【愛情】關於我一覺瞓醒發現喺初戀屋企⋯！: 04. 心酸又苦澀

「叮鈴鈴鈴～」

我推開cafe嘅門，門上掛住嘅鈴即刻響起嚟，掛喺門入面嘅牌仍然係「休息中」

「今日整咩甜品呀？」我著住cafe嘅圍裙喺休息室行出嚟，行到吧枱對住嘅水吧位置，伸手拎咗一包全新嘅咖啡豆落嚟

「嗱，比你試下～」阿逸將額外整嘅試味demo遞比我，「今日嘅蛋糕！」

「試下先～」我拎起叉切咗一細啖擺入口，仔細咁試真啲蛋糕嘅口感、味道同帶比嘅人感覺





「點呀？Okay唔Okay呀？」阿逸期待咁望住我，我舔一下唇，然後放低手上嘅叉，阿逸等緊我比評語

「餅底嘅厚薄啱啱好，酸酸甜甜嘅味道好perfect咁mix埋一齊，好啱做飯後甜品，而且口感好似有啲入口即溶嘅感覺⋯」我認真比出仔細嘅評語，阿逸一直聽我講一輕點頭，「好食！」

「你知唔知佢等咗成朝就係為咗等你番嚟試味？」著好圍裙嘅樂恩從員工嘅休息室行出嚟，邊行入嚟吧枱邊將圍裙綁好

我望一望阿逸，見到阿逸望住樂恩微微一笑之後反咗個白眼

「我番咗嚟成朝又唔見你比我食？」樂恩行到洗手盆前開水洗手





「你唔食芝士食咩芝士蛋糕？」阿逸反問道

「咁都記得勁喎～」樂恩笑道，但聽起嚟完全唔係真心讚緊阿逸

「你兩個日日都係咁唔攰㗎咩？」我無奈咁笑問道

佢地兩個日日都要咁樣嘈一陣先可以，可以話係我地cafe嘅日常嚟，我通常都係望住佢地吵鬧，有時雖然覺得令佢地嘈起嚟嘅內容好幼稚，但望住嘅時候有時都會覺得好有趣

「但你打算叫呢個蛋糕做咩？一定唔會係叫Lemon cheese cake咁簡單掛⋯」樂恩行到我隔離嘅時候順手拎起我放喺碟上嘅叉，切一啖蛋糕試味，「同我地cafe嘅嘢嘅名唔夾。」





