【愛情】關於我一覺瞓醒發現喺初戀屋企⋯！: 39. 朋友？
阿立緩緩將視線收番嚟然後望住我，同我四目交投嘅時候笑一笑
「你指嘅係咩唔真實？」我有啲不解咁側住頭望佢
「見番你，然後仲要⋯一齊住。」阿立講出「一齊住」嘅時候明顯咁窒咗一窒，可能係有啲難為情、有啲難開口
「我都覺得，好唔真實⋯」我個腦入面完全係空白一片，「好難想像有一日會再見番你⋯我以為我地注定係會唔再見對方⋯我真係喺屋企喊咗好耐⋯！」
我提起自己喊嘅時候，忍唔住露出自嘲一樣笑容，我當日喊得好傷心，一諗起佢突然消失喺我眼前，我就好難過⋯
「嗯⋯！？」
喺我回神嘅時候，阿立已經行到我面前，好快咁伸手將我攬入佢嘅懷中，我同我嘅雙手都唔識比反應，雙手就咁懸喺半空
「對唔住⋯真係⋯」阿立把聲離我好近，就喺我耳邊
我呀⋯一直以嚟都覺得佢呢把偏沉嘅聲線好好聽，我特別中意佢叫我個名，聽起嚟雖然好似怪癖，但就係咁樣
「嗯，上次講好咗原諒你啦⋯」我嘅雙手好似想抱住咁郁咗一下，但又有啲猶疑係唔係真係攬佢
但我最後，都係攬住佢嘅腰⋯其實我知道唔係情侶就唔應該咁親密，但係喺佢伸手攬我嘅一刻，好似⋯就注定我會越線⋯
有時界線就係可以喺一刻間模糊起嚟⋯聞到熟悉嘅氣味本來應該令我安心，但呢一刻我偏偏好緊張，心一直跳得好快
「阿立嘅心入面，其實仲有我嘅位置⋯？」我好似好自然就會諗到呢個問題
我微微咁縮後離開佢嘅懷抱同時輕輕將佢推開，阿立順住我嘅舉動鬆咗手，但我心入面有啲空落落嘅感覺
「飲完～」我左右搖咗個盒兩下，聽到飲管打盒嘅聲，「我去沖涼先啦～」
「嗯。」阿立微微點頭，我經過佢嘅身旁行出廚房
我急步小跑入動攞衫，然後又小跑入廁所閂埋門
「塊面好似有啲熱⋯？」我將手輕放喺自己嘅臉頰上，我望住鏡入面嘅自己，臉頰好似微微紅咗，「定係只係我隻手熱咋⋯？」
唉⋯搞到愈嚟愈唔知想點⋯只要佢一有少少靠近，我就會忍唔住去諗：「佢心入面其實係唔係仲有我⋯？」
其實事實先唔係同浩宜講嘅一樣，同ex一齊住，唔代表會變成宜家呢個狀況
我同阿立，只係例外
⋯
「我已經好期待下次同你地一齊食飯啦～果然都係我地呢個組合最正！」樂恩企喺我隔離攬住我開心咁講
「再約再約。」卓卓打咗個大喊露，「我要番去趕assignment⋯」
「一睇就知你一定係deadline fighter啦～」樂恩反咗個白眼
「做得切㗎啦～所以我宜家要番去做功課啦⋯」卓卓隨意咁擺擺手示意冇咩大不了
「行得啦！」阿逸喺餐廳行出嚟放好銀包，「陣間過番數比我啦。」
「係～」樂恩第一個點頭，「番屋企啦～」
「你地都番屋企係唔係？」阿逸問道
「唔番屋企可以去邊？」樂恩側住頭望住阿逸問道，「仲想再食？」
「冇呀，番屋企啦！聽日準時番工呀仲掛住食。」阿逸搖搖頭
「拜拜知珩姐～」「拜拜知珩～」
喺我行到地鐵站入口嘅時候，樂恩同卓卓都轉身同我講拜拜
「拜拜。」我對佢地揮揮手，「你地都快啲番去啦。」
樂恩同卓卓兩人轉身打算繼續向前行，但本來應該同佢兩個一齊向前行去搭巴士嘅阿逸停咗喺我隔離
「阿逸？」樂恩好似有後眼咁，好快就察覺到阿逸停低咗喺地鐵站嘅入口
我望向阿逸，阿逸只係同我講：「我送你番去啦。」
「吓⋯？」我愣一下，然後搖搖頭：「我自己番去得啦，你同佢地番去啦⋯」
「佢兩個一齊番去嘛，你自己一個夜番唔太好。」阿逸微笑住認真咁講，然後望一望手錶，「宜家都差唔多10點啦。」
「喂有車啦要！」樂恩望住手機忽然緊張嗌道，然後拉住卓卓嘅手腕跑起嚟，「跑啦跑啦卓思齊！」
「喂等陣！」卓卓比樂恩拉住跑，佢跑咗兩步擰轉頭同我地揮手
得番我同阿逸，咁我就算唔接受都要接受啦⋯
「行啦～」阿逸對我講
「嘟嘟嘟嘟嘟嘟嘟嘟—」地鐵門閂上，我就只係企喺門邊嘅位置
「其實你真係唔洗特登送我番嚟⋯」我有啲唔好意思要阿逸送我番去，而且以前一齊食飯，都係我自己走，「我屋企同食飯嘅地方好近。」
「唔緊要啦，送佛送到西嘛～」阿逸笑言，「樂恩同卓卓都順路一齊番去，佢地年紀差唔多，話題都多啲啦～」
「係咩？你送佢嘅話，佢應該都會有嘢講。」我冇講明，免得講錯嘢影響佢地兩個人嘅關係啦
地鐵一開嘅時候即刻迎面吹嚟一陣風，阿逸身上嘅香水味即刻飄過嚟，我知佢平時都有噴開，但好少會有風吹起搞到好濃味咁⋯
不過我都唔係抗拒嘅，只係迎面吹嚟就覺得本來係淡香都變得好濃烈
「佢有時真係仲好小朋友～」阿逸提起樂恩嗰陣笑一笑講道，「但我覺得有時保持少少嘅童真都係一件好事嚟。」
「我覺得佢成日咁開心都係好事嚟。」我諗起樂恩成日掛喺臉上嘅活潑笑容而微微一笑，「好似開心果咁，同佢一齊做嘢都好開心。」
「幾啦～我都覺得佢好開心果，佢一唔開心真係一眼就睇得出。」阿逸無奈一笑同時搖搖頭，佢抬頭望一眼地鐵門上面嘅站牌，「你係唔係下個站落車？」
「唔係，我搬咗屋。」我搖搖頭，「搬咗去西環嗰邊。」
以前阿逸都問過我住邊，不過我冇同佢講我搬咗屋，所以佢都唔知我已經搬咗去西環嗰邊住
「咁突然嘅？」阿逸一臉愕然，其實唔係突然，只係我冇講
「搬咗出嚟同朋友一齊住。」我輕描淡寫咁解釋咗一句，講出「朋友」兩個字嘅時候，腦入面忽然閃過阿立嘅身影
「朋友？」阿逸嘅表情同笑容就好似講緊佢唔太信我一樣，「朋友定男朋友呀？」
IG Link: https://www.instagram.com/nd_cotttoncandy/?hl=zh-tw