【愛情】關於我一覺瞓醒發現喺初戀屋企⋯！: 17. 她不會
⋯
⋯
⋯
「嘟。」我拎起員工證拍卡，推門行入公司
9點半，仲有15分鐘先開會，仲有時間透一透氣先去會議室
我行番埋位拎咗公司用嘅MacBook出嚟，陣間仲要開會，快啲prepare好啲嘢先
「阿瑜！」我聽到有人叫我，我即刻擰轉頭望一眼，「你番到嚟就太好啦！」
我望住Ella帶住一個慌張嘅表情小跑埋位，佢個位就喺我隔離
「我幾驚你今日唔番⋯！」Ella擔心咁講，「你唔番嘅話，開會嗰陣我點算⋯！」
「咁咪你試下present影咗啲咩相囉～」我無奈咁講道
Ella係新請番嚟嘅攝影助手，我嘅部門阿Head覺得只有我一個人負責晒所有攝影事務太辛苦，所以特登請多個助手番嚟幫我
「唔⋯」Ella擔心咁扁起嘴
「咁你總有一日會做個獨立嘅攝影師㗎嘛～」我笑一笑安撫一下佢嘅擔憂，「宜家係助手啫，以後可能有機會獨立跟啲project。」
「唉⋯再賺下經驗先啦⋯」Ella企喺我隔離睇住我準備陣間開會要同大家report嘅相同其他資料
「咦～難得見到你今日唔係著Hoodies喎～」忽然有人喺我後面拍我膊頭
淨係聽把聲、呢個微輕挑嘅語氣，我都知道係Mavis，根本連擰轉頭都唔需要我就可以知道
「你今日冇買咖啡嘅？」Mavis伸手搭住我嘅膊頭，成個人靠住我張櫈
「冇，買唔切，趕時間番嚟開會。」我望咗佢一眼，然後又繼續準備我要準備嘅嘢
「平時你番嚟都拎住杯咖啡㗎嘛～」Mavis拍一拍我膊頭，「Ella你話係唔係？」
我冇答佢，佢似係冇嘢做想搵人吹水講下嘢，呢個基本試係Mavis嘅日常，唔知點解佢好似冇嘢做咁，成日都可以周圍吹水，特別中意搵女同事吹水
我就唔講咁白咁直接，但我諗大家都明我嘅意思；不過大家唔洗擔心，Mavis佢係單身
「係呢，你咪成日去嗰間cafe買咖啡嘅～」Mavis忽然間又提起我平時買咖啡嗰間cafe
唔知點解一聽到佢呢個聽起嚟有啲輕柔嘅語氣，我就有種唔太好嘅預感
「係呀，做咩？」不過我都係先答佢，「你唔係都有去過咩？」
「我想問你，你有冇見過cafe嘅咖啡師？」Mavis笑盈盈咁用好奇嘅語氣問我，「髮尾微卷，梳住高馬尾嗰個⋯」
Cafe嘅咖啡師⋯？「髮尾微卷，梳住高馬尾」嘅咖啡師⋯？佢講緊嗰個咖啡師係唔係同我諗緊嗰個一樣⋯？佢應該係講緊知珩？
知珩喺cafe番工，每次見佢都係喺咖啡機前面沖緊咖啡，而且知珩就係呢間cafe嘅咖啡師呀⋯！Mavis講緊嘅應該就真係知珩
「見過，做咩突然咁問？」我平靜咁講，因為我想睇下佢到底想講咩
「你覺唔覺嗰個女仔好靚女？」Mavis講道，呢個問題我真係唔想答佢，「唉⋯好想同佢傾計，佢把聲聽起嚟超溫柔⋯！你有冇同佢講過嘢？」
「落單嗰陣有囉～」我笑一笑講道，「我去嘅時候佢都係做埋落單。」
「把聲好好聽好溫柔係唔係！？」Mavis捉住我膊頭，睇起嚟有啲激動，「我都好想做佢同事，日日聽到佢把聲都唔會厭⋯！」
「辭職然後去cafe見工囉～」我講笑咁講，既然佢咁開心我就附和下佢，「咁就可以日日見到佢。」
「咁又唔得～」Mavis即刻講道，仲要打咗我一下，「不過上次拎唔到佢IG有啲可惜⋯你要唔要同我一齊去識下？」
「唔要⋯」我搖搖頭
我就知道佢提得cafe又提起沖咖啡嗰個女仔，肯定又係想識人⋯
不過我話唔想同佢一齊去識下係真心咁講，因為呢個咖啡師我一早就識，但亦唔想話比Mavis知
「因為比佢知嘅話，佢肯定煩住我⋯」我喺心裏無奈咁嘆氣，「我真係怕咗佢⋯」
「唔知佢有冇男朋友呢？」Mavis喺我隔離講
知珩好似冇男朋友，之前聽大學同學個女朋友講過，佢女朋友咁啱同知珩係朋友
「喂你真係唔要同我一齊去拎佢IG？」Mavis問我，唔知係唔係我嘅問題，我覺得佢咁樣講好有問題⋯
「你要拎自己去。」我拒絕佢嘅邀請，以佢中意識女仔嘅性格，比佢知道我同知珩係識嘅話就係另一個大麻煩
「唉⋯」Mavis嘆一口氣，我想當聽唔到
雖然咁講有啲衰，但望到Mavis呢個識女仔失敗嘅表情，我覺得有啲好笑
「真係以為知珩好易氹，講兩句就比IG⋯？」我喺心入面因為佢嘅嘆氣失望而偷笑
我同知珩已經好幾年冇見，但我覺得佢冇咩太大改變，仍然係有啲人前人後兩個樣嘅feel
而且識咗咁耐以前又熟，知珩嘅性格我都係清楚嘅，佢先唔係啲好簡單就可以同人傾得埋嘅人
「下次去再試下問佢拎IG先⋯！」Mavis自信咁講道
Mavis呀Mavis～自問閱女無數嘅你係時候撞下板啦～
不可否認嘅係知珩的確有氣質而且生得幾靚，講嘢嗰陣的確係溫溫柔柔，但佢都唔係咁中意social嘅人嚟
「阿瑜，下次一齊去呀～」Mavis一臉誠懇咁望住我
「哎～夠鐘開會～」我無視Mavis講嘅嘢，合上MacBook起身離開我嘅座位
Mavis真係十年如一日，成日都掛住識女仔，但又唔打算認認真真咁識番個女朋友
「Ella，你睇下你個師傅無視我⋯」佢轉個頭就去咗搵Ella訴苦，所以佢真係單純咁中意識女仔
IG Link: https://www.instagram.com/nd_cotttoncandy/?hl=zh-tw