【愛情】關於我一覺瞓醒發現喺初戀屋企⋯！: 37. 回頭草
「點解咁講？」我唔太明白浩宜嘅意思
「你諗下，大學嗰陣你就係因為佢不辭而別所以先冇辦法放低釋懷；咁你今次見番佢，講清楚所有事嘅話，你就可以真真正正咁放低佢啦～」浩宜笑道，「然後你就可以真正咁繼續寫你嘅情史呀～」
我仍然有啲困惑，大腦思考緊浩宜講嘅嘢，佢好似講得好有道理，但又好似有啲危言聳聽一樣⋯
「李知珩，做人唔可以原地踏步，更加唔好講愛情呢啲唔可以番轉頭嘅嘢。」浩宜一臉認真咁講道
我望住浩宜嘅認真，雖然話佢中意拍散拖、中意flirt仔、中意落老蘭
一開始同佢未熟嘅時候，我只係覺得「呢個人做咩成日換男朋友，成日周圍識仔？」但當同佢熟起嚟嘅時候我就覺得，有時佢先係喺愛情遊戲入面最清醒嗰個
「講清楚咗就自然會放低，如果你一直淨係向住佢一個人，你會miss咗好多值得嘅人。」浩宜好似怕我淨係想同阿立一齊一樣提醒我
「但如果咁樣都見番，算唔算係一種緣份？我唔捉住佢嘅話，我會miss咗佢。」我只係隨口咁樣問，想聽下浩宜嘅意見
「你條件咁好，何必要為咗一棵樹放棄成個森林？」浩宜無奈咁反咗個白眼再嘆一口氣，「再講，如果比佢知道你對佢係仲有好感，佢實會將你拿捏住⋯」
琴晚嗰個狀態、嗰個氣氛、嗰個靠近⋯好難唔會發現⋯？阿立又唔係傻唔係蠢，佢仲要同過我一齊⋯你覺得佢會唔會真係一啲都唔了解我⋯？
「不過不過！如果真係要翻撻，你都唔好比佢咁容易食住你！一定要比佢知道你已經唔一樣，要欲拒還迎啲⋯！」浩宜就好似愛情專家一樣，佢一講呢啲話題就興奮㗎啦
「我冇諗過要唔要翻撻呢個問題⋯」我望住眼前興奮嘅浩宜無奈咁搖搖頭，「同邊個一齊、復唔復合都隨緣啦～」
「你自己知自己事啦，總之有咩我都實幫你嘅～你知㗎啦～」浩宜笑住點頭
「我知呀～」我笑一笑，「我冇特別想拍拖嘅想法，有嘅話我會唔同你講咩？」
「哎～總之我就覺得，翻撻唔係最好嘅選擇啦⋯」浩宜輕嘆一口氣，「你一定唔可以咁輕易咁又中意番佢⋯！」
感情嘅嘢，係我一個普通人可以控制㗎咩⋯？但我都覺得浩宜某程度上都講得啱
「身邊就冇人追緊你咩？」浩宜突然間又拉到另一個話題上面，「cafe冇人追你咩？」
「冇咩留意喎⋯做咩突然咁問？」我覺得呢個話題嚟得有啲突然
「逃離一段感情最好嘅方法係搵下一段感情。」浩宜講嘅呢句，我覺得係歪理嚟
「我同佢都分咗手幾耐啦⋯仲有逃離嘅必要咩？」我無奈咁問浩宜，「而且我又唔係完全冇再拍拖⋯冇逃離嘅必要啦～就順其自然啦～」
「我點知你會唔會轉個頭—」「Sorry等一等⋯」
浩宜要講嘅嘢先講到一半，我放喺枱上面嘅手機突然喺度震，我同浩宜嘅目光都比震動嘅手機吸引咗
「喂阿立？做咩呀？」我將手機放到耳邊，浩宜即刻帶住笑容點點頭
「你大概會幾點番嚟？」阿立嘅提問令我有啲困惑，突然間做咩咁問
「唔⋯都差唔多食完㗎啦～」我望住枱上都清得七七八八嘅飯餸，「做咩？」
「我今朝出門口唔記得咗拎鎖匙⋯」阿立嘅語氣係我隔住手機都可以feel到嘅無奈
「你出門口冇check清楚係唔係攞齊嘢先㗎咩？」我忍唔住反咗個白眼，浩宜抿住唇望我，佢個嘴冇笑，但眼笑緊
「咁你番嚟同我講啦⋯」阿立無奈咁講
「Okay～我轉頭番到嚟再同你講啦～」我笑道
「嗯好啦⋯」阿立嘆一口氣，喺收線前仲提我一句：「唔好咁遲番呀李知珩⋯」
「知啦知啦！」聽到佢久違咁叫我嘅全名，我就忍唔住笑住收線，「轉頭見啦～」
故事教訓大家，出門口之前真係要check清楚有冇拎齊嘢，如果唔係最後就真係有家歸不得
「點呀？咁早就嚟催你番屋企啦？」浩宜瞇起眼，帶住笑容望住我問，「呢個同屋主會唔會管太多啦～」
「你諗咩呀？」我忍唔住笑意笑住反問浩宜，「佢冇帶鎖匙，番唔到屋企呀～」
「哦～又會咁啱嘅～」浩宜點點頭，飲一啖水沖一沖口入面嘅飯菜味
「食完未呀？快啲食埋就埋單啦～」我拎起單望一望，然後就拎出銀包
「哎～見你今日請我食咗咁大粒花生嘅份上，今餐就我請啦～」浩宜將單從我手上一手搶走，直接遞手叫侍應埋單，「而且你仲趕住番去開門比你個ex嘛～」
「講咩呀⋯咁唔通要人地一直企喺屋企門口等我，我自己就夜番咩？」我聽到浩宜呢個有少少想窒我一下嘅語氣，我除咗笑都唔知可以講咩
喺行到去路口嘅時候，因為搭巴士方便浩宜，所以浩宜就同我行唔同嘅路
「唔好浪費太多時間喺同一個人身上呀～」浩宜喺同我分別之前，輕描淡寫咁講咗句，「應該有更多好嘅人喺你身邊。」
浩宜留低一句之後就瀟灑咁轉身，提一提手同我講拜拜，呢個人有時都幾型，不過呀～我更加期待有一日浩宜都搵到真心中意嘅人嘅時候會係點
⋯
「我到啦」我喺行出地鐵站嘅時候send咗個message比阿立
我嘅步速慢慢加快，始終阿立仲等緊我番去開門比佢，我都唔係幾好意思慢慢行番去⋯
我企喺紅綠燈前面等緊轉燈嘅時候，驟眼睇見到有個好似阿立嘅人坐咗喺前面公園嘅長櫈上面
「係唔係阿立？」我唔太肯定咁瞇起眼望清楚
「篤篤篤篤篤篤—」
喺紅綠燈由紅燈轉做綠燈嘅一刻，我即刻就邁步行過去，今日其實都幾大風，特別係我地住呢度好近海傍，風吹起嚟都唔係人咁品
我喺去到公園嘅入口嘅時候望清楚嗰個人，果然係阿立，我快步走向佢
「喂喂！」我行到佢隔離輕輕拍佢
IG Link: https://www.instagram.com/nd_cotttoncandy/?hl=zh-tw