【愛情】關於我一覺瞓醒發現喺初戀屋企⋯！: 38. 定格
「到啦？」阿立望向我時微微一笑
「影緊相？」我見到佢手上拎住相機，佢啱啱一直耷低頭應該係睇緊相
「嗯，就係無聊影下嘢⋯」阿立笑一笑，耷低頭睇住啱啱影嘅相，「行啦，番去啦。」
「好呀。」我點一點頭，喺阿立孭起袋嘅時候我就先行一步，「今晚真係好大風⋯」
海傍嘅風咁大，都唔知阿立喺度坐咗幾耐；我一直將比風吹亂嘅頭髮撥番好，將耳邊嘅髮絲都撓到耳背
我成個人擰轉身望向阿立，睇下佢行上嚟未，風太大啦，所以眼都有啲難要完全睜開
「咔嚓—」「喂！做咩突然影我相呀！？」
阿立見我轉身望佢，下意識反應一樣舉起相機影咗我一張相
「咁大風實好醜！個頭實好似雜草⋯！」我最怕比人影到自己好醜嘅相，有邊個中意睇到自己醜嘅一面
「嗯。」阿立冇否認，只係將相機遞比我，就好似同緊我講「你自己睇」一樣
「唔⋯」我伸手小心咁接過佢嘅相機，睇下佢啱啱影到我咩樣，「又幾好睇⋯」
「你係讚緊自己定讚緊我？」阿立無語一笑，行到我隔離同我一齊睇
「唔⋯兩樣都有啦～」我諗咗一陣之後笑一笑，畢竟讚自己唔係幾好意思
我望住螢幕入面嘅相，忽然間又諗起以前，以前中學嗰陣阿立最中意幫我影相
以前我有問過佢：「你做咩成日都影我？你唔悶㗎咩？」
嗰陣佢甜絲絲咁笑住答我：「我就中意影你，而且靚嘅嘢就係百看不厭呀～」
「嗱～將你嘅寶貝相機比番你啦～」我小心咁將相機物歸原主，「算唔錯啦～你要唔要send番張相比我？」
「哦好呀，番到去過番比你。」佢伸手接相機，冰凍嘅感覺忽然間喺我手上散開，突如其來嘅凍令我不禁微微縮咗一下
「你隻手咁凍嘅？」我喺阿立拎番相機之後輕皺起眉頭問佢
「係咩？」阿立望住自己嘅手心，然後握咗一下拳，「少少啦。」
「少少？你隻手超冰！」我手心向上朝佢伸手
「係你隻手暖啫。」阿立自然咁伸手握咗我隻手一下，冰冷嘅感覺即刻由我嘅手心傳嚟
「你到底喺度坐咗幾耐呀⋯？隻手凍到好似雪條咁⋯」我將手垂低，冰冷嘅感覺仍然未喺手心消散
「一陣啫。」阿立將相機放好，雙手插入外套袋中
「你唔會係收工就已經喺度掛⋯？」歉意湧上心頭，如果真係咁樣嘅話我就更唔好意思
「等咗一陣咋～」阿立笑一笑，唔知佢咁樣講係真係淨係等咗一陣定係唔想我覺得抱歉，「真係㗎！」
「行快啲啦咁我地⋯！」我捉住阿立嘅手肘輕輕搖咗兩下，「你隻手都太冰啦⋯！」
我默默咁加快腳步想快啲番到屋企，阿立打比我嘅時候佢應該都已經番到嚟，咁佢至少都喺度坐咗成個幾鐘⋯
「咔、咔—」我用鎖匙扭開門鎖之後即刻推門行入去
「你個鎖匙喺呢度。」我望到放喺鞋櫃面上面嘅鎖匙
「攞番先。」阿立伸手將鎖匙袋番入佢平時孭番工嗰個袋入面
阿立轉身閂門，我喺經過餐枱嘅時候順手拎番本相簿入房，一切都好正常，所以琴晚只係⋯氣氛影響！
我將相簿放番好，拎住衫褲打算快啲去沖個涼，喺我行到廁所門口嘅時候，阿立房拎住衫褲行出嚟
「你沖涼？」阿立企喺房門口，佢瞄咗我手上拎嘅衫褲一眼，「呃⋯你用先。」
「唔洗唔洗！」我即刻擺手搖頭，「你沖先啦，你吹咗咁耐風，你沖先啦！」
阿立聽到我咁講之後冇即刻行入廁所，一直企喺原地，佢係唔係唔太好意思？
「真係㗎你先啦！陣間凍親就唔好啦！」我對佢講道，然後轉身行番房等佢沖完涼先再出去
我坐喺書枱前拎起手機send咗個message比浩宜報個平安：「我番到屋企，你到咗同我講」
我眼睛嘅餘光又瞄到放喺飾物碟入面嘅手鐲，只係一隻好普通嘅銀色手鐲，不過手鐲內圈嘅左側有刻字，係英文名嘅縮寫
「如果你一直淨係向住佢一個人，你會miss咗好多值得嘅人。」我諗起浩宜同我講嘅一句
雖然佢咁講係真，但我講嘅嘢都係真，我暫時對拍拖呢件事冇咩太大嘅想法，就係冇特別好想拍拖嘅想法，可能因為太耐冇心動過⋯？
坐咗一陣我起身行出廳行去廚房，打開雪櫃拎咗盒蜜桃茶，轉身企喺洗手盆前面拆開飲管
「躂、躂、躂、躂⋯」
我聽到拖鞋聲，睇嚟阿立沖完涼，不過我盒嘢飲仲未飲完
「到你啦。」阿立將啲衫掉入洗衣籃
「未飲完～飲埋先。」我笑一笑講道
「乞嗤⋯！」阿立一閂埋洗衣籃嘅蓋就即刻打咗個乞嗤，然後緊接住第二個：「乞嗤⋯！」
「睇下～吹風感冒啦～」我望住佢濕漉漉嘅頭髮同搭喺頸上面嘅毛巾，忍唔住嘆氣
「同我媽講嘢嘅口吻一模一樣⋯」阿立擰轉頭，用一個嫌棄嘅表情望住我
「邊有？我講事實咋～」我微微聳肩，「講開又講，平時好似唔見你番你媽咪度食飯嘅？」
「都會番下去嘅間中，不過有時懶得番去一轉就冇番。」阿立拎起毛巾嘅一邊抹頭髮，「而且我一媽成日問我拍拖未，唉⋯有啲攰⋯」
「噗⋯都到咗要擔心呢啲嘢嘅時候啦？」我笑問道，「我媽反而好少咁樣問我。」
我同阿立又靜咗落嚟，廚房入面只係開咗一支裝喺櫥櫃下面嘅光管，就靠住柔和嘅橙黃燈光照亮成個廚房
「阿立做咩仲企喺度嘅⋯？」我悄然咁望咗阿立一眼，佢好似諗緊啲咩一樣
喺咁安靜嘅時候，我就會覺得都係同阿立先唔會有嗰種dead air就尷尬嘅感覺，阿立同當初好似都冇咩太大分別，只係睇起嚟過咗幾年之後，佢比我嘅感覺係成熟咗，而且都冇以前咁中意笑
「哈⋯」阿立抬起頭望向天花板，忽然間輕輕一笑，「感覺都係好唔真實⋯」
IG Link: https://www.instagram.com/nd_cotttoncandy/?hl=zh-tw