MK學院: MK仔女江湖事件簿—鐵娘子(4)

又係打拳嘅一日，又係同啲自以為好勁嘅MK仔打。

「今日賽事嘅紅藍方分別係我哋駐場嘅鐵娘子同埋龍仔。」台下嘅賽評開咪：「大家可以開始落注喇！」

雖然我單手就可以砌低佢，但呢單嘢一有賭盤就唔關實力事。

老細喺落注台隔離觀察咗一陣，之後就嚟到我身邊。

「呢次簡單。」佢搭住我膊頭，喺我耳邊講：「第一回合，佢一打中你就瞓低。」





洗講架咩？

我跳上台：「知喇。」

拳賽開始，佢用一個迷幻嘅步伐慢慢接近我。

又係隊咗可樂嘅傻仔，麻鳩煩。

佢終於嚟到我面前，跟住就係一個速度極慢、力度極細嘅直拳。





「啪！」

佢打落嚟係完全冇聲，所以其實係我自己配音。

中拳嘅我即刻累低，台下嘅人都開始起哄。

保安喺台邊阻止啲人衝上台，而裁判就踎喺我身邊倒數。

倒數完畢，藍方勝出。





老細將落注台上面嘅銀紙掃曬落一個黑色大袋，而我就扶住圍欄慢慢企起身。

扮下嘢都要嘅。

喺我諗住落台嘅時候，幾舊好似水樽咁嘅白色嘢跌落擂台中間。

未嚟切後應，佢哋就已經開始噴白煙。

白色嘅濃煙好快就填滿成間酒吧，而我就喺混亂之中比人拉咗去後巷。

喺我面前嘅係一個著住黑色連帽斗篷、戴住全黑面具嘅男人。

「我知你想問咩，但唔好問住。」佢捉實我隻手：「走咗先講。」

等陣先。





「我都冇話要走。」我拉住佢：「我過得好好喎。」

包食包住，不知幾好。

「醒啊屌你老母！」

佢右手一巴車埋嚟，但比我接住咗。

我嘆氣：「你咪玩啦，打我唔易架。」

佢左手喺褲袋拎咗條絲巾出嚟揈咗幾嘢，之後我就暈低咗喇。