剎掣，企唔穩好正常，一人一次當打和啦～」
我唔係因為剎車撞到而唔好意思，雖然都係有呢個原因喺入面，但係⋯就係會感覺到原因冇真係咁純粹⋯
「我冇唔好意思⋯」我有啲口硬咁否認，我唔想佢覺得我就係小朋友
明明只係差4年，點解講到差咁遠咁？要追嘅話，算唔算難度高⋯？
「你幾時再嚟cafe？」我主動問道
「唔知㗎～得閒又行開嗰邊嘅話就去啦～」佢笑道，佢一笑，我又會忍唔住望多佢兩眼
知珩話過佢冇男朋友，即係我可以放心拉距離，佢大過我，佢應該會有少少⋯顧忌？
「下次再嚟呀～請你食⋯甜品？」我試探般開口
IG Link: https://www.instagram.com/nd_cotttoncandy/?hl=zh-tw