【愛情】關於我一覺瞓醒發現喺初戀屋企⋯！: 36. 難為情

「好近⋯」我將呼吸放輕，冇後退嘅打算

我察覺到佢都將呼吸放輕咗，有意都調整呼吸⋯就算會錫到，都可以當冇事⋯？我地嘅界線會去喺邊⋯？

「登登登～登登～登登登～」

喺比啱啱變得更近、唇就嚟要掂到嘅距離嗰陣，拎喺手嘅手機突然喺度響

「嘎—」





我即刻連人帶櫈反射性咁向後縮，順便咁將同佢輕扣住嘅手縮番出嚟

我微微抬眼望阿立，佢已經擰開望向另一邊，有啲唔自在咁摸一摸後頸

「喂⋯媽咪⋯？」我端正咁坐好聽電話，右手放喺膝頭，左手拎住電話

我個心都未平靜番落嚟，仲要比電話響嚇咗一大跳，我宜家嘅心跳仲快過啱啱⋯

「飲晒啦個湯⋯靖佑？飲、飲咗⋯」我望咗阿立一眼，搞到我答媽咪嘅時候都有啲心虛，「嗯⋯好唔好飲？」





我望向阿立問一句，但喺佢答我之前，我將手指放喺唇前示意佢唔好出聲

喺阿立微微點頭之後，我先開口：「佢話好飲。」

每次同媽咪講電話都搞到我好緊張，特別係阿立都喺屋企嘅時候，我怕佢會突然開口講嘢然後比媽咪聽到

「嗯⋯我會照顧好自己唔會麻煩人㗎啦⋯你當我仲細咩⋯？」我咁樣答嘅時候，阿立喺我隔離偷笑咗一聲，「知啦知啦⋯拜拜⋯」

我望住跳番去lock screen嘅螢幕，即刻有種鬆一口氣嘅感覺





客廳一片寂靜，我地冇人出聲講嘢，啱啱嗰份曖昧嘅氣氛好似仍然停留喺空氣之中，我連呼出嚟嘅空氣都係熱嘅⋯

我已經冇心情去特登留意阿立宜家係咩表情，如果呢一刻我再去望嘅話，感覺會更加尷尬⋯

「你⋯睇完嘅話擺喺度得啦⋯」我慢動作咁推後張櫈起身，「我番房先啦⋯」

「嗯⋯」佢似乎都覺得有啲難為情，答我嘅時候都只係微微回頭一下，都冇完全望過嚟

我急步行番入房閂埋門，背靠住門企嘅我調整住呼吸等自己冷靜落嚟

「呼⋯李知珩冷靜啲⋯！」我低聲對自己講，「冷靜啲⋯」

冷靜落嚟呀李知珩⋯啱啱發生嘅事一定、一定係大家一時衝動啫⋯！係衝動嚟⋯！

我拖住腳步行到書枱前面，我番嚟嘅時候將手鐲放咗喺枱面，我拎起手鐲放到平時用嚟擺飾物嘅兜入面





我嘅目光停留喺手鐲上，腦入面一直諗住啱啱發生嘅事

「聽朝早見到嘅話⋯會好尷尬啦⋯」我喺心入面講道

我從來都唔知道，原來成年人之間嘅感情同界線，係可以咁模糊⋯可以係一觸即發⋯

喺埋一齊嘅時候所做嘅嘢，同宜家唔係同一身份下做嘅嘢，又點可能係一樣嘅感覺⋯？

「緊張死啦真係⋯！」我拎住手機灘低喺床上面，「我真係傻咗啦⋯」

如果，同我一齊住嘅係其他男仔，我會唔會係咁樣⋯？有時我都會咁樣諗⋯

我明明一直都幾肯定我對阿立已經冇其他想法，但偏偏喺我冇心理準備嘅時候就見番佢，同佢一齊住，似乎令我都有啲迷惘⋯





⋯

第二日嘅朝早

我企喺廁所嘅鏡前梳頭，平時一般都係番到cafe先再梳做馬尾

「咔—」阿立嘅房門打開，佢換好衫企喺房門口望住我，我拎住梳嘅手懸喺半空，我同佢對望住

「呃⋯你用呀～我用完㗎啦⋯」我即刻梳多兩下頭髮就將把梳放低，小急步行出廁所

「唔該⋯」佢嘅視線都有啲飄忽，禮貌咁同我講

「我出門口先啦⋯今晚我唔番嚟食，約咗人⋯」我喺行出走廊之前，回頭望向企喺廁所大鏡前嘅阿立講一聲

「嗯，好⋯」阿立好似啱啱先回神一樣慌忙點頭





我同佢對望咗一眼，我對佢露出一個尷尬又不失禮貌嘅微笑，然後就打開門出門口番工

琴晚我喺床上面灘咗好耐先真係瞓到，一合埋眼就諗起同佢差啲就kiss咗嘅事，雖然話都唔係初吻，但⋯邊個可以喺同ex喺嗰種微曖昧嘅氣氛下差啲kiss到之後，仲可以當冇事發生一樣瞓個好覺？

「唔諗啦唔諗啦！」我搖搖頭

⋯

「所以呢？宜家係點樣？」浩宜拎入筷子，邊夾餸邊問我

我將琴晚嘅事講咗比浩宜聽，所以，浩宜逼不及待咁想食花生啦⋯

「就係⋯有啲尷尬⋯咁樣⋯」我邊諗邊答，「好難當冇事發生明唔明？」





「咁你預咗同個ex一齊住就會有呢啲問題㗎啦～」浩宜完全唔在乎咁聳肩，一直夾餸食，「係好彩嘅咪一齊番囉～你唔想咩？」

「你知唔知自己講緊咩⋯？」我聽到佢呢個講法同解釋，我真係有啲無言以對

「吓⋯？事實呀。」浩宜一個理所當然嘅表情望住我，佢冷笑一聲：「冇feel點會可以接受？點會肯靠近？你唔好同我講笑，話咩真係冇feel已經。」

浩宜一個睇穿我心入面諗咩嘅眼神，淡淡然咁望一望我又繼續夾餸食

「我又冇講啲咩⋯」我耷低頭食飯，「你估你睇緊小說咩⋯邊有咁多美好嘅故事⋯」

「不過諗深一層，你今次見番佢，都未嘗唔係一件好事⋯」浩宜若有所思咁同我講




IG Link: https://www.instagram.com/nd_cotttoncandy/?hl=zh-tw