【愛情】關於我一覺瞓醒發現喺初戀屋企⋯！: 78. 撞破

我嘅目光往左邊平移，想好奇一下坐佢對面嘅係邊個，但當目光落喺佢對面嘅人嘅身上嗰一剎那

我愣住咗半秒，不禁瞪大眼，心裏半自嘲一樣笑出嚟：「原來許翊瑜今日約咗游巧盈食飯～」

「你⋯有中意嘅人啦？」阿逸小心翼翼嘅語氣將我拉番嚟，我回神望向佢

小心翼翼嘅語氣，係試探⋯

我選擇沉默，唔知道要答佢係定唔係，佢會咁樣問我，有呢個猜測都係正常事，只係要答嘅時候，講到嘴邊我就講唔出口





而且我個腦宜家唔知點解好混亂，想講啲咩，但又諗唔到可以講咩⋯

「其實唔緊要，我只係想話比你知我係中意你呢件事。」阿逸微微一笑，但佢嘅笑容喺我眼中睇起嚟好似要掩蓋某啲事一樣

呢個睇起嚟似無慾無求嘅講法，唔係就係已經預計好我會拒絕佢？等我拒絕佢嘅時候，至少唔會令自己太難受，係預先安慰自己，比個心理準備自己嘅意思⋯

「唔⋯你唔洗太介懷啲咩，我亦唔係即刻要你比個答案我⋯」阿逸嘅強顏歡笑令我嘅內心有啲刺痛，好怕人地呢個受傷嘅表情，「只係都可慮下嘛～以後，你再答覆我都唔遲！」

「嗯，好⋯」我順住佢意微微點頭





難怪佢早一排一直問我同戀愛拍拖有關嘅事，原來係打算要表白⋯

「就算以後係繼續做朋友都好，你都同我講聲。」阿逸一直要避免比壓力我一樣，將所有嘢都攬上身

「好。」我點一點頭，佢都後退到呢個地步，我唔答應嘅話會顯得我好小氣

佢將我送到屋企樓下，我用平時同佢相處嘅方式同佢講拜拜，佢微微一笑向我揮揮手

「哈⋯呼⋯」我轉身行入大堂之後，緊張綁緊嘅心終於放鬆落嚟





今日⋯應該話最近點解好似發生咗好事咁⋯？搞到我都有啲手忙腳亂，個腦都混亂到所有嘢都變成一堆嘢堆埋一齊⋯

「又會咁啱係今日⋯」我諗起阿逸啱啱嘅表白，同阿立同游巧盈，「係個天比機會我諗清楚嘅意思⋯？」

「好混亂」我喺group打咗個message，想send比靖佑同浩宜，同佢地講下

但喺指尖要㩒落去將message send出去嘅時候，我默默咁delete咗成個message

「算啦⋯」我低聲對自己講道，「冷靜下先再算⋯」

我都唔知我喺梳化坐咗幾耐，發呆發咗幾耐，我再次回神坐好嘅時候，係聽到鎖匙開門聲嘅時候，我企起身準備番房之際，大門打開

阿立望到企喺梳化前嘅我嘅時候明顯愕然咗半秒，然後好似冇事發生一樣收起愕然嘅表情

「啱啱番嚟？」阿立坐低喺鞋櫃邊嘅櫈仔上解鞋帶除鞋





「唔係，已經番咗嚟一陣。」我淡然回答，連望都冇望佢一眼

大腦已經夠亂，今日要吸收嘅嘢已經夠多，大腦有啲負荷唔嚟⋯一望到夠立，我就諗起佢明明話佢同游巧盈冇關係，但係仲可以開開心心咁約出嚟食飯

「哼⋯」諗到呢度，我輕哼一聲冷笑，然後直接行番房

沖完涼之後我先去煮嘢食，係，我仲未食飯，今日就普通咁食個公仔麵算；喺我食完嘢開水洗番乾淨啲嘢嘅時候，阿立沖完涼，拎住要洗嘅衫褲行入嚟廚房

「心情唔好？」阿立忽然開口，佢察覺到我嘅心情

「冇。」我好似下意識舉動一樣否認，聲線都冷冷淡淡，將洗乾淨嘅嘢放喺一邊

