【愛情】關於我一覺瞓醒發現喺初戀屋企⋯！: 40. 佔有慾
「你地呀，做咩個個都咁中意食花生？」我輕輕一笑，感覺佢地都好中意問呢類問題，「成日都問住我有冇男朋友，樂恩就算啦，佢成日都係咁，做咩連你都比樂恩同化咗？」
「我邊有比佢同化？」阿逸一臉嫌棄咁否認，「只係佢地成日喺度講，所以可能下意識都會咁樣問你？你唔中意人地問嘅話，咁你當我冇問過？」
「又冇唔中意人地問嘅～但我係真係真係冇拍拖⋯」我無奈咁回答，抬頭望住站牌，數下有幾多個站，「而且，我好似都冇拍拖嘅心⋯」
「冇遇到中意嘅人？」阿逸好奇又疑惑咁問我，「大學嗰陣都冇拍拖咩？」
「有呀，不過分咗之後都冇再拍拖啦。」我微微聳肩，然後從容咁講：「心動同感動唔一樣㗎嘛～冇再遇到好心動嘅人，所以就慢慢冇拍拖嘅想法啦～」
「咁後生就冇拍拖嘅想法咁絕望啦？」阿逸笑住問我，下一秒佢收起笑容，用好似要安慰我一樣嘅語氣講道：「以後可能都會再遇到呢～」
「唔知㗎，以後再算，順其自然。」我對阿逸講出我對浩宜講嘅嘢，順其自然啦，所有嘢都係
「咁你中意咩類型？我幫你留意下～」阿逸講笑咁講
「咩類型呀？唔⋯」我稍微咁思考咗一下，雖然係講笑，但我都會不由自主咁認真去諗
但我無論點諗都好，腦入面諗到嘅都係阿立，真係⋯唔知點解會咁樣呢～我中意笑得好睇、把聲好聽、好了解我⋯識影相嘅男仔⋯第一眼見到就不知不覺咁心動嘅人，大概就係真正嘅理想型
我點解會一直諗起佢⋯？可能，真係要講一句好似渣女先會講嘅嘢：因為除咗佢，我冇真心咁中意過邊個⋯聽起嚟，真係個離譜嘅人⋯
「我都唔知，我都冇刻意去研究過我中意咩類型⋯」我擠出笑容，心入面講嘅嘢當然唔會同阿逸講，希望佢唔會察覺到我係苦笑啦
阿逸真係陪我番到屋企樓下，我心入面其實都覺得佢唔洗送到我番嚟呢度，始終唔係幾好意思
「好啦，送到你呢度啦。」阿逸柔聲道，我同佢面對面企，我地之間隔咗一個人嘅身位
「麻煩你送我番嚟啦！你都快啲番去休息啦！聽日要番工！」我笑住對佢講
「Okay，咁聽日見啦～」阿逸對我揮揮手，「下次再一齊食飯。」
「好呀，再約啦～」我點一點頭，對佢揮揮手之後就轉身
佢地個個都成日問我，生得靚又性格好，點解冇男朋友？明明阿逸溫柔又體貼，又識整甜品，但阿逸都冇拍拖，冇女朋友，但大家又唔會問佢
我行到番屋企門口，喺袋入面拎出鎖匙開門，番到屋企就太好了
「番到去沖個涼～唉⋯真係唔想洗頭⋯」我嘆一口氣，自言自語咁講
「咔、咔—」「我番嚟啦⋯」
我有啲攰咁推開屋企嘅厚重嘅大木門，阿立就坐喺餐枱前對住門口呢邊坐，一打開門就見到佢
「歡迎番嚟。」阿立淡然咁望我一眼講咗一句
「好攰⋯」我將鞋除落嚟放番入鞋架，換上拖鞋，「你仲做緊嘢呀？」
我走近阿立，佢成日都會喺廳做嘢，今日應該都係執緊相之類
「唔係，只係睇緊嘢。」阿立搖搖頭
喺我行到佢隔離嘅時候，佢愣一下之後抬頭望我，我見到佢忽然間嘅反應，我都愣咗一下
「做咩呀⋯？」我見佢輕皺起眉頭，即刻有啲困惑
「冇⋯」阿立遲疑咁搖搖頭，但佢仍然輕皺住眉頭，「快啲沖涼啦，你個樣都睇起嚟好攰咁。」
