【愛情】關於我一覺瞓醒發現喺初戀屋企⋯！: 79. 是我的
「吓？我喺度住，我梗係會喺度。」我微笑回答，不過語氣聽起嚟應該係挑釁居多
「吓⋯？」游巧盈訝異嘅目光朝我身後望去
係喎，阿立喺度
佢係想阿立比一個解答佢⋯？我擰轉頭望阿立，伸手示意：「許翊瑜，請。」
「你把遮漏咗喺餐廳⋯」游巧盈嘅笑容仍然僵硬咁掛喺臉上
「唔該。」阿立行過嚟伸手迅速接過游巧盈手中嘅縮骨遮，「仲有嘢？」
「冇啦⋯」游巧盈搖搖頭，然後望我一眼又望一望阿立
「仲有嘢要還？」我毫不客氣咁問，「你仲有嘢搵阿立？」
我挺直腰企好，我本來就高過游巧盈，游巧盈見我企直個人，即刻就下意識後退咗一細步
「你兩個⋯真係一齊番？」游巧盈半信半疑咁輕皺眉頭，「上次班聚嘅時候，明明你地都話冇一齊番⋯」
我將目光投向阿立，佢望一望我，嘴角一個細幅度上揚：「嗯，係呀，諗緊幾時結婚添。」
「講到咁遠啦？」我比佢逗笑，真有趣，更有趣嘅係望住游巧盈呢個明明失落但又要強顏歡笑嘅表情
「哦，係呀⋯」游巧盈一個強顏歡笑，我嘅心情莫名地好咗啲
「我覺得你上次喺班聚同我講嘅嘢真係好啱。」我對游巧盈露出虛偽嘅微笑，我嘅視線稍微向下，帶住少少諷刺嘅意思又開口：「邊個，係邊個嘅代替品，都未知。」
我只係基於佢所知嘅假象講出嚟，而且，我睇佢唔順眼；如果佢呢一刻知道我同阿立根本冇一齊番，我唔會咁講
「李知珩你⋯！」游巧盈唔忿氣，但又諗唔到要點樣反駁我
「將阿立⋯嘅嘢還番嚟，麻煩你啦～」我微笑道，揀咗一個好啱用嚟激佢嘅停頓位，「夜啦，路上小心。」
「呯—」
我都唔理游巧盈要轉身走定係仲因為一時間資訊量高大而發緊呆，直接就閂埋門
我個人先轉咗一半，差啲撞到阿立，我即刻向後移咗步
「咩呀？」我默默咁將視線移開唔想同佢對望
「冇。」阿立淺笑，「消氣未？」
「我又冇嬲。」我輕哼一聲，「我番房啦。」
「喂⋯」阿立嘅笑容又變得有啲無奈，伸手拉起我隻手，指尖由我嘅手腕掃到我嘅手心
微微觸電嘅感覺令我嘅手反射性咁縮咗一下，當佢輕握住我嘅手嘅時候，我自然就回握咗一下，阿立嘅手少有咁冰涼⋯
佢喺我冇防備之下拉咗我一下，我直接撞入佢嘅懷中，我無力反抗，只係由得佢攬住⋯
本來心入面嘅怒意同不安感，就喺比佢攬入懷中之際消咗一半，熟悉嘅氣味永遠都會令人覺得安心，明明好不安，但又會有種矛盾嘅安心感
「今日有咩令你咁心煩？」阿立嘅溫柔又令我嘅氣又消一半
我諗咗一陣，有一刻想佢有啲危機感，想同佢講阿逸表白啦，但一方面又唔想喺呢個時候講出口，顯得好似好故意咁⋯
「所以你答咗游巧盈啲咩⋯？」我嘅左手提起，捉住佢嘅衫角，我都係想知道佢最後嘅答案
「唔⋯好賤咁答咗佢係。」我冇睇到阿立嘅表情，淨係聽到佢感到抱歉一樣嘅語氣同笑聲，「我太衰啦，但我唔會咁對你⋯」
