【愛情】關於我一覺瞓醒發現喺初戀屋企⋯！: 15. 界線

「我番嚟啦⋯」我慣性咁喺開門番到屋企嘅時候講一聲，「好香呀⋯！」

一打開屋企門就聞到好香嘅味，廚房傳嚟煮飯嘅滋滋聲

「你煮飯呀？」我換咗拖鞋就行入廚房，望住阿立手拎住鑊鏟，「好香呀⋯！」

不過，阿立會唔會淨係煮比自己食冇我份⋯？唔⋯都唔緊要嘅，我可以煮麵食嘅～

「噠！」





阿立閂火，喺隔離嘅櫃入面拎咗一個大碗出嚟，將炒飯都倒晒入去

「你食唔食？」阿立喺拎飯碗嘅時候擰轉頭問我

「食！」我即刻點頭，我搬出嚟之後好耐都冇食過住家飯

我望住阿立喺櫃桶拎咗兩飯碗出嚟，咁大個屋企得總共得四隻飯碗⋯

阿立將鐵碗放喺餐枱中央，佢拉開櫈就坐低喺餐枱前裝飯





我拉開佢對面張櫈坐低，今次係真係第一次坐埋一齊食飯

「你原來識煮飯㗎⋯？」對於原來阿立識煮公仔麵以前嘅嘢，我有啲意外，我忍唔住笑：「噗⋯你以前⋯明明連飯都唔識煲⋯」

「連煎蛋都可以煎到變咗黑色嘅人冇咩資格話我。」阿立望住我搖搖頭

「嗰次係意外！」我即刻反駁佢，「係唔小心開大咗火又唔記得較細先會咁！」

「再大火啲就炸咗個廚房啦～」阿立望住我，佢好似都諗起嗰件事而笑起嚟





「係因為你冇幫我睇火囉！」我好自然咁提手輕打咗阿立嘅膊頭一下，「掛住睇啲飯煲好未，點知連飯煲都冇開！」

「我第一次煲飯，點知原來要㩒制啫⋯！」阿立尷尬咁笑咗一笑

講起當年嘅煮飯經歷，我同佢都係五十步笑百步，飯都唔識煮嘅兩個人，今日居然做同屋主一齊住

雖然我地最後都係變成咗最熟悉嘅陌生人，但係開心嘅回憶仍然喺度，再講起嘅時候都仍然覺得好好笑

有時我覺得我同佢之間嘅熟悉感仲喺度，喺佢面前，我都會笑得開懷嘅暢快啲

我食咗一啖炒飯，飯入面都配料都係我中意食嘅配料，有腸仔、有煙肉、有牛肉⋯都係我中意食嘅餸

喺我滿心歡喜咁食緊飯嘅時候，忽然感覺到阿立嘅視線，我嘅指尖從手機螢幕移開，抬頭望一眼阿立，咁啱見到阿立抬眼望一望我

「嗯？做咩？」我側一側頭望佢





「啱食？」佢只係好簡單咁問出重點

我望住阿立一個等緊我比comment嘅表情，我同佢對望嘅時候，咀嚼嘅速度都慢慢咁放慢落嚟

「啱食呀～」我笑住點頭，「好啱食～」

「嗯。」阿立聽到我咁講之後好似都輕咗一口氣一樣，佢微微點頭，我都可以察覺到佢係鬆一口氣

我同佢就坐喺對面對住食飯，我都唔知有幾耐冇同佢一齊單獨咁樣食飯，好陌生，但又好新鮮

我望住佢專心食飯嘅樣，我嘅嘴角都忍唔住上揚，唔係因為佢食飯好好笑，而係我同佢之間嘅回憶又慢慢咁湧現出嚟

我眼前嘅佢，有一剎那變成咗著住中學校服嘅佢，不過，我地都畢咗業好耐啦～宜家諗番都覺得自己老啦～





「你洗唔洗飲啲咩呀？」我突然心血來潮想整嘢飲

「你整呀？」阿立瞇起雙眼望我，有啲唔信我

「梗係啦！」我抬起下巴表現出我嘅自信

