【愛情】關於我一覺瞓醒發現喺初戀屋企⋯！: 14. 我單身
「滋滋—滋滋—滋滋—」喺我手邊嘅出單機一直出咗好多張飲品單
哎⋯！啲單一直彈出嚟，我都摵唔切貼起佢又彈一張新嘅單
「唔該，要一杯mocha。」「要一杯flat white。」「唔該～我想要一杯latte同一杯mocha。」
我淨係聽到啲人落單我已經覺得好攰，不過都冇時間比我諗其他嘢
「呀⋯死啦死啦死啦⋯！」我聽到企喺落單機前嘅Abby一直低聲求救，「入錯咗添⋯！哎呀唔好lag機住⋯！」
Abby係我地cafe新請嘅part time，一忙起上嚟佢就即刻手忙腳亂，佢今日企樓面落單，但佢宜家已經好慌張
「唔好緊張，一緊張就會亂。」我望一望我眼前嘅單，伸手拎起瓦杯，「你冷靜啲慢慢嚟。」
「好多人排緊隊⋯！」Abby好緊張咁喺落單機上㩒嚟㩒去，「唔好意思⋯！」
我望住Abby一個慌張嘅樣，好可惜今日唔多人番工，我手頭上嘅外賣單都仲有八、九張，我實在騰唔到手幫佢
喺呢個著眼點，樂恩喺我身後行過，佢行到去Abby隔離輕拍咗Abby嘅背一下
「Abby你幫手拎餐啦，呢度我嚟就得啦～」樂恩講道
「唔該樂恩⋯！」Abby嘅語氣聽起嚟就好似鬆一口氣一樣
其實做落單位都難，有時客人趕時間，落單嗰陣講嘢都會講得好快，特別係佢一個人叫幾杯嘢飲嗰陣，真係聽慢啲，手眼協調得慢啲都唔得⋯
而且，我地部落單機有時仲會lag一lag，忙起上嚟真係會好煩躁
「哐啦！」
店裏忽然傳嚟一下響聲，本來有啲嘈嘅cafe即刻一秒安靜落嚟
我一隻手仲掂住咖啡機，另一隻手仲拎住鋼杯倒緊奶要拉花，突然一個響聲嚇到我都窒咗一下
「Sorry呀⋯！唔好意思⋯！」我微微一抬眼就見到Abby慌張咁左望右望，「唔好意思⋯！」
我探頭望向外面地下，Abby面前係打碎咗嘅瓦杯同倒瀉嘅咖啡，仲係我啱啱先沖好嗰兩杯
「Sorry⋯！」Abby一臉無助
我將我啱啱沖好嘅咖啡連埋單一齊放喺送餐位
「你有冇整親呀？」我見佢唔小心打爛咗瓦杯就有啲擔心，咖啡啱啱沖起都幾熱
「我冇事呀⋯！但咖啡⋯！」Abby一個就嚟喊嘅表情望住我
「冇整親呀嘛？」阿逸放低手上嘅餐盤大步走入廚房，「你去拎咗其他嘢先啦。」
阿逸拎住地拖喺廚房行出嚟，將倒瀉喺地上面嘅咖啡都抹走，然後又拎住掃把，將瓦杯嘅碎掃走
「知珩，補番嗰兩杯先。」阿逸行入廚房嘅時候對我講
「Okay。」我微微點頭，伸手從杯架上拎兩隻新嘅瓦杯補番單比客人
「Sorry呀知珩⋯又要你重新沖過⋯」Abby行到水吧，細聲咁同我道歉
「唔緊要，你冇整親就得啦，下次小心啲拎實個盤。」我望一望佢，喺將視線收番嚟放喺眼前嘅咖啡嗰陣，我微笑咗一下
「提咗佢好多次⋯」樂恩無奈咁細聲講咗句，「又打爛嘢啦⋯」
「算啦，可能重拎唔穩啫。」我隨口講咗個藉口
Abby喺度做咗大概一個星期，佢番工都番得算頻密，但每次佢番嚟都一定會打爛嘢⋯
