【愛情】關於我一覺瞓醒發現喺初戀屋企⋯！: 06. 晚飯呢？

「叮鈴鈴鈴～」掛喺木門上嘅鈴又響起嚟，我即刻望向門口

「幾多位？」阿逸咁啱喺廚房行出嚟見到有人行入cafe

「搵人。」阿立微微點頭，然後兜過阿逸嘅身旁行到嚟吧枱前面，「USB呢？」

「嗱。」我將USB拎出嚟遞比阿立物歸原主，「還番比你，下次唔好又漏嘢啦。」

「唔小心啫⋯」阿立無奈咁側住頭望住我，「我番去啦。」





「嗯，拜拜～」我微微一笑

「叮鈴鈴鈴～」隨住阿立行出cafe，門閂上嘅一刻，我就feel到有兩個人直盯住我望

「係⋯」我已經準備好回答佢地嘅問題

「男朋友呀？」阿逸即刻瞪大眼一個好奇嘅表情望住我問，「第一次見⋯」

「只係朋友⋯」我諗咗一諗之後微微點頭，冇同佢地解釋咁多嘅必要，咁樣講咗就算





「哦⋯」阿逸同樂恩嘅反應冷淡咁點頭，然後又各自做自己嘅嘢

⋯

「今日又會咁早冇人嘅～太好啦～早啲搞埋啲嘢就番屋企啦～」阿逸企喺洗手盆前將剩低嘅餐具用杯碟洗乾淨

「可以早啲收工咪好囉～呢啲時間通常都冇咩人嚟～」樂恩開心緊分緊餐具，聽佢講嘢嘅語調都知佢心情好

我諗到可以早啲收工，我嘅心情都變得好好，用喉嚨發音細細聲咁哼歌，不過好似比樂恩聽到，佢擰轉頭望住我笑咗一笑





「搞掂⋯！」阿逸將樓面都打掃乾淨，因為啱啱拖完地，地板都仲有啲濕，「等埋你地。」

阿逸行入休息室將圍裙除落嚟掛番喺休息室入面，著住Hoodies嘅佢孭住一個斜孭袋，拉開吧枱前面嘅櫈坐低等埋我同樂恩先走

喺我同樂恩都搞掂之後，我地三個人一齊行出cafe，拎住cafe鎖匙嘅阿逸蹲低鎖上cafe嘅門，我同樂恩企喺佢後面等佢

「7點⋯」我拎出手機睇時間，咁樣又一日，「唉⋯」

「做咩嘆氣呀～」樂恩可愛咁側一側頭望住我問

「唔知食咩好⋯」我無奈咁笑咗一笑，「應該都係食外賣啦⋯」

「你屋企冇煮飯咩？」樂恩問道，佢開心咁拉住我隻手又講：「我媽話今晚煲咗糖水呀～」

唔知係唔係因為樂恩先22歲，啱啱大學畢業冇耐踏出社會，所以佢無論做啲咩都好，喺我呢個已經25歲嘅姐姐眼中睇起嚟仲係好活潑好可愛，講嘢都係吱吱渣渣、笑口常開嗰種





「冇呀⋯我要食飯盒⋯」我望住樂恩，明明番咗一日工都好攰，但佢嘅活潑都有啲感染到我

「行得啦！」阿逸鎖好門之後企起身

「我行嗰邊搭車～」樂恩指一指右邊講道，「逸大叔你係唔係行呢邊？」

「本來想話係，但聽到你叫我做逸大叔，我就寧願兜路行去巴士站⋯」阿逸整好個斜孭袋嘅位置，特登搖搖頭唔望樂恩

「Okay！行啦逸大叔！」樂恩伸手拉住阿逸就跑起嚟，「拜拜知珩～」

「拜拜～」我企喺cafe門口望住佢兩個同我揮手，我都忍唔住想笑

阿逸有時真係冇樂恩辦法，佢對樂恩都唔錯，可能因為樂恩年紀比較細，所以佢對樂恩會包容多啲啦





唉～我要自己一個人行去地鐵站啦～諗下番到去買咩外賣好仲好啦～

我行到去地鐵站企喺月台等車，喺我身邊企咗好多都係啱啱收工嘅上班族，不過我諗坐office嘅工應該更早放工⋯？不過我地cafe都算係早收工

「往堅尼地城列車即將到達—」月台響起廣播，我抬頭望向我左手邊嘅電視，車到啦，又到番屋企嘅時候

「阿立⋯？」我嘅視線自然咁向下移動嘅時候，見到阿立就企喺離我有三個車門遠嘅地方，「唔⋯我要唔要過去叫佢？」

算啦，都係唔好啦⋯我覺得我行到過去又會尷尬⋯所以都係唔好啦

宜家好似好陌生，但我地以前其實都幾熟，只係後來發生咗啲事，所以我地就慢慢咁疏遠咗

「算啦唔諗啦！」我喺心裏對自己講，最主要係我唔想回想起嗰段日子

「嘟嘟嘟嘟嘟—」





我行落車，車門啱啱好閂埋，我企喺玻璃幕門前面，頭向左側一下又向右側一下鬆一鬆筋骨

「行得～買飯⋯！」我喺心入面講完，然後就轉身向右邊行，因為最近嘅電梯喺右邊

我一轉身就見到阿立向我呢邊行過嚟，唔通佢見到我所以行過嚟呢邊？但⋯唔會呀，因為佢耷低頭睇緊手機

「我要唔要叫佢一聲⋯？」我回頭望咗一眼，我就企咗喺原地

佢一步一步愈行愈近，喺我仲猶疑緊應唔應該叫佢嘅時候，佢喺距離我一個車門嘅位置抬起頭，佢發現我就企喺佢嘅正前方

「嗨⋯」我喺打招呼嘅時候，心入面有種莫名嘅尷尬感湧上嚟，同時有啲後悔自己做咩要上前叫佢，「你番屋企⋯？」

「係呀。」佢反而好冷靜咁點一點頭





「你食咗飯未呀？」我自然咁180度轉身同佢行同一邊去車尾嘅電梯

「未，你食咗啦？」佢好自然咁就問番我

「未呀⋯仲諗緊食咩外賣好⋯」我有啲唔好意思咁笑一笑，「你打算食咩呀？跟你？」

我好下意識咁就咁樣同佢講，我自己講完都窒咗一窒

「唔想嘅話都唔緊要⋯！」我免得佢誤會我，我即刻補充一句




IG Link: https://www.instagram.com/nd_cotttoncandy/?hl=zh-tw