我起身行去廚房，拎咗兩隻玻璃杯，打開雪櫃拎咗罐雪碧同兩樽益力多

「阿立你入嚟呀～」我望向餐廳對佢招手叫佢入嚟廚房

阿立起身就行入嚟，行到我隔離嘅時候望一望我面前嘅嘢

「嗱！」我將啲嘢放好晒喺枱上面，阿立翹埋雙手等睇好戲一樣

「所以你要整咩特飲？」阿立笑問





「我飲過Okay㗎！」我怕阿立唔信，即刻跳出嚟做個安全擔保，「冇肚痛！」

「信你信你，睇你表演。」阿立雙手一灘，示意我可以開始整

其實完全唔係啲咩好有技巧嘅嘢飲，只係將益力多同雪碧溝埋，兩種飲品會形成一層漸變色

「試下～」我小心咁拎起玻璃杯遞比阿立，「我之前無聊喺屋企整咗嚟飲～」

「既然你話唔肚痛我就信你啦⋯」阿立睇起嚟有啲擔心有啲猶疑，不過佢揀咗信我

「等陣等陣！」我喺佢嘅嘴掂到杯邊嘅時候叫住咗佢，「加個飲管～攪一攪勻先～」

我拎起枝好有特飲feel嘅黃白相間嘅飲管放入杯中，順手咁拎住飲管攪兩個圈





「今次真係Okay，試下～」我輕輕拎住飲管，將飲管拎到佢嘴邊，飲管嘅邊緣都已經掂到佢嘅嘴唇

阿立直接飲咗一啖，佢靜咗一靜，我望住佢思考緊嘅表情都有少少嘅緊張

「嗯，唔錯喎⋯！」阿立難以置信咁瞪大眼，所以我話，佢到底擔心緊啲咩，「你試一啖？」

阿立伸手拎住飲管將飲管放到我嘅嘴邊，其實我之前都已經飲過，但我都係輕扶住飲管探頭飲咗一啖

「嗯！」我點點頭，豎起手指公，「好飲嘛～」

唔⋯嗯？啱啱我同佢係唔係用咗同一枝飲管飲嘢⋯？

廚房忽然間靜咗落嚟，我抬頭望向阿立嘅時候，阿立手上仲拎住仲有半杯特飲嘅玻璃杯；阿立好似都發現咗呢件事，有啲欲言又止，啱啱好似太開心，所以好自然咁就做咗越線嘅嘢

「呃，你飲呢杯呀～」我將我沖好嘅另一杯擺好飲管遞比佢，「呢杯冇飲過。」

「嗯⋯」阿立嘅態度忽然間比啱啱冷淡，唔知係唔係因為尷尬所以先係咁

「呢杯比我啦～」我微笑住拎走阿立手上得一半嘅特飲，「我出去食埋碗飯先⋯！」

我側一側身喺阿立嘅身旁小急步行出廚房，食飯嘅時候忽然間變得好安靜，有種莫名嘅尷尬喺屋入面瀰漫

「講得太開心搞到over咗添⋯」我都唔敢抬起頭望阿立，只係默默咁食埋碗飯

「食完就擺喺度啦，我陣間洗。」阿立淡淡咁講

「我洗呀⋯！」我見阿立準備執嘢，即刻快佢一步伸手疊好碗筷，「你煮咗飯，咁我洗碗啦～」

我拎住碗筷行入廚房，直接就開水洗嘢，我喺屋企食完嘢一定即刻洗碗，可能係習慣咗嘅關係

「噠噠⋯」我聽到拖鞋聲，見到阿立拎住兩隻玻璃杯行入嚟

「你擺低比我Okay㗎啦～」我好快咁望一望佢就繼續洗嘢

喺阿立行出廚房之後，我都感覺到自己好明顯咁輕一口氣，本來好似鎖實咗一樣嘅膊頭都放鬆咗落嚟

「下次要小心啲⋯」我邊洗碗邊喺心入面同自己講，「唔可以再過咗條線⋯」




IG Link: https://www.instagram.com/nd_cotttoncandy/?hl=zh-tw