【愛情】關於我一覺瞓醒發現喺初戀屋企⋯！: 80. 小把戲
「哈？你仲問我點？你真係渣男嚟。」游巧盈沒好氣咁冷笑一聲，我感覺佢下一秒就要開口鬧我，「你同李知珩真係襯到絕！」
「多謝，我冇否認過我係渣男，由你同我一齊之後第一次問我開始，我一直都係咁樣答你。」我從容回答，「你唔死心又要問我一次，仲要上嚟求證，我提咗你唔好㗎啦。」
「許翊瑜！以前點解冇發現你咁渣？」感覺游巧盈已經係咬牙切齒咁講，「搞到我比李知珩窒到冇聲出⋯！」
「咁又賴我？」我聽到佢咁講真係有啲無言以對，「你自己要喺知珩面前亂講嘢，咁又賴落我度？」
「唉！唔同你計較咁多！」游巧盈講道，冷靜咗半秒後又開口：「我話你，就真係咁肯定佢會同番你一齊？你唔怕佢有其他選擇呀？唔係我要讚佢定點，佢真係有條件可以有其他選擇，青梅竹馬真係敵得過天降？」
「嗯，敵得過。」我嘅內心對呢件事都叫有信心
真係多得游巧盈嘅助攻，我都可以察覺到知珩心入面嘅天秤傾向我，我唔知游巧盈出於咩原因要幫我一把做助攻，我都覺得好奇怪，明明佢同知珩係睇對方唔順眼嘅存在
「請我食飯，我幫咗你個大忙。」游巧盈用理所當然嘅語氣提出要求
「再同你食飯，知珩真係會嬲死我⋯」我行到去廚房門口望一眼外面，確保知珩唔喺度
「我幫咗你一個大忙，仲要比佢窒到應一應！你請我食餐飯都好合理係唔係？」游巧盈嬲爆爆咁反問我
「你地唔係死對頭嚟咩？你做咩要幫我？」我問出我一直覺得好奇嘅問題
「冇呀，見你渣得咁徹底，咪幫下你！」游巧盈請講呢句嘅時候，語氣都特別高傲，果然佢嘅本性都係一個要面子嘅人，「你呢餐飯我就keep起先啦，遲啲你地一齊番，呢餐飯我追李知珩請！」
「Okay，隨便你啦，收線啦。」我無奈一笑，然後就掛斷電話
知珩會嬲，係我意料之中嘅事，我只要佢選擇我，我亦相信最後佢會揀我
喺餐廳食飯嘅時候，其實我都可以見到知珩同嗰個整甜品嘅男仔一齊，我嘅直覺覺得，大概係佢同知珩講咗啲咩，搞到知珩心理疲倦
「表白啦大概係⋯」我拎住手機，喺廚房低聲猜測道，「好彩今日窗邊嗰陣咁啱望到⋯」
知珩最後會揀我，我信佢會揀我⋯
⋯
今日我番到公司嘅時候，見到我嘅枱頭又放咗一份三文治喺度，最近都係咁樣
「你番嚟啦？」坐喺我隔離位食緊早餐嘅Ella見到我番嚟，即刻就抬頭望我
「你㗎？」我拎起枱面嘅三文治望一眼，係餐蛋治
「哦，嗯⋯」Ella瞄一眼三文治，抬眼望我，帶住甜美嘅笑容點頭，「買早餐嘅時候買多咗份，但我宜家都半飽啦，請你食啦～」
「唔洗啦，我食咗早餐先番嚟。」我拉開櫈坐低，左手打開電腦，右手將三文治放番喺佢個位
「嗯，好啦⋯」Ella嘅笑容塌咗落嚟，但睇得出仍然係努力扯起嘴角
「做咩一大清早就咁冇精神呀？」Mavis喺呢個時候行過嚟
「吓⋯？冇呀。」Ella回頭望佢，搖搖頭
「唔⋯」Mavis側住頭望Ella，我都懶得理佢地，開咗電腦就準備做嘢
食完飯番嚟嘅時候，距離lunch hour結束都仲有十分鐘左右，我拎起枱上嘅水杯行去茶水間酙杯水
「嗨～」Mavis拎住水杯跟喺我身後行入嚟，我只係望佢一眼，準備開口嘅時候佢就開口：「你咁樣唔得㗎～」
「吓？咩唔得？」我輕皺起眉頭，唔太明佢講緊咩，「我酙水又唔得？」
「你真傻定扮蠢？」Mavis反我一個白眼，後靠望一望外面有冇人經過，「人地小妹妹做到咁明顯你都唔get？」
「吓？」我雖然有啲頭緒，但都係唔想估，繼續當唔明算
「你唔係睇唔出Ella中意你呀嘛～」Mavis湊過嚟，膊頭貼住我嘅膊頭低聲同我講，「人地小妹妹成日痴住你買lunch又買咖啡，又買埋早餐比你，你唔係一啲都睇唔出呀嘛？」
「係咩。」我冇太在意咁聳肩，「冇咩留意。」
「喂，我覺得Ella人又可愛身材又唔差，諗得過喎～你都冇女朋友，佢又中意你，係唔係諗得過呀～」Mavis同我好似好熟咁搭住膊頭傾密計，「你唔好辜負人地一番心意嘛。」
「我咩都冇做過，點辜負佢一番心意？」我無奈咁笑問
「Ella好女仔嚟㗎，諗得過～你唔通要等人地開口咩？」Mavis嘅語氣唔多唔少有啲慫恿嘅意味，「明眼人都睇得出佢暗戀你啦～」
「嗯，你幾時中意做呢啲撮合人嘅嘢？」我挑起眉望佢
「冇～只係唔忍心見到Ella咁慘一直單戀啫～」Mavis笑道，「而且又見你單身寡仔一個人⋯喂喂喂！」
我都懶得聽佢講完佢嘅偉論，我直接就拎住水杯想行出去，但佢又捉住我膊頭
「咁我單身寡仔一個又唔代表我冇中意嘅人嘅。」我拍一拍佢嘅手背，然後將佢隻手推開直接行出茶水間
「係咪呀？你唔好隨便搵嘢嚟做藉口喎⋯」Mavis懷疑咁望住我
「我有冇搵藉口嘅必要？」我無奈咁加快腳步行番埋位
「阿瑜阿瑜！晏晝一唔一齊食飯？」Ella喺我番到埋位坐低嘅時候問，「連埋Mavis一齊。」
「好呀。」我微微點頭，Ella即刻就開心咁笑
⋯
「Mavis叫我地行去攞位先⋯」Ella行出部門門口嘅時候
「哦，好。」我擰轉頭望咗一眼，然後就同Ella一齊離開公司
「你唔洗理Mavis講咩㗎，佢就係亂講一通⋯」Ella突然咁樣講咗一句，「佢成日都講埋啲奇怪嘢⋯」
好可惜Ella係一個唔識講大話嘅人，佢咁樣講嘅時候，都冇察覺到表情出賣咗佢嘅想法，而且愈解釋唔係愈掩飾咩？
「我冇聽佢講，知佢成日講埋啲無謂嘢。」我順住佢嘅說話附和佢
IG Link: https://www.instagram.com/nd_cotttoncandy/?hl=zh-tw