【愛情】關於我一覺瞓醒發現喺初戀屋企⋯！: 02. 賠罪早餐

「唉⋯」我最後揀咗坐起身嘆氣，「一定係啱啱太激動，一大清早就搞啲咁嘅嘢嚇親我⋯」

既然瞓唔番，我都係起身啦⋯

我落地著上拖鞋，拎起放喺床頭嘅手機，拖住腳步行到房門前，伸手捉住門柄，但喺我要扭門柄嘅時候有啲猶疑

「唔知阿立起咗身未，定佢仲瞓緊⋯」我有啲猶疑

我左手叉住腰，成個人都向左側，將重心放到左腳；我猶疑緊要唔要出去，如果宜家出去見到佢，一定會好尷尬





今朝早我直接好似鬧咗佢一餐咁⋯唉⋯男女合租就係有呢個問題⋯佢應該唔會嬲⋯？

「咔⋯」我輕輕力咁扭動門柄，將門開咗一個小小嘅門縫，我喺門縫望出去，望下出面有冇人

阿立嘅房門好似冇打開到，咁佢應該仲係瞓緊覺⋯

我輕手輕腳咁行出房打算去廁所沖個涼順便梳洗埋

「哇⋯！」我一行出去，行到廁所門口嘅時候就見到阿立打開廁所門行出嚟，「許翊瑜你嚇死我啦⋯！」





「我比你嚇死就真⋯」阿立無奈咁講道，然後側一側身喺我隔離行出嚟

我尷尬咁行入廁所，我都唔想㗎⋯係人嘅第一反應⋯

我望住鏡中嘅自己嘆一口氣，我都真係服咗自己⋯可以入錯房都有嘅⋯

我梳洗完沖埋涼行出廁所，換番屋企衫就舒服晒，著咗全晚嘅衫都要掉去洗

「不過⋯我其他嘢呢⋯？」我望住手上嘅衫褲有啲困惑





我打開門出行廁所，一踏出走廊同客廳連接住嘅位置嗰陣，我又呆咗⋯！

我件外套、我個袋、我對鞋⋯衫喺枱、袋喺梳化、鞋就一隻喺路中心一隻喺門前

我即刻小跑去執番所有嘢，將鞋放番好，將外套同袋拎番房，然後再跑去廚房將啲衫褲掉入我個洗衣籃入面

我將洗衣籃嘅蓋閂埋，轉身望向沖緊咖啡嘅阿立，其實我應該要為今朝嘅事道歉⋯

「呃⋯阿立⋯」我轉個身，雙手放喺身後掂住住洗衣籃嘅邊，「今朝早sorry⋯」

「唔緊要。」佢擰轉頭望一望我，唔太在意咁笑一笑

「我冇心㗎⋯！應該係因為我琴晚飲醉咗⋯迷迷糊糊咁所以入咗你房瞓，我冇心㗎⋯！」我即刻澄清

「我冇嬲。」佢好平靜咁講





「真係？」我側一側頭望佢，想從佢嘅側面睇清佢係唔係講緊真話

「真係。」佢無奈咁笑咗一下講道，「冇講大話嘅必要。」

「哦，嗯⋯」我微微點頭，「咁好啦⋯」

企喺廚房嘅我同佢靜咗落嚟冇講嘢，氣氛突然間又有啲尷尬⋯雖然佢話佢冇嬲，但我就覺得周身唔自在

「你洗唔洗食早餐呀⋯？」我嘅良心都係過意唔去，所以帶住道歉性質問佢，「我可以去買早餐㗎！」

佢擰轉頭望我嘅一刻，從佢嘅眼神已經可以知道，佢應該就已經明白我呢個提議係用嚟賠罪

「唔洗，我飲咖啡就得。」佢笑一笑，舉一舉起手上裝住咖啡嘅杯，然後拎住咖啡行出廚房





雖然佢話唔洗食早餐，但我都要食早餐⋯所以，我最後都係換咗件衫就落街買早餐比自己食⋯

我落到樓下嘅時候睇手機先見到浩宜send咗個message比我：「起身call我」

睇時間應該係佢琴晚番到屋企之後send比我，我嗰陣應該都瞓咗，所以都冇睇到浩宜嘅message

我拎起電話打番比浩宜：「喂？浩宜，我起身啦～」

「起身啦？點呀？頭痛唔痛？」電話裏傳嚟浩宜輕輕一笑嘅聲音，佢仲好意思笑我，「飲到咁醉呀嗱～」

「仲好講，最衰就係你！」我忍唔住抱怨起嚟，「搞到我⋯總之好麻煩啦！」

我本來就已經有啲頭痛，諗起今朝嘅事，我個頭仲痛，我伸手就托住額頭

「點知你酒量真係咁差⋯」浩宜無奈咁講，「你琴晚夜番比你個同屋主教訓呀？」





佢邊有時間教訓我？我番到嚟嘅時候佢都瞓咗啦⋯！而且我有同佢講我會遲番去，我都好有交帶㗎！

「咁又冇⋯」我諗起今朝早起身嗰陣，即刻覺得成塊面都又紅又熱，「只係我琴晚番到嚟入錯房入咗佢房瞓⋯」

「吓？咁點呀？有冇發生啲咩？」浩宜關心嘅重點完全錯晒

作為好朋友，第一時間係唔係應該先關心我呢個朋友？而唔係仲掛住喺度食花生？

「冇呀！」我即刻大聲答佢，「諗咩呀你！」

「你地咁熟都唔緊要啦係唔係？」浩宜笑道，「你地以前都係中學同學，又咁熟～」

「呢個係重點咩？」我無奈咁問，「同熟唔熟呢件事係一啲實際關係都冇⋯」





我地以前係識，但呢個完全唔係可以冇所謂嘅事，而且我又唔係啲咁隨便嘅人，浩宜嘅重點完全放錯咗地方⋯




IG Link: https://www.instagram.com/nd_cotttoncandy/?hl=zh-tw