【愛情】關於我一覺瞓醒發現喺初戀屋企⋯！: 44. 重新開始？
我今日留喺公司做嘢所以又遲走，我唔明點解咁大間公司可以得我一個攝影師⋯仲要搵一個幫唔到我太多嘅助手比我⋯
「唉⋯聽日先再做啦⋯」我將USB抽番出嚟放入袋，呢啲貴重嘢我都慣咗要跟身唔留喺公司
我離開公司，陣間買咩番去食好？咁晏都唔想煮，都係諗下食咩最實際
「呵～欠⋯」我打咗個喊露，感覺有啲攰，所以我即刻就加快腳步行去地鐵站
喺差唔多行到去地鐵站嘅時候，我一眼就睇到一個好熟悉嘅身影企喺地鐵站入口，而且同一個男仔一齊
「邊個⋯？」我喺心入面打咗個問號，「cafe嗰個同事⋯？」
咁樣一諗，我個腦就浮現咗嗰日知珩番到嚟嘅時候，衫上面沾染到嘅香水味⋯疲倦嘅感覺逐漸散去，隨之而嚟嘅係陣陣嘅鬱悶將我包圍住
「算啦⋯」我默默喺心入面講咗一句，冇特登加快腳步行過去，都係原來嘅步速
一直企喺地鐵站出入口講緊啲咩？我都就嚟行到過去，佢地都仲喺原位講緊嘢
嗰個男仔偶然咁離過嚟先一步見到我，不過佢好似唔太認得我，知珩見佢望住另一邊就跟住佢望過嚟
「阿立⋯！？」知珩望到我嘅時候一臉震驚
「嗨～」我打個招呼，順便同嗰個男仔都打聲招呼，佢好似係⋯阿逸？
「嗨⋯」阿逸好似有啲意外會見到我，其實嗰意外，大家都係附近番工
「你仲喺度嘅？啱啱先收工呀？」知珩問我
「係呀，今日有啲忙⋯」我無奈苦笑，有得揀我都唔想遲走，「你未番去住？」
「呀？我番呀番呀⋯！」知珩即刻望向我，佢嘅眼神睇起嚟就好似鬆一口氣一樣，「我行得㗎啦⋯！」
「哦⋯」我企喺原地等埋知珩，反正都係番同一個地方又咁啱撞到
我望一望知珩，又望一望阿逸，我望向企喺知珩面前嘅男仔嘅時候，佢咁啱都望住我，佢禮貌咁對我微微一笑
「咁行啦～」知珩伸手輕輕咁拍咗我兩下，「拜拜，阿逸你都快啲番屋企休息啦。」
「嗯，聽日見～」阿逸對知珩一笑
我望住佢呢個笑容默默挑一下眉，因為見到佢呢個笑容嘅一刻，我忽然察覺到啲咩
我同知珩並肩行入地鐵站，我望向知珩嘅時候，餘光見到阿逸緩緩轉身就行，大概係去搭其他車番屋企
明明係一齊行，但我同佢都安靜得厲害，大家都唔講嘢，中間留番半個身位比人穿過咁
車廂入面所有人都睇緊手機，只有我同知珩冇睇手機同時冇望對方亦冇講嘢，耳邊一直傳嚟地鐵喺隧道入面快速前進嘅風聲
知珩一直都刻意迴避我嘅視線一樣，只要線視一對上，佢就即刻扮不經意咁移開視線
「李知珩。」我少有咁直接叫佢全名，佢輕嗯一聲同時望過嚟，視線同我對上，「我係美杜莎定咩？」
「噗⋯！講緊咩呀～」知珩一下就笑出聲，本來臉上略帶唔自在嘅表情都瞬間柔和起嚟
「我今朝只係問一問，冇其他意思。」我為今朝嘅事解釋道，「我知對我同你嚟講，呢個都係個尷尬嘅問題嚟。」
「唔、唔係呀⋯只係我一時之間唔知要點樣答你先係⋯」知珩垂低頭，雙手捉住袋嘅孭袋捏嚟捏去，「我唔知道，我地係唔係可以重新開始，要重新嚟過真係好難⋯」
「所以，你有諗過要重新開始？」我忍唔住想知道佢嘅真實想法，想知道佢到底係點諗，想佢比一個肯定嘅答案
知珩抬頭望我，笑而不語，喺列車駛入下一站嘅月台嘅時候，知珩先開口以柔和嘅聲線講：「當初，我地都不歡而散，所以，我都唔知道要點樣重新開始⋯我冇諗過真係會見番你，什至會同你一齊住⋯」
知珩講完就撇開臉，對面嘅車門打開，一直有人上車，知珩安靜咁望向黑色嘅牆
我望住佢嘅側面，見到佢紅咗嘅眼眶，我心入面又有啲內疚⋯
我好怕佢嘅眼淚⋯佢嘅每一滴眼淚永遠都準確咁滴喺我心上面，令我平靜嘅心泛起陣陣漣漪⋯
「我明白⋯」我無奈咁慨嘆，望住緩緩閂上嘅車門，「我都唔知道要重新開始嘅話，要喺邊度開始重新⋯」
重新開始，一開始就冇可能喺起點重新嚟過，我同佢嘅原點喺邊度⋯？起點又喺邊⋯？正因為仲在意，所以先會有呢種想法
「唔知道⋯」知珩比咗一個無棱兩可嘅答案，紅紅嘅雙眼望向我嘅時候，我個心都有啲揪住一樣，「就⋯順其自然？」
「嗯。」我諗我除咗呢個答案，我都冇其他可以講嘅答案
「我冇討厭你！我講明先⋯」知珩忽然間對我澄清一點，「只係唔知要點樣重新嚟過咋⋯！」
我比知珩突然嚟到嘅澄清搞到我笑咗出嚟，明明冇澄清嘅必要，呢啲嘢可以由眼神同接觸上全部感受到
「我怕你誤會，所以先講明。」知珩一臉認真咁同我講
「我知，我未唔了解你到呢個地步。」我笑咗一笑，自然咁講出呢個事實
知珩睇起嚟冇太意外，我覺得唔出奇，到咗宜家，我地該有嘅默契都會有、該有嘅了解都會喺度，但有啲嘢改變咗，要番轉頭就變得好難⋯
⋯
⋯
⋯
「所以，你有諗過要重新開始？」
阿立呢句說話喺我腦海中揮之不去，每一個字聽起嚟都重重打喺我心上面⋯
「哎呀⋯」我喺慨嘆同時快速咁將身上嘅泡都沖走
熱水淋喺身上，成個人都好暖，但好似冇令我清醒起嚟，反而有啲轉唔郁個腦啦
「宜家一齊住，仲要重新開始⋯」我閂上水喉，將花灑掛番好，伸手將毛巾從衣架上扯落嚟，「重新開始都唔係唔好⋯」
宜家嘅我地唔係17歲嘅我地，係25歲嘅我地，顧慮多咗係正常，由其係我同佢宜家一齊住嘅情況下⋯
「最近到底做咩呀⋯個個都咁樣⋯」我苦惱咁用毛巾抹頭髮，「阿立係咁，阿逸又突然⋯哎⋯」
收工嘅時候，咁啱樂恩趕時間就匆匆忙忙咁走先，得番我同阿逸兩個人⋯
IG Link: https://www.instagram.com/nd_cotttoncandy/?hl=zh-tw