【愛情】關於我一覺瞓醒發現喺初戀屋企⋯！: 16. 慌張
第二日，係一個上班日，仲未到假期⋯
「嘟嘟嘟嘟！嘟嘟嘟嘟！嘟嘟—」「呯呯！」
「發生咩事呀⋯？」坐喺梳化睇緊新聞嘅我嚇咗一跳，探頭望一眼阿立間房
阿立開一開房門又將房門閂埋，然後匆匆忙忙咁行出嚟，外套著咗左邊，右邊又未拉好
我食住餐包望住阿立，阿立行咗出嚟，下一秒又跑番入房
「死啦死啦今日開會⋯！遲大到啦⋯！」阿立著急咁自言自語起嚟，「9點9開會，我較咗鬧鐘都可以遲到⋯！」
9點9⋯？我望一望開住嘅新聞台嘅左上角又望一望匆忙到不得了、連頭髮都未梳好嘅阿立
「呢度番公司都要半個鐘，番到去都10點半，遲大到啦真係⋯！」阿立又自言自語咁講
我望住阿立一直喺廁所同房來回跑咗好幾轉，但我淨係得一個想法：佢係唔係真係未瞓醒⋯？
「唔得啦唔得啦！趕唔切啦真係⋯！」阿立喺房衝出嚟跑去門口打開鞋櫃
「宜家先8點9，你唔係趕得切咩？」我平靜咁食一啖餐包講道
「吓？8點9⋯？」阿立綁緊鞋帶嗰陣聽到我咁講，佢成個人都窒咗一下
「係呀。」我認真咁點一下頭，「新聞台都係寫8點9。」
「呼⋯嚇死我啦⋯！」阿立將鞋直接踩踭除番落嚟行到梳化灘坐低，「仲以為自己開會遲大到⋯」
望住阿立由慌張到無奈再到頹廢嘅表情，我覺得有啲好笑
「食唔食早餐？仲有包。」我拎起手邊嘅餐包，膠袋入面仲有三個
「嗯⋯」阿立攬住佢個袋頹廢咁望住電視
我拎咗一個餐包遞比佢，阿立拎咗個包擺入口咬咗一啖，佢睇起嚟仲好眼瞓，咬住個包都可以瞓得著
我好自然咁將麵包遞比佢，佢亦好自然咁接咗個包放入口
「我宜家，就過緊以前嘅我好想過嘅嗰種日子⋯」我向後一靠靠住梳化嘅櫈背、有啲頹咁坐
我同佢嘅相處好自然，同一屋簷下，每一日嘅開始都喺呢間屋，每一日都會同呢個人一樣喺度開始
雖然有時都會有啲少尷尬，但相處起嚟至少好自然，我覺得係「以前就識」嘅功勞嚟
「啱啱我仲以為你要拆咗間房⋯」我托住下巴，諗起啱啱聽到拆樓一樣嘅聲
「我以為我遲到啦嘛⋯」阿立一手攬住方形嘅抱枕，一手拎住餐包放入口，「好彩只係睇錯時間⋯」
我耷低頭偷偷地笑，阿立真係冇咩大改變，有時大頭蝦又好搞笑
印象中以前番學都試過，7點半出門口，佢7點起身就將時間睇做8點半，一枝箭刷牙換衫出門口跑去車站
更搞笑嘅係，佢仲要打比我問我做咩唔打比佢叫佢起身，而當時聽電話嘅我先啱啱瞓醒一舊雲咁
「笑咩呀？」阿立忽然間開口，我望向佢嘅時候見到佢以一個未瞓醒嘅表情望住我，「我覺得你笑緊我⋯」
「覺得好好笑，你又睇錯時間。」我抿一下唇，免得自己真係笑出聲
「仲笑⋯我都就嚟嚇死⋯」阿立嘅手放喺心口，「我都係今日咁啱睇錯啫～」
「嗯。」我面帶微笑微微點一下頭
喺新聞台顯示嘅時候到9點正嘅時候，我孭起斜孭袋起身準備番工
「你行未？」我順口咁問阿立一句同時擰轉頭望佢，佢就咁坐喺梳化度瞓著咗，「阿立？」
「呀？嗯⋯行啦⋯」阿立坐起身發一秒呆就企起身閂電視，「番去開會⋯」
我先踏出屋企嘅大門，阿立閂門順手鎖上大門，然後同我同步咁轉身行出去搭𨋢
「今日唔洗飲咖啡啦？」我先開口同佢講嘢
「趕唔切啦，番去開會呀要⋯」阿立伸個懶腰，下一秒將背囊孭到前面，「睇下先⋯USB有冇帶⋯？」
「正常唔係出門口前check⋯？」我有啲困惑，陣間唔好彩拎漏咗嘅話咪又要番上去拎
今日阿立著住裇衫，可能因為今日要開會所以要著得醒目啲，平時佢嚟cafe買咖啡嘅時候都係著住頹hoodies
「我記得有擺到⋯」阿立嘅手一直喺背囊中摸索，「有⋯！」
望住阿立鬆一口氣嘅樣，我都跟住佢一齊鬆一口氣
我同阿立一樣都係搭地鐵番工，地鐵可以話係呢個城市入面最方便嘅交通工具，對於我呢種唔識睇地圖嘅人嚟講，地鐵簡直係我最好嘅夥伴
「呢個時間仲咁多人嘅⋯」阿立望一望周圍，雖然話宜家都唔係最繁忙嘅時段，但人都係比較多
阿立提手捉住佢頭頂上嘅扶手，我面前咩都冇得扶，頭上亦冇扶手，唯有靠自己企穩
不過車一開一搖，我就向左邊跳咗兩小步，膊頭直接撞落阿立度，我下意識就伸手捉住阿立嘅手臂
不過我冇一直捉住佢，佢亦冇即刻縮手，等到我好快咁企穩之後我就鬆開手
落車之後，我知道我同佢係行唔同方向，但我諗緊要點樣開口先自然
「我行嗰邊⋯」我企喺指示牌前對阿立指一指我嘅右邊講道，「拜拜～」
「嗯，我行另一邊。」阿立微微點頭，「拜拜。」
我同佢同步咁轉身往各自要行嘅方向行，我番去cafe開工，佢番公司開會
時間真係一樣好神奇嘅事，佢好似沖淡咗一切，但又好似冇真係認真去沖淡，當你以為唔會再有機會發生嘅時候，佢偏偏會喺你將佢塵封嘅時候發生
我默默咁加快咗腳步，諗咁多都冇用，新一日嚟到，我就要為新一日努力工作打拼
唉～大人嘅世界就係咁悶又咁辛苦⋯
「希望今日唔好又做到冇停手⋯」我邊行邊諗
IG Link: https://www.instagram.com/nd_cotttoncandy/?hl=zh-tw