【愛情】關於我一覺瞓醒發現喺初戀屋企⋯！: 05. 立與羽

「你番工番呢邊？」我見阿逸同樂恩都入咗廚房就細聲咁問阿立

我唔係明知故問，而係就算一齊住咗成個幾星期，我都唔知佢幾點出門口，因為平時我同佢基本上9成時間都係各自喺自己房，門都係閂到實一實嗰種

「係，最近公司搬咗過嚟呢邊。」佢好似對普通人一樣平靜咁同我講

「你番咁晏嘅？又⋯起唔到身⋯？」我自然咁笑一笑問道，今朝我起身出門口嘅時候，佢嘅房門一直閂埋

以前番學嘅時候，雖然佢唔係遲到嘅慣犯，但偶爾都會唔願起身，懶床搞到遲到





「唔係。」阿立輕輕一笑，「只係我係彈性上班時間。」

阿立企喺水吧前等，我將沖好嘅咖啡倒入套咗隔熱套嘅外賣杯中，然後將咖啡放到枱上

「你嘅Latte。」我雙手將咖啡遞比佢，「拜拜～」

「唔該。」阿立點一點頭，拎起咖啡，「拜拜。」

「叮鈴鈴鈴～」門隨住阿立拉開門撞到門上嘅鈴而發出提示聲響





我望住佢行出cafe嘅身影，諗番起啱啱佢嘅態度就係當得我係普通人一樣

其實都正常，我地都好耐冇見，應該係由中六放榜之後都冇再見過面

畢業之後如果冇特別維繫、保持聯絡，最後變成一個普通嘅舊同學都係好正常嘅事

「你識佢㗎？」樂恩見阿立一走，佢即刻轉身行到我隔離望向門口問

「嗯，以前嘅同學。」我好簡單咁概括咗我同阿立嘅關係





「哦～」樂恩點頭，下一秒突然一手捉住我，「你個同學漏咗嘢喺度。」

「USB？」我放低手上嘅抹布，拎起USB，上面扣咗個長方形嘅銀色金屬牌，牌上寫住一個「翊」

「個牌上面寫咗咩呀？」樂恩好奇咁拎起掛喺上面嘅牌，「翊⋯？」

「嗯，係佢個名其中一個字。」我微微點頭

「你打比佢叫佢番嚟拎番啦～」樂恩講道，「可能USB入面係對好重要嘅嘢嚟。」

「嗯，好呀⋯」我有啲猶疑咁從圍裙嘅口袋中拎出手機，喺手機嘅聯絡人中搵阿立嘅電話，「搵到⋯」

我打出呢個電話，就只係搏一搏，好彩嗰陣我冇del咗佢個電話，如果唔係我都唔知點搵佢好

「嘟嘟⋯嘟嘟⋯嘟嘟⋯」手機裏傳嚟撥號中嘅聲音，我嘅心亦默默地緊張起嚟





明明只係打個電話，但我都有啲緊張，好耐都冇打過起呢個電話

「嘟嘟⋯嘟嘟⋯」

撥號聲響得愈耐，我就愈緊張，我望住拎喺手上嘅USB，其實我比較擔心呢隻USB對佢嚟講好重要

「如果佢番工要用USB，咁佢一定要番嚟拎番先番到工⋯」我喺等佢聽電話同時喺心裏講

「嘟嘟⋯嘟⋯」「喂？」

「喂？」阿立聽咗嘅電話，我即刻開口，「知珩呀。」

「知珩？做咩？」聽佢嘅語氣佢明顯係覺得好奇怪點解我會打比佢





「你啱啱嚟買咖啡嘅時候，漏咗隻USB喺度，可能你拎嘢嘅時候唔小心跌咗出嚟。」我望住放喺手心上嘅USB講道，「你方唔方便過嚟拎番？」

電話裏頭即刻靜咗落嚟，我抬頭望一望掛喺牆上嘅復古鐘，可能阿立都番到公司附近，呢度附近都係啲office tower

「好呀，我宜家番嚟。」過咗一陣，阿立再開口，然後好順口咁同我講：「你幫我keep住先。」

「哦哦，好呀。」我即刻答應佢，然後將佢嘅USB先放喺我嘅圍裙口袋入面

我將USB同我嘅手機擺埋一齊，免得整唔見佢嘅嘢

「我仲以為，阿立會真係唔聽我電話⋯」我喺心入面鬆咗一口氣

我嘅手伸入圍裙袋拎出USB，摸咗掛喺上面嘅牌一下，指尖可以感覺到喺牌上刻咗字嘅地方係有啲凹凹凸凸

「翊⋯」我望住牌上嘅字，諗番起我一直叫佢阿立嘅原因





喺小學二年級嘅時候，係我第一次同佢同班；當時佢坐我隔離，但我完全唔識讀佢嘅名

「立⋯羽⋯咩字嚟⋯？」我望咗佢個名好一陣都唔知要點樣叫佢，連坐隔離嘅同學都唔知叫咩名好似有啲有啲離譜，「要讀羽定係立⋯？」

但「翊」呢個字對當時嘅我嚟講算係我冇見過嘅字，所以唔識讀係正常，不過我估係讀立

「嗨～阿立。」「嗨⋯但我叫許翊瑜，唔叫立。」

「唔識讀嘛⋯」「翊呀，「亦」呀⋯你⋯唔識中文⋯？」

「咁我可唔可以叫你阿立？好難讀⋯我已經又唔係好記得⋯」「你係金魚得三秒記憶⋯？」

由嗰次之後，我一直都冇將我叫佢嘅方式改番過嚟，一直都係叫佢阿立，佢亦會應我





後來，上到中學嘅時候，我偶然提起唔識讀佢個名呢件事：「好似都冇人叫你阿立⋯」

「因為個個都識中文，得你唔識囉～」阿立笑道

「咩呀！？係我叫慣咗口！」我即刻反駁佢，笑笑口咁同佢講：「而且咁樣唔係幾好咩？得我咁樣叫你嘅話，只要你一聽到人地叫你「阿立」你就可以即刻知係我叫你～」

「隨便你啦～我又冇阻止你、唔比你咁樣叫我⋯」阿立聳肩，「咁，獨特都係好事嚟嘅～」

對我嚟講，如果要我改口嘅話，我應該會叫得好唔自在，所以一直我都係叫佢阿立，亦應該只有我係咁樣叫佢

叫到宜家我都係叫緊佢阿立，當然宜家我已經識呢個字，但都一直用緊以前嘅叫法嚟叫佢




IG Link: https://www.instagram.com/nd_cotttoncandy/?hl=zh-tw