【愛情】關於我一覺瞓醒發現喺初戀屋企⋯！: 46. 幸福感
仍然係準備中嘅cafe只有我同阿逸喺度，樂恩話會遲少少先番到嚟
我同阿逸各自做自己嘅嘢，我喺樓面水吧，佢喺廚房，cafe好安靜，我地都冇講嘢
「知珩，幫我開一開個凍櫃門。」阿逸捧住甜品行入嚟水吧
「哦好呀。」我見佢完全騰唔到手出嚟，轉身就行去幫佢開門
「唔該⋯！」阿逸踎低將啲蛋糕一排一排整齊咁擺入去，「搞掂⋯」
阿逸一企起身，我即刻就擰轉身繼續做我自己要嘅準備，之前就算只有我同阿逸，我都好少會覺得唔自在，可能因為阿逸琴日問咗我嘢，浩宜又估咗一下⋯搞到我都諗嚟諗去
「知珩，試唔試？」阿逸唔知幾時行咗番去廚房，佢拎住一隻甜品碟出嚟
「新嘢？今日嘅限定？」我向右邊平移兩步行到去吧枱前面，阿逸將甜品碟放喺我面前，然後遞咗隻叉比我
「係呀～試下～」阿逸企喺吧枱前面一臉期待咁等我試味，「我今次落多咗少少糖，唔知會唔會太甜⋯」
阿逸就好似咩事都冇發生過一樣，同平時一模一樣，就好似佢咩都冇同我講過一樣，本來我都可以當冇聽過，但係佢嗰日嘅表情⋯
「算啦，冇事發生。」我喺心入面對自己講，「都好嘅⋯」
我先試咗一細啖，都唔係太甜，士多啤梨嘅香甜同蛋糕嘅甜都啱啱好，而且士多啤梨味好出，蛋糕又唔係真係好甜，甜嘅係士多啤梨
「好香果香味。」我咬到切咗粒夾喺蛋糕入面嘅士多啤梨，「又唔係真係好甜嘅，如果唔中意食士多啤梨嘅話會覺得太甜⋯因為佢嘅甜全部都喺士多啤梨度出嚟⋯」
「唔⋯」阿逸望住蛋糕沉思，然後入廚房拎多咗隻叉出嚟，喺我食嗰一邊嘅另一邊拮落去
我望住阿逸邊食邊思考嘅樣，佢嗰份認真諗到入神嘅模樣，令人都會不禁覺得佢真係好中意整甜品，佢嘅所有熱誠都喺甜品上面，單憑佢每次喺整甜品嗰陣嗰份認真就可以感受到
「都係，不過士多啤梨真係幾甜～」阿逸抬起頭望我嘅時候，臉上都掛住滿足嘅笑容，「買得好～」
「噗⋯」我望住佢呢個滿足嘅表情忍唔住笑咗一聲
「笑咩呀？」阿逸一臉困惑咁挑起眉望住我
「冇呀，就係覺得你真係好中意整甜品。」我笑一笑，伸手拎起個瓦杯沖第一杯咖啡，「所有心思都花喺整甜品上面。」
「中意自然會享受個過程，享受就自然會開心啦～」阿逸一手托住下巴，一手拎住叉又拮一啖，「如果整嘅時候唔開心，又或者覺得好煩躁，整出嚟嘅甜品就唔好食㗎啦～」
「所以，你整嘅限定甜品每日都會一件不留咁賣晒囉～」我笑一笑
「中意先會有動力去做，做起上嚟先會開心，就算只係打個cream都可以好開心～」阿逸笑道，提起甜品嘅時候佢嘅笑容都唔一樣，佢係發自內心咁中意整甜品
「好少男仔中意整甜品。」我望住滴出嚟嘅咖啡，又望一眼枱上面嘅蛋糕
「咁樣先係稀有技能嘛～」阿逸將叉放喺碟邊，然後行去門口嘅立牌前踎低，「個個都識就唔特別啦～至少我覺得整甜品好有意思。」
我稍微抬眼望阿逸一眼，佢對甜品嘅心真係無容置疑，由一堆材料變成最後一件精緻嘅甜品，真係會令人好有成就感
「好老土咁講，甜品可以帶到幸福感比人，食嘅人感覺到幸福，整嘅人都會跟住覺得幸福感滿滿。」阿逸擰轉頭望向我然後一笑，呢個燦爛嘅笑容已經代表住佢對甜品嘅想法
「叮鈴鈴鈴～」
「我番嚟啦～」「喂喂喂喂！」
樂恩一下就推門行入嚟，夾到喺門後面嘅阿逸，阿逸即刻伸手頂住度門，但樂恩又一直推住門要入嚟
「你做咩推埋個門呀！？」樂恩對住門縫嗌入嚟
「你夾到我呀小姐！你等我行咗出嚟先得唔得啫！」阿逸轉身對門縫嗌出去，然後起身拉開門等樂恩入嚟，「你唔睇下門後面有冇人先開門㗎咩？」
「我點知大叔你會匿喺度？」樂恩反咗個白眼，「想食門餅？」
「你快啲去換衫執嘢。」阿逸無奈咁搖搖頭，樂恩喺佢面前行過行到去休息室換衫，「真係⋯都唔睇下門後面有冇人先開門⋯」
我笑而不語，佢兩個一喺同一個地方嘅話就會好嘈，人地話有年齡差會有代溝，但佢兩個睇嚟冇呢個問題
「你笑咩？」我嘅餘光瞄到阿逸嘅嘴角微微咁上揚
「笑你喺度偷笑。」阿逸都唔避諱咁講，然後轉身拎起抬上面嘅抹枱布抹乾淨吧枱
「覺得你同樂恩好好笑。」我輕輕搖頭，望一眼休息室後望向阿逸，「明明有年齡差，但對話永遠都對得上。」
「佢低B咋唔關我事。」阿逸擺出事不關己嘅樣聳肩
「你話邊個低B呀？」一把聲喺我右方傳嚟
我望向休息室，見到樂恩推開門，邊將圍裙著起邊行出嚟
「逸大叔，你講你自己呀？」樂恩行到阿逸身旁，側住頭望住阿逸問道，「你就低B。」
「咁咪同你一樣低B⋯」阿逸無奈咁行向廚房嘅方向
樂恩望一望我，又望一望我面前嘅甜品碟，輕抿一下唇之後對我笑咗一笑，然後就行去執餐具
「阿逸，呢隻叉未洗乾淨呀⋯！」樂恩忽然間對廚房嗌道，一臉嫌棄咁拎住隻叉行入廚房
我察覺到樂恩嘅小心思，不過我諗嘅都只係一個猜測，我都唔可以肯定係真定假
但作為女仔，而且曾經都對某一個人帶住呢種小心思，單憑佢一個笑容、一個眼神，都大概可以略知一二
「唉～」我輕嘆一口氣，我希望成件事唔會變得咁複雜
嚟緊就係班聚，已經好耐冇見過大家，唔知到時會係點，雖然IG都有互相follow，但係實際見面已經係好幾年前
「都唔知大家變成點⋯好彩阿立都去～」我本來有啲擔憂，但諗到阿立都會去嘅時候，我又不禁鬆一口氣
IG Link: https://www.instagram.com/nd_cotttoncandy/?hl=zh-tw