【愛情】關於我一覺瞓醒發現喺初戀屋企⋯！: 81. 以後會好嗎？
「哦，嗯⋯都係。」Ella抿住唇微微點頭，「聽佢講呢～你有中意嘅人～」
「佢都幾口疏⋯」我無奈咁講道，望住眼前嘅Ella眼中有一絲期待閃過，我微微點頭：「係呀。」
Ella眼中嘅期待比我一句肯定一掃而空，我對佢完全冇嗰種想法，所以用最簡單直接嘅方法處理就可以
「有冇相睇呀？」Ella笑問，就好似啱啱嘅佢冇任何失望一樣
「冇呀。」我搖搖頭
「吓～」Ella擺出失望嘅表情，用嚟掩蓋佢啱啱嘅失望，「連中意嘅人嘅相都冇，你點中意人㗎！」
「保持神秘。」我將手指抵喺唇前
「靚唔靚㗎？」Ella好奇咁追問
「幾啦。」我簡單直接咁回答，「係以前嘅同學。」
「哦～」Ella愣咗一下，然後抬起下巴露出明白嘅表情
咁樣，唔係間接斬斷有可能嘅機會？佢大概明白暗裏嘅意思
「Mavis仲未到嘅⋯」Ella擰轉頭望一眼
「佢應該就到。」我下意識拎出手機望咗一眼，Ella行到我對面嘅位置坐低，「你睇咗食咩先。」
我將餐牌推比Ella，等佢睇完嘅時候睇一陣手機，社畜嘅日常都係咁冇趣，日復日嘅重複生活，唔經唔覺又幾年
咁啱見到知珩po咗story，我㩒開睇完之後就順便覆佢嘅story：「今日好得閒？」
「幾啦～冇咩客」知珩好快就覆我，睇呢個回覆速度，我都知道佢真係好得閒，「今晚我番屋企食，你要食自己啦」
「好啦，咁我食自己啦今晚」我喺最後加咗個唔開心扁嘴嘅emoji
「Mavis！」Ella忽然朝住門口嗌咗一聲
「叫咗嘢食啦？」Mavis問，未等我地開口答佢，佢突然間抬頭望住天花板，「Ella你嗰邊風口位凍唔凍？」
「少少啦，不過都okay。」Ella順住Mavis嘅目光抬頭望一眼，然後比咗個okay手勢
「你坐呢邊啦，呢邊個風冇咁勁。」Mavis都唔等Ella答佢就已經企起身要同Ella調位
「哦，好呀⋯唔該⋯」Ella有啲唔好意思咁起身同Mavis換位，坐低喺我隔離
Ella冇同我坐得太近，就係正常嘅社交距離；我托住頭望住Mavis，Mavis對我微微一笑，佢係特登，人地講咗有中意嘅人都要咁樣夾硬嚟⋯
⋯
夜晚
知珩食完飯走嘅時候send咗message同我講，我預好時間就喺屋企出門口，慢慢行去地鐵站等佢
我企喺地鐵站嘅出口隔離等知珩，佢每個星期都一定會抽一日番屋企食飯，感覺佢仲係好痴家，好錫佢嘅爸媽
「我都好似成幾個月冇番去食飯⋯」我默默咁回想一下對上一次番屋企食飯係幾時
「阿立！」知珩行出地鐵站，一眼就見到我，踏住輕快嘅步伐跑向我，「等咗好耐？」
「一陣啦。」我搖搖頭，「行啦，番去啦。」
「我媽咪今晚煲咗湯，又再裝咗一壺比我，番去比你飲呀～」知珩聲線愉悅，臉上掛住笑容
「嗯，好，多謝⋯」我微微點頭
「好似好少見你番屋企同阿姨食飯嘅⋯？」知珩望住我，表情睇起嚟有啲擔心，「阿姨冇抱怨你咩？」
「冇，佢冇抱怨我。」我只係搖搖頭
我搬咗出嚟之後都好少特登番去同我媽食飯，以前未搬出嚟會覺得冇咗阿媽就咩都唔得，唔識煮飯又唔識做家務，痴住阿媽好似係最好
但搬咗出嚟之後就逼住要自己學自己做，收工又好攰，淨係同阿媽傾個電話就算，都懶得特登番去食飯，獨立咗就發現，其實要獨立都唔係咁難嘅事
「我一星期番去食一次飯，我媽都要抱怨我啦⋯」知珩拍一拍我嘅膊頭，「你得閒就番去同阿姨食下飯啦⋯」
「佢歡迎我嘅話⋯」我無奈咁耷低頭苦笑
「阿姨點會唔歡迎你？你肯番去食飯嘅話，佢開心都嚟唔切～」知珩笑道，佢伸手拉起我嘅手腕同時加快腳步，「行快啲啦，陣間個湯要凍啦！」
「你呢個唔係保暖壺嚟咩？」我望住佢手上拎住嘅銀色壺，「你番嚟都係幾個站，唔好當我唔知。」
「快啲番去飲湯唔好咩？」知珩側住頭理所當然咁問我
「好，當然好。」我點點頭，「次次阿姨煲嘅湯，靖佑都冇飲到真係可惜。」
「講起靖佑，我同咗靖佑講啦⋯」知珩講道
「哦⋯講咩？」我下意識就點頭，但點完頭先發現我唔知佢講咗啲咩，「湯？」
「唔係，我同咗佢講，你係我前男友。」知珩平靜咁講
「哦⋯冇咩所謂。」我只係聳肩，我又唔會太介意，就算許靖佑係知道都唔係咩大件事，「知咪知。」
只係聽到知珩話同咗許靖佑講之後，我心入面居然有一絲開心嘅感覺，好似係啲咩好期待咗好耐嘅事一樣
「佢咩反應？」我不禁有啲好奇
「佢？佢一直話你有幾好幾好囉～讚到你識飛啦～」知珩笑起嚟，伸手戳我嘅手臂，「都唔知靖佑係邊個嘅朋友，下下都讚你幾好幾好⋯」
「喂，李知珩⋯」我罕有咁輕喚佢嘅全名，「我好唔好你唔知咩？要靠佢講？」
「我點知道你好唔好？」知珩特登撇開臉唔望我，「太耐啦，我冇真係咁了解你⋯」
「係咩？」我輕笑一聲
「係呀。」知珩低聲哼咗一聲，下一秒伴隨住受傷嘅眼神柔聲開口：「我都以為你會一直對我咁好⋯」
IG Link: https://www.instagram.com/nd_cotttoncandy/?hl=zh-tw