【愛情】關於我一覺瞓醒發現喺初戀屋企⋯！: 07. 我還是記得
我一個人坐喺靠牆嘅卡位，阿立叫我過咗嚟落單，叫咗自己要食嘅嘢先
「唔⋯食咩好⋯？」我拎起餐牌睇，「要唔要幫阿立叫埋⋯？」
我有啲猶疑點算好：佢叫我落單，如果我淨係叫自己嗰份好似唔太好，但如果幫佢叫埋，但佢咁啱又唔係想食呢樣嘅話又好似我自作聰明咁⋯
算啦，等我睇下食咩先再講⋯
「你落咗單未？」阿立行番番嚟坐低喺我對面
「嗯，落咗啦。」我微微點頭，見到佢拎起餐牌嘅時候，我即刻開口：「我幫你叫咗啦⋯」
「你幫我叫咗？」阿立有啲訝異，「你叫咗咩？」
「我叫咗—」
正當我打算答佢嘅時候，侍應拎住一碟焗肉醬意粉行過嚟放喺佢面前嘅時候，佢先係露出一個有啲意想不到嘅表情，然後露出笑容：「原來係呢個。」
「我唔知你仲係唔係中意食呢個，自把自為幫你落咗單⋯」我微微耷低頭，有啲尷尬咁笑咗一手，雙手嘅食指都因為我覺得有啲唔自在咁輕輕扣住
「Okay呀～我本來都係打算叫呢個。」阿立喺隔離拎起隻叉放喺碟邊，然後好似好順口咁就補一句：「你仲記得呀？」
「我又未至於會完全唔記得⋯」我環顧四周，同以前嘅格局冇咩太大嘅改變，不過又好似唔係同嗰陣完全一樣，「以前⋯我地唔係成日都喺呢間食飯咩？」
以前喺學校學校附近都有呢間餐廳嘅分店，所以我地好多時都會喺放補課之後去食飯；就算係屋企附近都有，我地都會喺屋企附近嗰間度食
阿立好專一，次次都叫呢個焗肉醬意粉，食到我都記得佢次次都一定要叫呢個，只係估唔到宜家佢都係⋯
「以前做學生邊有錢食貴嘢？」阿立笑咗一笑，「只係我有啲意外你仲會記住⋯」
阿立拎起放喺碟邊嘅鐵叉，但佢唔係要食飯，只係雙手拎住隻叉，將隻叉漫無目的咁左轉右轉
「嗯⋯」我低聲回答，視線都下意識移開
「嗰陣你話，只要我地分咗手，你就唔會再記住同我有關嘅任何事⋯」阿立嘅目光落喺佢手上嘅叉上，臉上仍然掛住淡淡嘅笑容
「嗯⋯」佢突然提起，搞到我即刻靜咗唔識答佢其他嘢，「唔記得啦⋯」
我只好望向窗外，令自己嘅視線唔會同佢有交匯，唔想氣氛冷卻，唔想變得尷尬
你⋯仲記唔記得你第一次拍拖嘅時候係點樣？嗰個人係一個點樣嘅人？可能呢種事已經耐到記唔起啦⋯但我，仍然記得嗰個人⋯
我第一次拍拖，係同我嘅初戀一齊，對我嚟講，佢就好似一個小太陽一直喺我身邊
我地係小學同學，上到中學嘅時候，喺班上嘅時候我同佢嘅交集都唔會有太多，多數都係私底下先會send message講嘢
「點解係佢呀？」「你兩個明明好少交集，點解會突然同咗佢一齊？」
呢兩個問題，係我喺同佢一齊嘅時候最常聽到嘅問題
大家知道我地一齊嘅時候都覺得好好奇，我同佢明明冇咩交集，但點解會一齊咗？
對我嚟講一啲都唔神奇，亦唔係突然間嘅事，所有嘢都一定係有跡可尋，我又點可能突然間中意一個人⋯？
我本來，就唔相信一見鍾情⋯
「我地都識咗咁耐啦，都唔係啲可以決定記唔記得嘅事⋯」我解釋道
「都係，我地都真係識咗好耐。」佢微微一笑，望住我好雲淡風輕咁講，但下一秒佢又將視線移開：「但都好耐冇見，中學放榜之後開始⋯」
聽到佢講出嚟嘅後半句，我忍唔住皺一皺眉頭，耷低頭嘴角上揚，但呢個笑容，係冷笑⋯
「唔係因為你不辭而別，粒聲唔出就搬咗屋，所以我地先會一直冇再見咩⋯？」我其實好想咁問佢，我嘅心深處對於當年佢突然搬走嘅舉動仍然係介意，「你點解⋯要不辭而別⋯？」
但我最後都係冇將呢兩個問題問出口，過咗去嘅事就由得佢過去，再追究都冇用
食完飯之後，我同阿立沿路慢慢行番屋企，但我同佢之間嘅距離隔到好開，大概係你微微側一側身都可以行過嘅闊度
喺經過一間蛋糕店嘅時候，我停低咗企喺蛋糕櫃前面，忽然間好想食蛋糕⋯！
「知珩？」阿立見我忽然停落嚟就跟住停低，轉身走向我
有啲想買兩件蛋糕番去食，但唔知咁食會唔會肥呢⋯平時阿逸喺cafe成日都整甜品比我地試味，我再咁食會唔會肥㗎⋯？
「你想食蛋糕？」阿立行到我隔離同我一齊望住玻璃櫃入面嘅蛋糕
「少少⋯」我彎住腰望啲蛋糕，睇起嚟每一款都好好食
「想食就買件買番食。」阿立笑咗一笑，伸手指住玻璃櫃嘅其中一款蛋糕：「有芝士蛋糕。」
「你食唔食？」我禮貌上問佢一聲，「佢買二送一。」
「你食啦，我唔食啦。」阿立搖搖頭，「我麻麻地食蛋糕。」
我望住櫃中嘅蛋糕，思考一下自己係唔係真係想食蛋糕，不過如果會猶疑，即係我都唔係真係超想食，只係心思思想食蛋糕啫
如果真係想要，又點會猶疑⋯？
我望住阿立向前行嘅背影，以前有人講過，只有女仔先中意一直回頭望向以前，留戀以前美好嘅事；但男仔就唔一樣啦，男仔會喺短時間嘅消沉後向前望
所以佢應該早就向前望啦⋯唔會好似我一樣，喺再一次見到面嘅時候會諗番起同以前有關嘅事
我地呀⋯真係只係禮貌上咁好好相處，實際上已經係兩個陌生人嘅狀態
以前嘅狀態都冇辦法搵番番嚟，一旦踏入咗成為陌生人嘅範圍，就冇辦法再番到去以前嘅親密狀態⋯
IG Link: https://www.instagram.com/nd_cotttoncandy/?hl=zh-tw