【愛情】關於我一覺瞓醒發現喺初戀屋企⋯！: 18. 不一樣

「唉⋯佢到底行得未⋯」我喺褲袋拎手機出嚟望一眼

我今朝明明同佢講得好清楚，我唔會陪佢嚟識女仔，但我最後都係比佢拉咗過嚟

我企喺門口一邊唔想入去，我怕入到去，知珩見到我就「阿立」咁叫我

到時Mavis就會知我同佢想識嘅咖啡師係一早就識，然後佢就會煩住我叫我比知珩嘅IG佢⋯淨係咁樣諗一諗都覺得好煩

「佢到底搞掂未⋯買杯咖啡買成半個鐘⋯」我忍唔住探頭望一眼





Mavis企喺吧枱前面一直同知珩講嘢，不過依我睇嚟，知珩嘅表情⋯

「知珩唔耐煩啦⋯」我望住知珩臉上掛住嘅微笑喺心入面講道

呢個唔耐煩但又要保持形象嘅笑容，好輕易咁就比我睇穿咗，知珩唔耐煩啦開始

「等多佢一陣啦⋯」我企番好喺cafe門外嘅柱前

清爽嘅高馬尾，加上呢個外表、呢種溫柔氣質，完全就係男仔心目中絕對會有好感想識嘅類型





我又擰轉頭探頭望一眼，Mavis仲撩緊知珩講嘢⋯救命⋯佢捨得走未⋯？

李知珩⋯本來我以為，我地都唔會再見，點知，我地就真係再見

明明男女一齊住，仲發生瞓錯房呢種事應該好尷尬先係，但知珩喺入錯我房瞓之後就好似冇事發生一樣

我同知珩一齊住呢件事，我媽係唔知道，我亦冇同人講過呢件事，因為唔係男女朋友嘅兩個人一齊住，本來就好奇怪

我以為我同知珩一齊住嘅話，屋企氣氛會好尷尬，我同佢都會好尷尬⋯因為以前發生咗太多事⋯





但我同佢一齊住，有時的確會有少少，但相處起嚟都係好自然，同我想像中嘅大尷尬唔一樣

「知珩真係冇咩變過⋯」我好自然咁諗起以前中學時代嘅佢

同樣嘅聲線、同樣嘅語氣、同樣嘅模樣、同樣嘅性格，所有嘢都好似以前嘅佢一樣冇變過

「其實我同佢都冇變到，變嘅係真係⋯我同佢⋯」我唔知點解突然會咁樣諗，但呢個想法就喺我回想嘅時候浮現出嚟

宜家一齊住嘅狀態，係我曾經好想要嘅狀態，但宜家同嗰陣已經唔一樣

「喂，行得啦。」Mavis終於拎住咖啡行出嚟，我嘅回想亦停止落嚟

「終於行得啦？買杯咖啡買咁耐。」我冷笑一聲，就係想諷刺佢一下，「點呀？拎唔拎到人地IG？」

「佢話佢冇IG喎⋯」Mavis失望咁嘆氣講道，「點睇都係講緊大話⋯」





「可能佢真係冇呢～」我聳一聳肩，「你諗太多。」

不過Mavis講得冇錯，知珩話冇IG係真係大話嚟，我估只係知珩單純咁唔想比唔想煩而且覺得唔耐煩

到夜晚放工嘅時候，我順手拎埋用嚟做公司嘢嘅MacBook番屋企

「Ella記得番去執咗啲相。」我喺孭袋嘅時候順便提一提Ella

「收到！」Ella對我敬咗個禮，「我今晚番去會執埋～我執完會擺上drive。」

「嗯，好。」我拉一拉番好件衫，「咁冇其他問題嘅話我走啦。」

「我都行啦！」Ella拎起個袋跑上嚟行喺我隔離，「你搭咩車番屋企呀？」





「地鐵。」我回答，「你搭咩？」

「唔⋯巴士⋯」Ella望一望手機，「搭地鐵唔順路⋯」

唉⋯今晚食咩好⋯？買外賣定番去煮麵食好呢⋯唉⋯自己一個人搬出嚟住之後，每一晚嘅晚餐都會成為我嘅日常煩惱之一

喺我諗緊食咩嘅時候，忽然間諗起知珩：「知珩放工未呢？」

唔⋯要唔要問一問知珩收工未？如果我自己買飯番屋企自私食，好似有啲唔係幾好意思⋯

不過Ella喺我隔離，我又唔太想WhatsApp知珩，陣間比佢睇到，又要成為女同事們嘅茶餘飯後嘅話題

「我行嗰邊去巴士站呀，聽日見～」Ella喺行到路口嘅時候停咗落嚟指住左邊

「聽日見。」我微笑點頭，然後就向前行





我喺繼續向前行，有啲猶疑係唔係要send個message比知珩問佢一聲，畢竟係一齊住，就算只係合租，問一聲都唔係咩大事

「你收工未？」所以我都係send咗個message比佢問一聲

「未呀，做咩？」知珩好快就覆番我，睇嚟宜家cafe應該唔多人

「睇下你洗唔洗買飯啫」「我轉頭收工買啦，你可以食先」

「好」我收起手機，既然知珩都咁樣講，咁我買飯番去食啦

⋯

⋯





⋯

「咔，咔—」我用鎖匙開門入屋，一打開門就已經見到阿立坐咗喺餐枱前打開電腦做緊嘢

因為我同阿立嘅放工時間都唔一樣，所以食飯時間自然都唔同

「我番嚟啦⋯」我自然咁開口講，以前同爸爸媽咪一齊住嘅時候我都會咁樣講聲




IG Link: https://www.instagram.com/nd_cotttoncandy/?hl=zh-tw