「嘟嘟⋯嘟嘟⋯你所打嘅電話號碼—」
唔知點解，我個腦入面響起冇人接聽嘅語音，忽然間覺得好擔心⋯阿立會唔會喺某一日又突然間不辭而別？
「阿立⋯」我捉住佢衫角嘅手鬆開，手由佢嘅側腰移到佢嘅後腰，「以後⋯唔好不辭而別得唔得⋯？唔好再⋯突然間喺我面前消失⋯好唔好⋯」
「做咩突然間又去咗呢個問題⋯？」阿立無語咁笑起嚟，「我冇走呀，我喺度。」
「我，好怕你又會突然間消失喺我面前，好似嗰陣咁，咩都唔講就走咗⋯」我諗起以前佢嘅不辭而別，心入面冒出一種難以言喻嘅窒息感，「電話打唔通、message搵唔到⋯」
「對唔住⋯嗰陣，係我錯啦⋯」阿立嘅語氣中係濃濃嘅歉意，「唔好喊啦好唔好⋯？」
嗯⋯？原來我喊啦⋯因為同一件事而喊啦⋯因為佢不為意嘅「提醒」，我先感覺到眼眶嘅濕潤
「我真係怕啦⋯好怕你會唔見，又一次咁⋯」我因為佢發現咗我喊而忍唔住哽咽起嚟，「掉低我一個⋯」
「我唔會再突然消失，我應承你，會一直喺你身邊⋯」阿立鬆開我，用指尖幫我抹眼淚
我抿緊唇冇即刻開口回答佢，只係抬起頭，有啲猶疑咁望住佢；阿立成個人微微向我湊近，我成個人都冇避開，只係企喺原地望住佢逐步靠近
喺佢耷低頭錫我嘅時候，我冇避開，抬起頭有啲回應佢一樣，掂起腳尖拉住佢嘅衫角
成年人嘅關係，原來可以係咁不明不白，可以咁模糊，可以唔需要確認關係都可以做到呢種地步；以前明明就算拖個手都要喺確定關係之後先可以做，靠近少少都會面紅耳熱⋯
埋喺心底熟悉嘅感覺又再一次番嚟，渾身發熱嘅感覺令我覺得唔習慣，喺唇上嘅軟柔係我無法抗拒嘅觸感
佢好似知道我掂起腳尖遷就佢好辛苦，佢一下就抱起我，將我抱到枱上坐喺枱邊
「點解就咁難捨難離⋯？明明一手推開就可以⋯」我喺心入面不解咁問自己，雙手已經喺啱啱離地嘅一刻自動咁環抱佢嘅頸
空氣變得熾熱，嗰種火辣辣嘅感覺喺我同佢之間徘徊
當已經有種缺氧感嘅時候，我同佢先慢慢停止落嚟，佢自己都微喘住氣，感覺真係太放肆啦⋯
「我仲未落妝⋯」我望到佢嘴邊嘅豆沙色唇膏印，我先驚覺原來自己仲係維持住收工番嚟嘅狀態
我轉身抽咗張紙巾㩒喺佢嘅嘴上，然後直接推開佢、跳落地，一連串行如流水嘅動作搞到阿立都有啲措手不及
「我去沖涼啦，你都早啲休息⋯」我都可以聽得出自己夾雜住羞澀嘅聲線，今晚係真係怕醜啦
⋯
⋯
⋯
我望住知珩小跑番房，嘴角就忍唔住上揚起嚟，我拎住佢比嘅紙巾抹一抹嘴
「唇膏印⋯」我望住紙巾上面嘅一抹豆沙色嘅痕跡，「難怪都面紅啦⋯」
一直放喺褲袋嘅手機突然喺度響，螢幕上寫住「游巧盈」三個大字，我默默咁行入廚房先㩒接聽
「喂？點呢？」我喺佢開口前就先開口
IG Link: https://www.instagram.com/nd_cotttoncandy/?hl=zh-tw