【愛情】關於我一覺瞓醒發現喺初戀屋企⋯！: 03. 我的初戀

我嘅同屋主許翊瑜，係我嘅中學同學，其實仲係小學同學，我地的確係以前就識，不過合租一齊住係上上個星期嘅事

我同佢就係普通嘅同屋主，住喺同一間屋，所有嘢都係AA制，唔存在任何肉體關係亦唔係情侶

本來同我合租嘅係我嘅大學同學，最後佢突然話佢最後都係同佢男朋友住

但我嗰陣已經同我媽講好晒，住邊度、同邊個都已經講好晒，我仲好肯定咁同我媽咪講一定冇問題，我媽亦已經批准咗我搬出去住

點知我個friend就臨時改變主意，然後仲好快咁話唔介意嘅話可以同佢佢另一個朋友合租





「咁啱我個friend需要有人同佢分擔下，你唔介意嘅話，可以幫你約佢～」當時，我呢個friend係咁講

咁我自然都會覺得佢呢個friend係女仔，所以應承咗，然後出到嚟之後⋯

「你點解喺度⋯？」我企喺屋企門口呆咗咁望佢

「你就係靖佑話要合租嗰個人？」阿立企喺門前推住屋企嘅大門，困惑咁望住我

「你就係靖佑話急需要個人分擔租金嘅人⋯？」我自己都覺得有啲難以置信





總之最後，我都係應承咗⋯邊個叫我好肯定咁同媽咪講，我媽咪亦好快咁就執好晒我間房⋯

然後我就搬咗過嚟做同屋主同阿立合租，宜家嘅情況係我同阿立一齊住咗大約兩個星期、半個月左右⋯

「唉⋯」我望一望佢顯示號碼號螢幕，又望一望我手上拎住嘅單

雖然阿立話唔洗，但我都係買埋比佢⋯都可以話我呢份早餐係用嚟為今朝嘅事道歉嘅賠禮⋯

我番到屋企見到阿立嘅房門閂埋咗，佢應該喺房⋯？





我先將自己嗰份早餐擺低喺枱，然後拎住另外買嘅早餐行到佢嘅房門口

「叩叩—」我提起手喺佢嘅房門上敲咗兩下

「入嚟啦。」裏面傳嚟阿立示意批准嘅聲音，我先扭門柄行入去

「早餐。」我將早餐遞起遞到佢面前，我見佢好似做緊嘢，所以都冇放喺佢枱上面

佢冇即刻伸手接，只係有啲愕然咁望住我，我企咗喺度都覺得有啲尷尬，即刻郁一郁隻手，將早餐又遞近咗啲

「你快啲拎啦⋯手一直遞起好攰⋯」我撇開臉唔望佢，只係用淡然嘅語氣態度去掩蓋我嘅尷尬感

「咁，多謝啦⋯」佢伸手接過我手中嘅膠袋，然後打開膠袋望咗一眼

我為咗想睇下佢嘅反應而喺佢接過外賣之後偷望佢一眼，佢好奇咁睇緊膠袋入面係啲咩早餐





「食啦⋯係你會食嘅嘢嚟⋯」我細聲咁講道

呢句說話一從我把口講出嚟，佢即刻愣咗一下，下一秒佢抬頭望向我；佢嘅表情好似問緊我「你仲記得⋯？」一樣

佢中意食啲咩，我都係記得嘅，畢竟我地都⋯識咗咁耐，有啲嘢唔係話過咗好長時間就會忘記

「嗯，多謝你嘅賠罪早餐。」佢回頭望住我，對我笑咗一笑

我都話，佢一早就知呢個早餐係賠罪早餐嚟⋯睇下，佢都咁講啦⋯

「嗯。」我唔太想承認，所以淨係冷淡咁回應咗一下就轉身行出佢嘅睡房，順手咁將佢嘅房門閂埋

唉⋯我有時都覺得個天係特登整蠱我，要同我開個玩笑⋯有啲人我以為，喺嗰陣之後就真係唔會再見，但點知過咗咁耐之後，我地都係再見面，仲變成咗宜家呢個狀況





同自己嘅初戀一齊住到底係一個點樣嘅體驗？係開心？係震驚？係覺得好似番咗去以前咁？定係有種⋯失而復得嘅感覺⋯？

對我嚟講，大概會係⋯震驚⋯愕然⋯同埋，「嗯。」

呢個「嗯。」嘅意思係，因為我對佢嘅感覺已成過去，所以我唔會再有嗰種「呀！！！我可以同佢喺好近嘅距離一齊呀！！！」嗰種少女漫嘅感覺

因為我都已經唔係最青春活潑嗰陣嗰個我，我覺得宜家嘅我，同佢保持喺同屋主呢個距離就足夠

⋯

「番工番工番工！」我化個日常番工妝，邊自言自語邊喺睡房同廁所來回急步行，「唇膏喺房⋯」

廁所就對住阿立嘅睡房，佢嘅房門口仍然掛咗一個「Do not disturb」嘅木牌

「睇嚟仲未起身⋯」我喃喃自語道，然後望一望擺咗喺層架最高嗰層嘅鐘，「佢會唔會遲到⋯？」





以前番學嘅時候，阿立都有懶床嘅習慣，番學基本上一係遲到一係喺打鐘前一刻先番到嚟學校⋯

小學嗰陣有冇我就唔記得啦，不過中學嗰陣一定有，因為我好記得佢每一次行入課室嘅時候，就係班主任開始點名、嗌咗第一個同學嘅名嘅時候

我呢種番工番學一定唔會遲到嘅人，完全唔明白佢點解有鬧鐘都可以翻瞓

「算啦由得佢啦⋯都唔係小朋友啦⋯」我無奈咁搖搖頭，拎起眼線筆繼續化埋個妝

一齊住咗成半個月，我都唔知道阿立到底係番緊啲咩工，唔⋯其實都唔係完全唔知，我聽靖佑提過，阿立好似喺廣告公司做

不過廣告公司番工嘅時間咁彈性㗎咩？彈性到佢可以喺10點嘅時候仲喺房瞓緊，有時我都唔知佢出咗門口未，佢個房門係長期閂埋

不過算啦，我都未顧掂我自己，我都係唔好花時間理人地嘅事，都係顧掂我自己呢個就嚟要出門口但呢一刻仲化緊妝嘅人比較好⋯








IG Link: https://www.instagram.com/nd_cotttoncandy/?hl=zh-tw