【愛情】關於我一覺瞓醒發現喺初戀屋企⋯！: 45. 差異

「今日個水果撻好好食，又係賣清光～」我笑一笑講道

「啲人中意食咪好，見到佢地食得開心，我都開心～」阿逸先係一笑，然後行到半路忽然間講起呢個問題，「你之前話你冇男朋友，你又冇拍拖嘅打算⋯」

「哦係呀，做咩突然提起？」我睇起嚟好平靜，但心入面有一絲不安飄過

「就係覺得好神奇，你點睇都似係好多人追嗰種～」阿逸若無其事咁笑道

「多人追又唔代表一定有拖拍嘅～」我無奈咁笑





係唔係普遍嘅人都覺得呢個係既定事實一樣，樣好睇就一定有拖拍？冇拖拍好似係啲咩好神奇嘅事一樣，個個都會好愕然

「咁⋯如果有人追你⋯你受唔受？」阿逸遲疑咁問出呢個問題

我望向佢，見到佢好努力咁迴避緊我嘅視線，佢呢個反應、呢個表情⋯好難令人唔諗多⋯

「人地追我係人地嘅決定，我諗我都冇權阻止人地嘅選擇？」我輕輕一笑，只係單純地想令自己覺得佢講嘅同我諗嘅嘢唔一樣

「都係⋯」阿逸愣一下之後先露出笑容





我唔想同阿逸一齊行，感覺好唔自在，特別係佢問完呢樣嘢之後，我內心嘅不安感更大

朋友嘅界線後面，係懸崖定一片花花世界⋯？真係唔知道會係點

「我唔錯呀可？」阿逸擠出笑容側一側頭望我

「嗯，唔錯呀。」我笑住點頭，只係一個出於禮貌又唔想尷尬嘅笑容

接住落去嗰句我冇講出口：「不過，我對你冇嗰種想法。」





我地行到去地鐵站入口，我停低喺原地，阿逸喺我一停低就開口：「送你番去？」

「唔洗啦⋯」我禮貌咁微笑搖頭

喺佢再要開口嘅時候，阿立出現啦⋯！阿立居然遲收工，見到佢嘅一刻，我即刻鬆一口氣：「好彩阿立喺度⋯」

呀⋯點解突然大家都係咁？我唔係覺得阿逸唔好，只係我對佢嘅感覺就在於同事，最盡都係朋友

我沖完涼之後行番房，一拎起手機，就見到浩宜覆我嘅message：「佢擺明係中意你先咁問啦！唔中意嘅話鬼會兜咁大個圈問你咁多嘢咩？」

我企喺書枱前默默撅起嘴，我⋯唔係冇諗，只係唔想去諗同呢樣嘢有關嘅嘢⋯

浩宜又send多咗個message過嚟：「你真係想同你個初戀重新開始？」

我本來想覆啲咩，但浩宜呢個message一出嚟，我即刻呆呆咁拎住手機打唔到字





我思考咗一下之後先慢慢打字：「佢同阿立都唔一樣」

「你一見番佢之後，你又開始迷失晒咁⋯」

「我冇迷失呀，佢本來就係同其他人唔一樣」我理直氣壯咁回覆

「好啦好啦，就算你真係想重新嚟過、就算你心入面有佢都唔好比佢知」浩宜嘅回覆，我都可以睇得出佢嘅無奈屈服，「得閒嗰陣望下其他人，睇下其他人嘅好」

我知道呀，好男人大把 ，我唔謙虛咁講一句，我嘅選擇可以有好多，我明浩宜嘅想法，但係浩宜唔明我嘅想法

「單身就可以揀，你仲可以揀要邊個，我覺得甜品師已經好明顯，但再講得明顯啲就會被拒絕」浩宜又講

「唔好再估，再估嘅話我聽日番工都要尷尬死」我唔想聽日見到阿逸嘅時候覺得尷尬，再估落去只會愈諗愈多





「好啦～我只係提一提你嘛～」

「唉⋯真係呀⋯飲杯水就休息啦⋯！」我拎住手機行出房打算去一轉廚房

以前中學嘅WhatsApp班group一直彈新嘅message出嚟，因為嚟緊有班聚，班上面嘅人忽然間想搞個班聚

Group入面嘅人嘅名仍然係嗰陣我set嗰啲名，望住一個個喺高中嗰三年聽過無數次嘅名，忽然間中學嘅感覺都番晒嚟

「食咩呀？Book定餐廳」「邊個去？去嘅打名」

喺group入面大部分人都即刻打咗個名出嚟，手機不斷有新嘅message彈出嚟

「唔⋯」我有啲猶疑去唔去好，因為都一段時間冇見過

佢地前兩年好似都有搞班聚，但我都冇去，今年⋯有啲猶疑去唔去好⋯





「問下阿立去唔去。」我拎起手機send咗個message比阿立：「你有冇睇班group？你去唔去？」

我拎起水杯飲啖水，見到阿立上線，等佢覆我，呢頭明明係輸入中，但等咗一陣都冇send到嘢過嚟

不過我聽到開門聲，安靜咗兩秒之後我探頭望出去，見到阿立就企喺房門口，一手拎住手機，一手捉住門柄

「喺同一間屋入面，你做咩要特登WhatsApp我？」阿立一個無語嘅表情，然後冇好氣咁輕笑一聲

「見你閂咗房門嘛～」我企喺廚房門口對佢一笑，「所以你去唔去？」

「我會去，你去唔去？」阿立完全冇猶疑，即刻就肯定咁回答我

「唔⋯既然你去，咁我都去啦～」我笑道，聽到阿立話去，我都有啲想去，有人陪我都係好事嚟





「好～好～」阿立嘅笑容好溫柔，佢提手比咗個Okay手勢，然後耷低頭望手機

我嘅手機即刻彈咗一個新嘅通知，阿立喺班group打咗名，我抬頭望佢嘅時候，阿立只係微微笑然後轉身番房

我轉身行番入廚房，心入面有少少激動，心跳好似都加快咗跳動嘅速度

「都唔知大家變成點啦⋯」我將水杯洗乾淨，望住仍然你一言我一語嘅班group

我地班以前都叫開心，吵吵鬧鬧就過咗三年，高中三年好辛苦，但都好開心，但畢業之後就冇再見面啦

稍微回想一下高中嘅生活，好似去到邊都有阿立嘅身影，佢好似成日都喺我身邊同我一齊

佢好似一直以嚟都會喺我目光所及嘅地方，當我地對上視線嘅時候，佢會對我露出陽光嘅笑容，我知道佢對我嘅笑容同對其他人嘅笑容係唔一樣

以前嘅我，對佢嚟講係特別嘅人、特別嘅存在；宜家嘅我，我唔敢肯定、唔敢去諗，我怕我諗多，但佢一句「重新開始」令我難以控制咁去諗多




IG Link: https://www.instagram.com/nd_cotttoncandy/?hl=zh-tw