星期一嗰日打爛咗一隻碟，星期三打爛咗一盤玻璃杯，今日打爛咗兩隻瓦杯⋯
「睇嚟我地cafe好快可以買過啲新嘅杯碟⋯」樂恩喺我要咁諗嘅時候先一步講咗我嘅想法出嚟
我因為怕Abby聽到會唔開心，所以我都冇出聲，不過呢個打爛嘢嘅頻率真係有啲高⋯
「佢再咁樣打爛嘢落去，會唔會比店長炒⋯？」樂恩回頭，望一望出緊餐嘅Abby
「唔⋯應該都唔會嘅，店長應該都唔會話唔比機會佢就炒佢。」我望住好努力捧住盤出餐嘅Abby對樂恩講道
「但⋯佢一直咁樣打爛嘢都唔係辦法⋯」樂恩三兩下就搞掂晒落單嘅客人，落單處好快又安靜落嚟
樂恩行去廚房幫手，Abby仍然留喺樓面，阿逸就廚房樓面兩邊走，至於我，仍然一邊沖咖啡，一邊聽住出單機一直出單嘅聲音
⋯
喺忙咗成個幾鐘之後，cafe慢慢咁變得清靜，食完嘅客人都逐枱離開，最後得番我地幾個員工喺度
「呀⋯好攰呀⋯！」樂恩行到吧枱前坐低
「忙完一輪又靜咗落嚟。」我輕嘆一口氣，行到洗手盆前洗一洗手
我企喺咖啡機前靠住後面嘅高櫈偷偷睇手機，忙完一輪之後暫時又會靜落嚟
「叮鈴鈴鈴鈴～」門鈴忽然響起嚟，休息緊嘅我即刻放低手機起身
我望住阿立身上孭住相機，推門行入嚟行到落單處，宜家我離落單機最近，所以就我行過去幫佢落單
「飲咩呀？」我企喺落單機前望住睇緊餐牌嘅阿立
「Latte。」阿立放低餐牌，叫咗同上次一樣嘅咖啡
「好，可以坐低等陣。」我拎住單行到咖啡機前面，然後伸手摵咗出單機彈出嚟嘅單
阿立拉開喺吧枱前面嘅高櫈坐低等咖啡，我悄然望一望阿立
「你呢個鐘數先番工呀？」我問阿立
「點會，我今朝一早出咗門口。」睇緊手機嘅阿立抬頭望一望我，「做完嘢番公司。」
「哦～」我笑一笑，阿立坐喺度同我講下嘢，感覺自己都冇啱啱咁攰，「唉～今晚食咩好？」
「嗯？」阿立望一望我，又轉頭望一望周圍，「唔知呀，外賣囉。」
「又食外賣⋯」我無奈咁扁起嘴嘆氣，「食咗兩個星期啦⋯！下次我番媽咪度食飯要打包定番嚟⋯」
「自學啦！」阿立無奈咁笑
「知珩。」阿逸忽然喺廚房行出嚟叫我，我即刻收起小表情一臉認真，「陣間得閒你教一教Abby吧位要做咩。」
「好呀冇問題。」我微微點一點頭
我望住阿逸行離水吧，佢望咗阿立一眼，可能佢認得阿立，上次阿立嚟買咖啡嘅時候佢都喺度
「你嘅Latte～」我將杯蓋蓋實，然後將咖啡遞比阿立
「Thank you～」阿立以同樣輕鬆嘅語氣回答我，喺走前順口咁同我講咗句：「今晚見。」
「Okay～」我點一點頭，望住阿立行出cafe
「你男朋友又嚟搵你啦？」阿逸行過嚟吧枱前，望住閂上嘅門對我講
「唔係男朋友。」我無奈咁搖搖頭，然後轉身行到洗手盆前洗杯
阿立真係唔係我男朋友，我宜家係單身，冇男朋友，真係冇男朋友！
IG Link: https://www.instagram.com/nd_cotttoncandy/?hl=zh-tw