「少少啦，咁我番房先啦⋯」我輕點一下頭就穿過走廊番房
我將房門虛掩住，拎住衫領拉到鼻前聞咗一下⋯都冇咩臭味呀！件衫我今日先拎出嚟著
不過⋯好似有好淡嘅香水味就係，可能番嚟嘅時候一直同阿逸一齊行，所以沾到啲⋯
「可能都係⋯因為阿立本來就唔中意香水味⋯」我緩緩咁放低自己嘅衫領，自言自語咁解釋
房入面只有我一個，又冇人問我點解，我到底同緊邊個解釋⋯？
「但佢啱啱個表情⋯對望嗰陣都好似feel到佢想講咩⋯」我又拉起衫領到鼻前
對望一眼，我都可以感覺到佢準備要講但又冇講出口嘅說話係咩⋯雖然咁樣諗會唔太合時⋯？
以前我同阿立仲未一齊嘅時候，就已經出現過⋯
「拜拜～」「喂！拜拜～」
有人拍咗我膊頭一下，我擰轉頭一望，係班上面一個同我都頗熟嘅男仔
「拜拜。」我對佢揮揮手，佢從我身旁行過，同另外兩個男仔一齊放學
我收起笑容，一陣冰冷嘅空氣就喺我隔離吹過嚟，我緩緩擰轉頭望向行喺我隔離嘅阿立，佢一啲笑容都冇，我淨係感覺到陣陣冷空氣⋯
「呃⋯做咩呀？」我抬頭側住頭望住比我高大半個頭嘅阿立，「嬲啦？你幾時咁小氣，講個拜拜都都要嬲呀？」
「冇嬲～」阿立即刻擠出笑容講道，但聽起嚟都係好虛偽嘅說話，「嘖嘖，點會嬲呢～」
「哦～你話冇嬲就冇嬲囉～」我好努力咁忍住笑意認真咁講
阿立有時就係會突然間唔高興，多數都喺我隔離唔高興，我知佢嬲啲咩，不過有時就係唔想氹佢，因為見到佢因為呷醋而嬲，心入面會有啲激動
「咦？」阿立探頭朝我嘅左邊望咗一望，一臉愕然嘅表情，我即刻望向左邊想睇下佢望到啲咩令佢愕然
「做咩呀？有咩呀？」明明我左邊咩都冇，我擰轉頭望向一直行喺我右邊嘅佢，「嗯？阿立？」
阿立突然唔見咗，我即刻望番去左邊，阿立喺我後面兜咗去我嘅左邊行，佢搞咩呀⋯？行右邊同行左邊有分別？
「你膊頭污糟咗。」阿立突然咁樣講，講完就一臉嫌棄咁伸手拍咗我膊頭兩下，「乾淨啦～」
「邊有污糟呀！」我望住我白雪雪嘅衫袖，塵都冇粒何來污糟
「我啱啱見到有，只係你見唔到。」阿立唔在意咁聳肩，佢又扮冇嘢
「我都唔知原來某人嘅佔有慾咁強～拍一下膊頭都唔中意～」我冇望住阿立，只係望住前面好似自言自語一樣細聲咁講
見到阿立嘅舉動，我嘅笑意已經滲緊出嚟，心入面都係有一陣陣嘅甜意滲出嚟，中意先會在乎，在乎先會有佔有慾
「係咩？邊個呀？」阿立扮唔知仲要問番我轉頭，然後佢提起手拍咗我膊頭兩下，「拜拜～」
仲話冇呷醋？仲話唔係佔有慾強？明明就有但仲要一直否認話冇⋯！
不過，由我同阿立變得親近、越過咗朋友嘅界線開始，我就知道佢其實係個佔有慾好強嘅人，只要係自己中意嘅、在意嘅、重要嘅嘢，比人掂一下都唔可以，討厭人地掂屬於佢嘅嘢
「會唔會係我諗多咗⋯？」我回神過嚟望住自己身上著住嗰件有淡香嘅衫，我唔敢去諗更多，怕係我自作多情，「都分咗手咁耐啦⋯對ex有佔有慾唔係好突兀嘅事咩⋯？」
IG Link: https://www.instagram.com/nd_cotttoncandy/?hl=zh-tw