「邊個激嬲你？」阿立靠住雪櫃，企喺我身旁問我





「冇。」我回答嘅速度幾乎係承接住佢講嘅嘢嘅最後一個字

唔通我仲要話比你知係見到你同游巧盈一齊食飯唔順眼？當我傻？

「但係你呢個表情，明顯係嬲緊⋯」阿立比我嘅迅速回答嚇窒咗，語氣既困惑又小心

「你今日做咩一直同我講嘢？」我自己問完都覺得自己莫名其妙，但嗰道氣頂住喺心口落唔到

「我地平時都會傾計⋯」阿立有啲愕然我會咁問佢，然後有啲無語咁笑一笑

我閂上水喉，用掛喺隔離嘅抹手布抹手，一同阿立對上眼，我就諗起佢同游巧盈兩個人喺餐廳食飯有講有笑嘅樣

就講大話氹我啦，之前講咩同游巧盈分咗手，佢嘅事同佢冇關係，今日我就親眼睇到係點樣嘅冇關係

「搵游巧盈傾。」我面無表情咁拍一拍佢嘅膊頭，然後直接喺佢面前大步行出去





「突然間做咩要搵佢？」阿立追上嚟拉住我，一個不明所以嘅表情望住我

「嗯，啱啱喺餐廳都傾夠啦。」我點點頭表示明白理解

我都唔知道我呢一刻會係咩表情咩眼神，但大概係心淡咗一截嘅空洞眼神；喺我呢句說話講出口嘅一刻，我見到阿立嘅雙眼中有一絲慌張閃過

「佢約我食飯，我同佢講咗係最後一次，佢都應承咗，所以我先⋯」阿立想解釋，但我聽完之後只係覺得好笑

「哈⋯許翊瑜⋯」我冷笑一聲，但我完全大腦空白到唔知可以講咩，我淨係感覺到大腦入面都係超唔忿氣，「隨便你⋯！」

我轉動手腕將阿立嘅手甩開，唔想再聽佢解釋，大腦已經超負荷，我淨係想番房好好休息冷靜一下

「知珩！」阿立又一次拉住我，但今次佢捉住我手腕嘅力度明顯比啱啱大好多，「你信我。」





「我唔係你女朋友，你唔洗同我解釋⋯」我由得佢拉住我嘅手腕，今日個腦好攰，唔想同佢爭拗啲咩

見到佢同游巧盈一齊食飯、有講有笑嗰下，我的確覺得難以接受，明明話咗同佢冇關係，點解又要一齊食飯⋯？

「今日好攰，發生咗太多事啦⋯」我將語氣放柔放慢，「你同游巧盈係唔係再見亦是朋友我唔想知，隨便你啦，只係我討厭佢咁解⋯大家都單身，有得揀⋯」

我忽然間諗起班聚嗰陣，游巧盈嗰個得戚樣，佢話揀邊個都未知，佢同阿立會唔會一直有聯絡？

「難怪佢會咁自信。」我望住仍然有啲慌張嘅阿立，「原來因為你地仲有聯絡。」

「只係今次⋯你聽我解釋得唔得？」阿立嘅態度放軟咗啲，「佢係有嘢要問清楚我，所以特登約我食飯，食完走嘅時候，佢話今次係最後一次一齊食飯，佢明白晒。」

「明白晒⋯？明白啲咩？」我嘅好奇心比佢撩起咗少少，「算啦冇嘢⋯」

「佢問我，係唔係搵佢做代替品⋯」阿立好似預知我要甩開佢隻手一樣，喺我嘅手腕準備轉動嘅時候，佢好快咁講咗出口

「咁所以—」「叮咚～」

門鐘忽然響起，我地同時望向門口，我下意識就越過阿立想行去開門，呢個時間會係邊個⋯？

「阿瑜，啱啱你把遮—」

我快步行過去打開門，企喺門前嘅人同我嘅反應一樣，同時呆咗一下

「你點解會喺度⋯？」游巧盈本來準備好嘅甜美笑容都僵硬咗




IG Link: https://www.instagram.com/nd_cotttoncandy/?hl=zh-tw