「咁你有咩提議呀⋯」阿逸無奈咁望住樂恩問道，「講嚟聽下。」

「叫⋯唔⋯諗唔到。」樂恩努力諗咗一陣就放棄思考，直接行去一旁做開店準備

「嘖⋯你真係完全幫唔到手⋯」阿逸抱怨樂恩道，然後佢望向我問：「知珩你話呢？」

「唔⋯冇咩頭緒⋯」我微微一笑講道，諗蛋糕名真係唔係我嘅專長，「改名呢啲嘢不嬲都係你做開㗎啦～」

「唔⋯」阿逸坐喺吧枱前翹埋雙手認真咁沉思

我喺阿逸諗緊是日蛋糕名、樂恩又執緊餐具餐牌嘅時候，拎起叉默默咁食埋件蛋糕

「我諗到啦！」阿逸忽然間講道

我望一望阿逸，只見阿逸拎起一塊小黑板，用粉筆喺黑板上寫：「初戀·回憶·日記」





「就呢個啦！」阿逸笑笑口咁講道，然後抬頭望我，「點呀？呢個好唔好？」

「幾好呀～」我都未開口，樂恩已經幫我代答一樣先一步開口，「我覺得唔錯～初戀就係會比人一種好甜蜜但有時又會好難過嘅感覺呀！」

「我問你咩⋯我問緊知珩⋯」阿逸無奈咁放低小黑板，淨係拎住粉筆行到仍然放喺門內嘅立牌前蹲低

我再食一啖蛋糕，感覺⋯忌廉芝士同糖嘅甜味好似淡咗，但檸檬帶嚟嘅酸嘅感覺好似又濃咗啲⋯

初戀回憶日記⋯聽起嚟同lemon cheese cake嘅感覺好似幾夾⋯初戀本來就係羞澀又充滿幻想，雖然可能唔成熟但只要一齊，就比任何事都開心甜蜜

阿逸跪喺黑板前寫低今日嘅「是日蛋糕」，樂恩一直住望阿逸寫黑板，然後忽然偷笑

「你信唔信陣間佢實話起唔到身？」樂恩上身湊近我細聲咁同我講，又回頭望一望阿逸





我聽完佢咁講之後，同佢同一時間望向喺門口寫緊最後一個字嘅阿逸，阿逸寫完之後雙手㩒住膝頭準備起身，但只係上身前傾咗一下又冇起到身

「起唔到身呀⋯！」阿逸無奈咁大叫，樂恩真係講中咗

「你睇你呀，都未到30就已經腰痛，逸大叔～」樂恩笑住行過去將阿逸拉起

「叫邊個大叔呀？我今年先28！ 」「四捨五入咪30歲！識唔識數學？」

「30都唔叫大叔啦係唔係呀？你得罪晒所有30歲嘅男人⋯」「Sorry，對我嚟講得你一個係大叔～」

睇下睇下，佢兩個又嘈啦⋯但佢兩個的確為未有客人嘅cafe帶嚟少少生氣

「搞掂～備料先～」樂恩準備完樓面嘅嘢就哼住歌行入廚房，睇起嚟佢今日嘅心情好好

「你今日要飲咩呀？」我拎起一個藍色嘅瓦杯問阿逸





阿逸係我地cafe嘅甜品師，專做甜品，每日嘅甜品都係佢負責整，所以佢比我地更早番到嚟，當然有時客人點嘅意粉嗰啲佢都會整下

可能因為佢比我地早番嚟嘅關係，所以每日喺我番到嚟完成tune shot之後，阿逸都會即叫一杯咖啡，做每日第一個飲咖啡嘅「客人」

「我今日飲Cappuccino。」阿逸起身行入廚房嘅時候回頭對我講道

「Okay。」我微微點一點頭示意收到佢嘅訂單

今日天氣好好，陽光普照，咁啱又有少少風，唔會好焗好熱

我向來都覺得我地cafe嘅位置好好，喺我呢個位望出去，就可以望到外面街發生緊啲咩，有時就算冇客都唔會悶親我

「唉⋯唔知今日忙唔忙呢⋯」我望住外面行過一個又一個嘅上班族





喺阿逸嘅咖啡沖好之後，我將佢要Cappuccino放喺佢一行出嚟就可以見到嘅地方，佢自己識得預時間，所以我就唔叫佢出嚟

喺一切都準備好之後，樂恩行到門前將掛喺門上嘅牌由「準備中⋯」翻轉做「營業中～」

「唔知今日第一個客人係邊個呢⋯？」我每日都會期待第一個客人係邊個，估下今日嘅第一個客人係唔係同琴日一樣，「不過應該唔會啦⋯宜家都10點幾啦⋯」

我企喺咖啡機前面趁冇人嘅時間睇一陣手機，手機先啱啱拎起，門口就傳嚟「叮鈴鈴鈴～」嘅清脆聲

我抬頭望向門口，企喺我後面洗緊杯嘅樂恩都即刻下意識望向門口

我即刻呆咗一下，對方嘅手推住門，同我對上視線嘅一刻，佢行嘅步伐都窒咗一下

「係，落單呢邊。」我若無其事咁開口，示意佢可以過嚟落單

「要杯Latte，拎走。」佢行到我面前望一望餐牌講道

我收完錢之後行到咖啡機前，偶爾又下意識一樣抬眼望一望佢

今日居然會喺呢度見到阿立⋯？以前喺度都冇見過佢喺呢頭出現，今次真係第一次




IG Link: https://www.instagram.com/nd_cotttoncandy/?hl=zh-tw